Ilpu Atimi Tas Alep Nuarin-tas alupas 11.
Nuarin-tas alupas 11.
1 Intas etipup u Jefda im nup u Cileat, mika yi atimarid ura. 12 Et takitai intas o un ehele nup Amon va nigpa. 29 Intas upyi asaig u Jefda. 32 Et esjilid irai up Amon aien. 34 Et ehneijid intas upyi asaig o un aien irai inhalav atahig o un.
1Is eucsupo emda a Jefda nup u Cileat: is etmai Jefda a Cileat, ja is takata has a risin.
2Is apos ilpu halav atamaig ehelen a ehgai Cileat; eris wat alupas a ilpu halav atamaig u ehgan, eris ahlo pan Jefda ara, um ika ehelen, Napu eti ehras isjeupigmoig etmaija aiek; nai idim hal u intakata an taka pece aiek.
3Is udei ilpu etwan aien an nopan iyehki um aha, um amen an pece Tob: eris asjapicnaig ehele Jefda a ilpu atimi amen ehcid, eris ika ara yi atimi alupas ura aien.
4An nopan iyehki eris ati nedoa vai nup Isreel a nup Amon.
5Eris wat ati nedoa vai nup Isreel a nup Amon, eris apan an pece Tob a ilpu atimi alupas u nup u Cileat, mika eri imiacaij Jefda ara:
6eris ika ara ehele Jefda, Namu apam aiek, um atimarid irama, mika ti ati nedoa vai nup Amon akaija.
7Ja is ika a Jefda ehele ilpu atimi alupas u nup u Cileat, Akis idim edemda vai nyak aijaua, um ahlo pan nyak an nimnim u etmak; eka a uri aijaua par apam ehelek an nopan inig an nohocred unyimia?
8Eris ika ehele Jefda a ilpu atimi alupas u nup u Cileat, Va nitai inigki ecra adumoij pam ehelum aijama an nopan inig, mika an ahced cama aiek, um ati nedoa vai nup Amon, um atimarid unyima irai up u Cileat asega.
9Ja is ika a Jefda ehele ilpu atimi alupas u nup u Cileat, El eka imiadumoij pan nyak ehelemia aijaua, mika ki ati nedoa vai nup Amon ainyak, el et lep ika a Ihova ki esjilid ira ra ainyak, ekpu atimarid iramia ainyak, ka oʼo?
10Eris ika ehele Jefda a ilpu atimi alupas u nup u Cileat, Etmu atimi almaijidjid an niblaija a Ihova, el ecra eti ago aijama et idivaig intas unyum.
11Is ahced ilpu atimi alupas u nup u Cileat a Jefda, eris ati yin ara mika yi atimarid ira ra aien im natimi alupas u ilpu eucsupo ura: is lep asan tas asega o un a Jefda an nuhup u Ihova an maliyum Mispi.
12Is abra atimi a Jefda mika eri apan ara ehele natimarid u nup Amon, um ika, Et echamecha irama vai euc, mika na apam aiek um aat irama an pece unyima?
13Is ika a natimarid u nup Amon ehele ilpu aheca u Jefda, Vaig inig nikavaig, eris wat ahes an pece Ijipt a nup Isreel um apam igcaki, eris atipagki inpece unyak ara, ahes an nofowai Amon um yetpan an nofowai Jabok, im lep Jortan: va nitai inigki akumu imiadumoij pam ehelek niji uari pece iji ig aijaua, um jim imiisjis.
14Is aketo a Jefda um abra atimi mika eri apan ara ehele natimarid u nup Amon:
15um ika ehelen, Et ika a Jefda, Eris eti atipagki inpece u nup u Moab, ka inpece u nup Amon, a nup Isreel:
16ja eris wat ahes an pece Ijipt, a nup Isreel, um atga an namasacen um yetpan an Jap cap, um lep yetpan an maliyum Ketes;
17eris abra atimi a nup Isreel mika eri apan ara ehele natimarid u nup Itom, um ika, Namu aiheuc vai cama aiek, um ika ecri ahced inpece unyum aijama: ja is esjum a natimarid u nup Itom par atahaijeg intas ura. Is idim uco, eris abra atimi ara mika eri apan ara ehele natimarid u nup u Moab: ja is lep esjum aien: eris lep amen an nuarin pece Ketes a nup Isreel.
18Ja eris par alaig apan ara an namasacen, um ahparehed an pece Itom, im inpece Moab, um apam an nahaijin pece Moab an ridjai o un, um atumop an nahaijin Amon igcapan, jam eti apan anliin pece Moab: is idim ehni inpece Moab nofowai Amon.
19Eris abra atimi a nup Isreel mika eri apan ehele Saihon natimarid u nup Emor, natimarid an pece Hesbon marom; eris ika ehelen a nup Isreel, Namu aiheuc vai cama aiek, um ika ecri ahced inpece unyum aijama um yetpan an nuarin unyima.
20Ja is eti asgeig irai up Isreel a Saihon mika eri ahced inpece o un ara: ja is asjapicnaig atimi asega a Saihon, um atumop an maliyum Jehas, um ati nedoa vai nup Isreel.
21Is lep atcijaig Saihon im natimi asega o un irai ikmai nup Isreel a Ihova Atua u nup Isreel, eris lep auud ra ara: va nitai inigki eris ohuun a nup Isreel inpece asega u nup Emor, nup an pece iyehki marom.
22Eris ohuun inpece asega u nup Emor ara, ahes Amon um yetpan Jabok, im lep ahes an namasacen um yetpan Jortan.
23Is idim ahlo pan nup Emor an pece iyehki a Ihova Atua u nup Isreel vai ilpu atimi o un nup Isreel, et idim eti upene mika an ohuun aiek.
24Et upene mika an ohuun inpece inigki aiek et alupai euc a Kimos Atua unyum par ohuun. Et idim uco, ecrupu ohuun inpece u ra sji igki asega, et ahlo pan ra an nuhup unyima a Ihova Atua unyima.
25Et ti unyum inpece inigki par ohuun, et idivaig is ti u Belak inhal u Sipor, natimarid u nup u Moab; is idim eti imiisjis ehele nup Isreel aien, um eti ati nedoa vai ra.
26Eris amen irai mesese is dri huntret (300) a nup Isreel an maliyum Hesbon im niji maliyum haklin iran, im Aroer im niji maliyum haklin iran, im lep irai maliyum asega ubutpotet u nofowai Amon; eka a uri aijaua par eti lep imiadumoij pan inpece inigki ehelemia an nopan iyehki asega?
27Va nitai inigki ecra mun eti ago nedo has vai euc aijama, ja na mun ago nedo has vai cama aiek: etmu almaijidjid an nopan inig an niblai nup Isreel im nup Amon a Ihova Natimi almaijidjid.
28Ja is esjum a natimarid u nup Amon par atahaijeg intas iji ig u Jefda is abraig pan ehelen aien.
29Ja is amen alupas ehele Jefda a Nesgai Ihova, is lep ahced inpece Cileat aien, im inpece u nup u Manasi, um yetpan Mispi an pece Cileat, is lep ahes Mispi an pece Cileat aien um yetpan an pece u nup Amon.
30Is asan tas upyi asaig ehele Ihova a Jefda, um ika, El et ago nedo inveijec aiek, um atcijaig nup Amon an nikmak,
31eku wit adumoij pam an nigpa ainyak ahes ehele nup Amon, ekpu ago nedo inigki ainyak, etpu idim itap vai Ihova nitai inig et ahes an neucse neom unyak par aubilid nyak, ka etpu ahlap ainyak vai Ihova an nitai ahlap atnamud.
32Is yetpan irai up Amon a Jefda par ati nedoa vai ra; is atcijai ra an nikmai Jefda a Ihova.
33Is auud ra aien, um atgei atimi is ahinag acen, ahes an maliyum Aroer um yetpan an nuarin pece Minnid, um lep yetpan an nuarin marara u niji okoro vaine, inmaliyum is twente marom. Is idim uco eris imiasuol nup Amon a nup Isreel.
34Is adumoij pam an maliyum Mispi a Jefda an nimnim o un; is lep apan itac a inhalav atahig o un mika yi aubilid yin aien, eris auud elcau ara um ahlai hutlavlav: is tup ethi ache inhal o un aien; is eti eteuc ehelen tah inhal et eche.
35Is wat ecet yin a Jefda, is ahpati napelumai o un aien, um ika, Awe, ak inhal unyak! na mun imiasuol nyak aiek, et ehioehio inliinmopok ainyak vai euc: ek mun asalgei nipjineucsek ainyak ehele Ihova, et lep ehka vai nyak par adumoij pam.
36Is ika ehelen aien, Ak etmak, el et asalgei nipjineucsem aiek ehele Ihova, ago vai nyak et idivaig intas inig et mun ahes an nipjineucsem; vaig inig nikavaig, et mun imiatamaig euc vai nup Amon, um ago neruvaig irai ilpu atimi edemda vai euc.
37Is ika ehele etman aien, Uhmu ago nitai inigki vai nyak: udei nyak an mohoc inyi ero, mika ki atga sjipe irai lola edoon ainyak, um imitaig intup amen vaig unyak, ainyak im lep ilpu apa unyak.
38Is ika aien, Apan aiek. Is adcijaig yin aien van mohoc is ero: is apan aien im ilpu apa o un, um imitaig intup amen vaig o un irai lola edoon.
39Is wat ti pan itac inmohoc is ero, is adumoij pan ehele etman aien, is lep ago vai yin a etman is idivaig intas upyi asaig o un: is itap aien, um tup amen, um eti atidai. Is lep nedo an pece Isreel nigki,
40mika eris apan irai iji mesese a ilpu takata an pece Isreel, um taig ehele inhalav atahig u Jefda nup u Cileat ira adiat is for irai iji mesese o un.
Currently Selected:
Ilpu Atimi Tas Alep Nuarin-tas alupas 11.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)