Ilpu Atimi Tas Alep Nuarin-tas alupas 12.
Nuarin-tas alupas 12.
1 Era ehtauo ehele Jefda a nup Ifreem, er ato ra vai Shibboled, era atgei ra a nup u Cileat. 7 Et mas a Jefda. 8 Ehtaij almaijidjid nup Isreel ahtaij, nan, Ibsan, era dirte a ilpu halav atamaig o un, um dirte a ilpu halav atahig o un, 11 im Ilon, 13 im Abton, era forte a ilpu halav atamaig o un, um dirte a ilpu mapon.
1ERIS asjapicnaig natimi an pece Ifreem, um apan an nuarin inig et ahes narutu iran, um ika ehele Jefda, Na a uri aiek par yetpan an pece u nup Amon um ati nedoa vai ra, jam eti imiacaij cama par atau iram? ecrupu ahli nimnim unyum ijinies iram aijama.
2Is ika ehele ra a Jefda, Eris aat alupas irak im lep irai ilpu atimi unyak a nup Amon; ja kis wat ahlaig vai caua ainyak, akis eti imiatamaig nyak irai ikmara aijaua.
3Kis wat ato ainyak mika akis eti imiatamaig nyak aijaua, kis ati nitai umoh iran an nikmak ainyak, um yetpan an pece u nup Amon, um ati nedoa vai ra, et lep atcijaig ra an nikmak a Ihova: va nitai inigki eka a uri aijaua par apam ehelek an nadiat inigki, mika aki ati nedoa vai nyak aijaua?
4Is asjapicnaig atimi asega an pece Cileat a Jefda, um ago nedoa vai nup Ifreem: eris atgei nup Ifreem a nup u Cileat, vaig inig nikavaig, eris ika, Eka atimi amen ehcid aijaua irai up Ifreem, era takitai a nup Cileat ehele nup Ifreem, im nup u Manasi.
5Eris atapnes niji uarin algauwaig Jortan a nup u Cileat an nuhup u nup Ifreem: is wat asaig tah irai up Ifreem iji ig eris aha ara, um ika, Inki algauwaig ainyak; eris ika ehelen a nup u Cileat, Na up Ifreem aiek, ka oʼo? El is ika aien, Oʼo;
6eris ika ehelen ara, Namu asaig Shibboled (Nofowai) aiek: ja is ika aien Sibboled: is ehka vai yin par ati nipjineucsen mika yi anvaktit. Eris par leh yin ara, um atgei yin irai uarin algauwaig Jortan: an nopan iyehki eris atgei nup Ifreem is forte tu dausant (42,000).
7Is tas alep vai nup Isreel a Jefda irai mesese is siks. Ja is pah mas a Jefda nup u Cileat, eris atelmoi yin an maliyum o un an pece Cileat.
8Is wat mas aien is tas alep vai nup Isreel a Ibsan nup u Bedlehem.
9Eris dirte a ilpu halav atamaig o un, um lep dirte a ilpu halav atahig o un, is adcijaig ra aien imi ilpu atamnyura irai taka uarin, is lep lucsei ilpu atahig is dirte irai taka uarin aien, mika eri ehgai ilpu halav atamaig o un. Is tas alep vai nup Isreel aien irai mesese is seven.
10Ja is pah mas a Ibsan, eris atelmoi yin an maliyum Bedlehem ara.
11Is wat mas aien is tas alep vai nup Isreel a Ilon, mapoi Sebulun; is tas alep vai nup Isreel aien irai mesese is ten.
12Ja is pah mas a Ilon mapoi Sebulon, eris atelmoi yin an maliyum Ajalon an pece Sebulun.
13Is wat mas aien is tas alep vai nup Isreel a Abton inhal u Hillel, nup u Piradon.
14Eris forte a ilpu halav atamaig o un, um dirte a ilpu mapon, eris atga ara irai togke tupko is sevente: is tas alep vai nup Isreel aien irai mesese is eet.
15Ja is pah mas a Abton inhal u Hillel nup u Piradon, eris atelmoi yin an maliyum Piradon ara, an pece Ifreem, an nedoon Amalek.
Currently Selected:
Ilpu Atimi Tas Alep Nuarin-tas alupas 12.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)