Eksotus Nuarin-tas alupas 32.
Nuarin-tas alupas 32.
1 An neti amen u Moses era ika natimi yi ago nalmui nakli kurimatau a Eron. 7 Et edemda a Atua vaig. 11 Et lep eropse aien vai intas ugyi u Moses. 15 Et ahes an nedoon a Moses, um asuol, um leh inhat eraigki et ero. 19 Et ahtagrei inhat et ero aien. 20 Et auahas nakli kurimatau aien. 22 Intas imiaras yin u Eron. 25 Et ika a Moses eri atgei atimi iji ig eris ago nedo apat ara. 30 Et alaigaheni a Moses va atimi.
1ERIS wat ato natimi mika, is eti fi ahes an lolan nedoon a Moses um asuol, eris asjapicnaig pan ehele Eron natimi, um ika ehelen, Namu atidai aiek, um ago atua imi caija, mika yi uhup iraija aien; inta eti ato akaija mika, et echamecha vai Moses inigki is iknipagki caija aien an pece Ijipt.
2Is ika a Eron ehele ra, Akumu asvi inteijeg colt aijaua et amen irai tikgai ilpu ehnaa unyimia, im ilpu halav atamaig unyimia, im ilpu halav atahig unyimia, um imiapam ehelek.
3Eris asvi inteijeg colt is amen irai tikgara natimi asega, um imiapan ehele Eron.
4Is lucsei ehele ra aien, um atho, um ago inhakli kurimatau, um ucsei irai jisel: eris ika ara, Ak nup Isreel, atua unyimia nigki, is iknipagki caua aien an pece Ijipt.
5Is wat almoi a Eron, is ago natau an nuhup o un aien; is lep atauai a Eron, um ika, Uhmu asjapicnaig imraig um hag vai Ihova.
6Is wat lahlah an tak apnyin, eris auroauro ara, um aiji, um ahlap irai iji itai ahlap atnamud, um lucsei niji itai ahlap naaurinig; eris ateucse natimi, um hag, um umwig, ja par atidai um imiacitak.
7Is ika a Ihova ehele Moses, Namu asuolse aiek; era mun auahas ra a ilpu atimi unyum, as iknipagki ra aiek an pece Ijipt:
8eris auroauro ara um atidjira an nedo inigki kis asaig ehele ra ainyak: eris atho um ago inhakli kurimatau colt ara, um atpuse an nuhup o un, um ahlap vaig, um ika, Ak nup Isreel, atua unyimia nigki is iknipagki caua aien an pece Ijipt.
9Is ika ehele Moses a Ihova, Kis almoi natimi iji igki ainyak, ja et ipjin inliinmopora ara:
10va nitai inigki namu udei nyak aiek, va etpu esjilid intavaitap unyak vai ra, mika ki arahon ra ainyak: ja ekpu ika ainyak eri ahes ehelum natimi inyi ahinag.
11Is ugyi Ihova Atua o un a Moses, um ika, Ak Ihova, na a uri aiek par edemda alupas vai ilpu atimi unyum, as iknipagki ra aiek an pece Ijipt an natimi alupas unyum, im nikmam emda?
12Erupu a uri a nup Ijipt par tas, um ika, Is iknipagki ra aien par ago niji itai has vai ra, um atgei ra irai lola edoon, um arahon ra an nobohtan? Namu atidjim aiek an tavaitap esjilid unyum, um aiheuc vai ilpu atimi unyum, vai yi jim yetpam ira ra niji itai has iji igki.
13Namu imiehva Ebraham aiek, im Aisak, im Isreel, ehtaij aheca unyum, as asan tas aktit ehele ehtaij aiek vai euc, um ika ehele ehtaij, Ekpu ika ainyak eri ahinag a ilpu mapomitaij et idivaig inmoijeuv an nohatag, ekpu lep alupai ilpu mapomitaij ainyak inpece asega inigki kis tas vaig ainyak, erupu ohuun ara irai iji mesese.
14Is adumoij a Ihova u niji itai has iji ehki is ika aien yi ago irai ilpu atimi o un.
15Is ahidai yin a Moses, um ahes an lolan nedoon um asuol, is apos an nikman aien inhat is ero is amen intas alep iran: is amen intas eris aged an nahaijin hat erahki im lep nahaijin; eris aged intas an nahaijin im lep nahaijin.
16Is auritai an hat erahki a Ihova, is lep aged intas iyehki a Atua, eris aged an hat erahki.
17Is wat atahaijeg nohra atimi a Josua an naunyauwaig ura, is ika aien ehele Moses, Nohran nedoa nigki an nuarin amen u atimi.
18Is ika a Moses, Et ti nohrara nigki era esjilid ara, et lep ti nohrara nigki era auatialidi ara: ja ek atahaijeg nohrara ainyak era acesaces nohraiitai ara.
19Is wat apan a Moses ubutpotet u nuarin amen u atimi, is ecetai inhakli kurimatau aien, im nadikjai ura: is atavaitap alupas a Moses, is ethaigse inhat erahki aien, um ahtagrei an neuhnise u nedoon,
20Is leh inhakli kurimatau aien eris ago ara, um atnamud an cap, um irara mika yi ahrenahren, um eduaraprap iran an wai, um ika ehele nup Isreel eri umnyi ara.
21Is ika a Moses ehele Eron, Eris ago inhe vai euc a natimi iji igki, mika as atau ra aiek an nedo has esjilid ura?
22Is ika a Eron, Ak natimi alupas unyak, namu jim edemda alupas aiek: na ato aiek mika era imiisjis nedo has natimi iji igki.
23Eris ika ehelek ara, Namu ago atua imi caija aiek mika yi uhup iraija: inta eti ato akaija et echamecha vai Moses inigki is iknipagki caija aien an pece Ijipt.
24Kis ika ehele ra ainyak, Erumu atipagki colt ura natimi. Eris alupai nyak ara: kis atho an cap ainyak, ja is ehcohos inhakli kurimatau inigki.
25Is wat almoi nedo ahnag u atimi a Moses; is idim imiahnag ra a Eron, va erupu asan tas has vai ra a ilpu atimi tak atimi ira ra:
26Is aiji a Moses an neucse nirahed an nuarin amen u atimi, um ika, Era apol irai Ihova a di? erumu ham ehelek ara. Eris asjapicnaig pan ehelen a ilpu mapoi Livai asega.
27Is ika ehele ra aien, Et ika a Ihova Atua u nup Isreel, Erumu atise nauitoga ura an nahaijira natimi asega, um apan an neucse nirahed, um atga an nuarin amen asega u atimi, um lep apan itac, erumu lep atgei ilpu etwara, im ilpu atimi edo ehele ra, im ilpu atimi eblaamnem ura natimi asega, athi um athi ehni.
28Eris ago is idivaig is asaig a Moses a ilpu mapoi Livai: eris emesmas natimi is dri dausant an nadiat, iyehki.
29Is idim ika a Moses, Akumu ikni caua aijaua vai Ihova an nadiat inigki, erumu atidai natimi asega vai ilpu hal ura, im ilpu etwara; va etpu acis yi alwai caua aien an nadiat inigki.
30Is wat lahlah an tak apnyin, is ika a Moses ehele atimi, Akis ago nedo has esjilid aijaua: ja ekpu apan ehele Ihova ainyak; kit ekpu ago nitai adahpoi nedo has unyimia ainyak.
31Is lep apan a Moses ehele Ihova, um ika, Ah! eris ago nedo has esjilid natimi iji igki, um ago atua imi ra irai colt.
32Ja el et iknipagki nedo has ura aiek—; ja el eh eti ago, ek ugyi euc ainyak, mika an atipagki nidak aiek an nitaasviitai unyum as aged aiek.
33Is ika a Ihova ehele Moses, Ekpu iknipagki nidai ra sji igki ainyak an nitaasviitai unyak, eris ago nedo has vai nyak ara.
34Ja namu apan aiek um atau ira atimi an nuarin inig kis asaig ehelum ainyak: etpu idim apan a Nagelo unyak um uhup iram: ja eku wit ateghe ra ainyak ekpu aru nedo has ura ainyak an nadiat iyehki.
35Is arida va atimi a Ihova va nedo ura, nikavaig, eris ago inhakli kurimatau iyehki ara, is ago a Eron.
Currently Selected:
Eksotus Nuarin-tas alupas 32.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)