Ilpu Atimi Tas Alep Nuarin-tas alupas 13.
Nuarin-tas alupas 13.
1 Era esjilid irai up Isreel a nup u Filistia. 2 Et ehcohos pan a nagelo et ethi ehele ehgai Manoa. 8 Et lep ehcohos pan ehele Manoa a nagelo iyehki. 15 Nitai ahlap u Manoa, er ato nagelo vaig. 24 Eh apos Samson.
1ERIS aketo a nup Isreel um ago nedo has an nuhup u Ihova; is atcijai ra a Ihova irai ikmai nup u Filistia irai mesese is forte.
2Is eteuc a natimi is ethi an maliyum Sora, is mapoi Tan aien, nidan Manoa; is eti asvalav a ehgan.
3Is ehcohos pan ehele intakata iyehki a nagelo is ethi u Ihova, um ika ehelen, Na idim eti asvalav aiek, et eti eteuc tah inhal unyum: ja napu opoc aiek, um apos inhalav atamaig unyum.
4Va nitai inigki namu aminjinaig euc aiek, um jim umnyi waina ka kava, um jim caig tah nitai caig et has:
5napu idim opoc aiek, um apos inhalav atamaig unyum; etmu jim yetpan an nidjinin tah resor: ja etmu Nasari vai Atua a inhalav inig ahes an napos vaig o un: etpu atupun aien par imiatamaig nup Isreel vai nikmai nup u Filistia.
6Is apam a intakata iyehki um asuptecnaig ehele natamnyu un, um ika, Is apam ehelek a natimi u Atua is ethi, is idivaig nesganimtai nagelo u Atua et ethi nesganimtan, er imtitaig alupas vaig: ja kis eti ahodaig yin ainyak va nahes vaig o un, is lep eti asaig nidan aien:
7ja is ika ehelek aien, Napu idim opoc aiek, um apos inhalav atamaig unyum; jam jim umnyi waina aiek ka kava, um jim caig tah nitai caig et has: etpu idim Nasari vai Atua a inhalav inig ahes an napos vaig o un um yetpan an nadiat an mas o un.
8Is wat atahaijeg intas inig a Manoa, is ugyi Ihova aien, um ika, Ak Natimarid unyak, namu asaig aiek ehele natimi u Atua iyehki as abraig pam yin aiek, mika yi lep adumoij pam aien ehelumrau, um esege imi cumrau nedo inig et upene mika ecru ago aijumrau vai inhalav inig uhpu apos yin.
9Is atahaijeg intas o Manoa a Atua; is aketo a nagelo o Atua, um ehcohos ehele intakata iyehki, is wat ateuc anliin pece aien: ja is amen an taka uarin a natamnyu un.
10Is auroauro a intakata iyehki, um athut, um asuptecnaig ehele natamnyu un, um ika ehelen, Almoi, et mun ehcohos pam ehelek a natimi iyehki is apam ehelek aien an nadiat iyehki.
11Is atidai a Manoa, um apitac ehgan, um yetpan ehele natimi iyehki, um ika ehelen, Na atimi iyehki aiek is tas ehele intakata inigki aien, ka oʼo? Is ika aien, Ainyak ap ehki.
12Is ika a Manoa, Uhmu ehneijid intas unyum. Ecrupu evesege imi inhalav inigki aijumrau? ecrupu evago vai yin aijumrau?
13Is ika a nagelo o Ihova ehele Manoa, Etmu aminjinaig yin a intakata vai niji itai asega kis asaig ehelen vaig ainyak.
14Etmu jim caig tah nohwai vaine aien, etmu jim umnyi waina aien ka kava itoga, um jim caig tah nitai caig et has: etmu aminjinaig intas asega aien kis asaig ehelen ainyak.
15Is ika a Manoa ehele nagelo o Ihova. Aiheuc vai nyak aiek, um amen, mika ecru atho inhakli nanin incam aijumrau.
16Is ika a nagelo o Ihova ehele Manoa, El ek amen ainyak, inki eti caig tah nitai caig unyum ainyak: el et lep ahlap an nitai ahlap atnamud, eris idim ika namu ahlap vai Ihova aiek. Is idim eti ato a Manoa mika is agelo o Ihova aien.
17Is lep ika a Manoa ehele nagelo o Ihova, Nidam di, mika ecri imiahpas euc aijama, uhu wit ehneijid intas unyum?
18Is ika ehelen a nagelo o Ihova, Na a uri aiek par ahodaig nidak? Et idim itai adenaig.
19Is um leh inhakli nanin a Manoa im lep nitai ahlap eh caig, um ahlap vai Ihova an hehteuc iyehki: erus wat easpan arau, eris ago nitai imiali.
20Is wat ahes an natau nalaume um aridjai an nohatag, is aridjai a nagelo o Ihova an nalaume inig is ahes an natau. Erus wat ecetai nitai inigki a Manoa im ehgan, erus eropse an nesganimtarau arau an nobohtan.
21Ja is eti lep ehcohos pan ehele Manoa im ehgan a nagelo o Ihova. Is ato a Manoa ahes an nopan iyehki mika is agelo o Ihova aien.
22Is ika a Manoa ehele ehgan, Intupu idim emesmas akaijau, vaig inig nikavaig, intau mun ecet Atua akaijau.
23Ja is ika ehelen a ehgan, El et upene ira Atua par atgei caijau, el is eti leh nitai ahlap atnamud im nitai ahlap eh caig an nikmaijau, um eti ehvaig eheleijau nitai iji igki asega, um asuptecnaig eheleijau an nopan inig intas iji igki.
24Is apos inhalav atamaig o un a intakata, um anvi nidan par ika Samson: is auata alupas a inhalav iyehki, is lep asan tas acis yi alwai yin a Ihova.
25Is atupun a Nesgai Ihova um amen alupas ehelen irai hal opan, an nuarin amen iran u ilpu eucsupo o ilpu mapoi Tan, an niblan maliyum Sora im Esteol.
Currently Selected:
Ilpu Atimi Tas Alep Nuarin-tas alupas 13.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)