Ilpu Atimi Tas Alep Nuarin-tas alupas 14.
Nuarin-tas alupas 14.
1 Et merit vai ehgan a Samson irai up u Filistia. 5 Et atgei laion et ethi aien an natga vaig o un. 8 Et ecetai hune aien an nohui laion an natga vaig sekunt o un. 10 Inhag alupas vai natmehgan u Samson. 12 Intas ecsipece o un, er ato vai ehgan. 19 Et atoraliak itai u nup u Filistia et dirte aien. 20 Er alupai intak atimi ehgan.
1IS asuol a Samson um yetpan an maliyum Timnad, um ecet natahig is ethi Timnad irai up u Filistia.
2Is lep aridjipam aien, um asuptecnaig ehele etman im risin, um ika, Ek mun ecet natahig et ethi ainyak Timnad irai up u Filistia: va nitai inigki lehpam yin aijaurau ehgak.
3Erus ika ehelen a etman im risin, Et eti eteuc tah natahig irai ilpu takata u ilpu atimi ehpan iram, ka oʼo? ka irai up uran pece unyak asega, mika an apan aiek par leh ehgam irai up u Filistia, ilpu atimi eris eti aperitome ira ra? Ja is ika a Samson ehele etman, Lehpam yin imi nyak aiek; et idim upene irak aien.
4Ja erus eti ato a etman im risin mika is ahes ehele Ihova inmerit o un, im lep mika is ahilek tah nitai aien par aat irai up u Filistia vaig: eris idim esjilid irai up Isreel a nup u Filistia an nopan iyehki.
5Is asuol sepan Timnad a Samson, im lep etman im risin, um yetpan irai iji okoro vaine u Timnad: is um aunyauwaig vai yin laion takuras is ethi.
6Is amen alupas ehelen a Nesgai Ihova, is lep ahpati yin aien is idivaig is ahpati inhakli nanin aien, is eti eteuc tah nitai an nikman: ja is eti asuptecnaig ehele etman ka risin nitai inig is ago aien.
7Is asuol sepan aien um tas ehele natahig iyehki; is upene asega iran aien.
8Is wat ti pan itac hal opan is adumoij pan aien mika yi leh yin ehgan, is lep ahidaig pan aien mika yi almoi nohui laion: ja is idim eteuc inpak irai bii im hune an nohui laion.
9Is leh tah hune an nikman ero aien, um hag, um atga, um yetpan irai etman im risin; is alayi rau aien, erus lep caig arau: ja is eti asuptecnaig ehele rau aien mika is leh hune iyehki an nohui laion aien.
10Is asuol sepan a etman ehele natahig iyehki: is auanetha alupas eahki a Samson ira adiat is seven; is uce nedo iyehki u ilpu takuras eris ago ara.
11Eris wat ecet yin ara, eris lucsei pan atimi is dirte mika eri ilpu apa o un ara.
12Is ika ehele ra a Samson, Ekpu asaig tah intas ecsipece ehelemia ainyak an nopan inig: el eka arapakau aijaua, um ato, um asuptecnaig nesgantas iran, ira adiat et seven u nasjapicnaig uja, ekpu alupai caua ainyak sirt inyi dirte im napelumai inyi dirte:
13ja el et ehka vai caua par asuptecnaig nesgantas iran ehelek, akupu alupai nyak aijaua sirt inyi dirte im napelumai inyi dirte. Eris ika ehelen ara, Asaig intas ecsipece unyum aiek, mika ecri atahaijeg aijama.
14Is ika ehele ra aien, Is ahes nitai caig irai itai is caig itai, is lep ahes nitai aiyu irai itai is emda. Is ehka vai ra ira adiat is dri par asuptecnaig nesgantas iran.
15Ja an nadiat ford, eris ika ara ehele ehgai Samson, Namu oop natamnyu unyum aiek, mika yi asuptecnaig ehelum nesgantas an tas ecsipece o un, va ecri jim atnamud euc an cap aijama, im natimi asega an nimnim u etmam: eka mun imiacaij cama aijaua mika aki lucsei pam itai unyima aijaua, ka oʼo? Et idim uco.
16Is lep taig an nuhup u Samson a ehgan, um ika, Na esjum ache vai nyak aiek, um eti merit vai nyak: na mun asaig intas ecsipece aiek ehele ilpu atimi ehpan irak, jam eti asuptecnaig nesgantas iran ehelek. Is ika ehelen aien, Ek mun eti asuptecnaig ehele etmak ainyak ka risik, va nitai inigki et ehka vai nyak par asuptecnaig ehelum.
17Is lep taig aien an nuhup o un an nopan asjapicnaig asega, um yetpan an nadiat sevend: ja an nadiat sevend is asuptecnaig aien ehelen, vaig inig nikavaig, is imiisjis alupas ehelen a ehgan: is lep asuptecnaig nesgantas iran aien ehele ilpu atimi ehpan iran.
18Va nitai inigki an nadiat sevend, is wat eti fi ete nagesega, eris ika ehelen a nup an maliyum, Et idim aiyu hune; et idim emda laion. Is ika ehele ra aien, El akis eti acujitai irai plau aijaua vai kurimatau atahig unyak, el akis eti ato nesgantas an tas ecsipece unyak aijaua.
19Is amen alupas ehelen a Nesgai Ihova, is asuol sepan an maliyum Askelon aien, um atgei atimi is dirte ira ra, um atoraliak iji itai ura, um alupai ra sji igki apelumai eris asuptecnaig nesgantas an tas ecsipece o un. Is alupas intavaitap o un, is lep aridjipan an nimnim u etman.
20Ja eris ahtai ehgai Samson imi napa o un iyehki, is atau imi yin aien.
Currently Selected:
Ilpu Atimi Tas Alep Nuarin-tas alupas 14.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)