Eksotus Nuarin-tas alupas 33.
Nuarin-tas alupas 33.
1 Et ika a Ihova inyi eti atau ira atimi aien et idivaig intas upyi asaig o un. 4 Era tas upoupo natimi vaig. 7 Er atipagki neom atga irai nuarin amen iran u atimi. 9 Et tas ehele Moses a Atua. 12 Et merit a Moses mika yi ecetai natimi alupas u Atua.
1IS ika a Ihova ehele Moses, Atga unyum aiek im lep natimi iji igki as iknipagki ra an pece Ijipt aiek, um apan an pece inig kis asaig ainyak ehele Ebraham, im Aisak, im Jekob, um ika, Ekpu alupai ilpu mapomitaij ainyak:
2ekpu abrai Nagelo unyak ainyak mika yi uhup iram aien; ekpu lep ahlo nup u Kenan ainyak, im nup Emor, im nup u Hed, im nup u Piris, im nup u Haivai, im nup u Jibus;
3et amen alupas nidenedid im hune an pece iyehki: ja inki eti atga an niblamia ainyak; eka atimi ipjin inliinmopomia aijaua: vai ki jim auahas caua ainyak an nefalaig.
4Eris wat atahaijeg intas itap iji igki natimi, eris taigtaig ara: is lep eti yecrei yin tah natimi an padiaig o un.
5Is idim ika a Ihova ehele Moses, Namu tas ehele nup Isreel aiek, um ika, Eka atimi ipjin inliinmopomia aijaua: ekpu auroauro ainyak um apan an niblamia, um auahas caua: va nitai inigki akumu iknipagki niji itai yecrei caua aijaua, mika ki ato ainyak nitai inigki ekpu ago iramia ainyak.
6Eris iknipagki niji itai yecrei ra a nup Isreel an nedoon Horeb.
7Is leh neom atga a Moses, um athai itac acen pan u nuarin amen u atimi, um anvi nidan par ika Neom er asjapicnaig o un. Is wat ahilek Ihova tah natimi, is apan aien an neom er asjapicnaig o un, is eteuc itac u nuarin amen u atimi.
8Is wat apan itac a Moses nalaig u neom atga, eris atidai natimi asega, um aiji irai eucse iyum udig ura, um aes pan Moses, um yetpan napan o un anliin neom atga.
9Is wat apan a Moses anliin neom atga, is asuol se napat, um aiji an neucse neom atga, is lep tas a Ihova ehele Moses.
10Eris ecetai napat natimi asega namen vaig an neucse neom atga: eris atidai natimi um ago nalaigaheni irai eucse iyum udig ura.
11Is tas a Ihova ehele Moses, et idivaig et tas tah natimi ehele etwan. Is lep ahidaig pan yin aien u nuarin amen u atimi: ja is eti udei neom atga a intakuras is ethi, naheca u Moses, nidan Josua, inhal u Nun.
12Is ika a Moses ehele Ihova, Na idim asaig ehelek aiek, mika ki atau ira atimi iji igki ainyak: ja na mun eti aniv yin ehelek aiek napu abraig pan yin aiek mika yi ahced nyak. Ja na mun ika aiek. Ek ato nidam ainyak, ekpu lep aiheuc vai euc ainyak.
13El et aiheuc vai nyak aiek, ek ugyi euc ainyak, mika an asuptecnaig ehelek aiek nedo unyum, mika ki ato euc ainyak, va apu aiheuc vai nyak aiek: um lep aktaktai mika era ilpu atimi unyum natimi iji igki.
14Is ika a Ihova, Ekpu ahced euc ainyak, um ika an atumop aiek.
15Is ika ehelen aien, El et eti ahced nyak aiek, jim imiapan cama eahki.
16Uhpu ehvato naiheuc unyum vai nyak, im lep vai ilpu atimi unyum? an nahced cama vaig unyum marom: et idim uco etpu eche namen unyak, im lep u ilpu atimi unyum, ira atimi asega an nobohtan.
17Is ika a Ihova ehele Moses, Ekpu lep ago nitai inigki ainyak na mun asaig aiek: ek aiheuc vai euc ainyak, um ato nidam.
18Is um ika aien, Ek ugyi euc ainyak, mika an ehvaig ehelek aiek natimi alupas unyum.
19Is ika aien, Ekpu ika ainyak yi atga an nuhup unyum inupene asega unyak, ekpu lep anvi nidai Ihova ainyak an nuhup unyum; ekpu lep aiheuc vai ra sji igki ainyak ek ika ainyak ki aiheuc vai ra, um ago nedo upene vai ra sji igki ek ika ainyak ki ago nedo upene vai ra.
20Is lep ika aien, Et ehka vai euc nalmoi vaig nesganimtak: inyi idim eti alum nyak tah natimi um umoh.
21Is ika a Ihova, Et idim eteuc nuarin inig ubutpotet ehelek, namu aiji ijinies an hehteuc aiek:
22etu wit ehcohos natimi alupas unyak, ekpu ati euc ainyak an niblan hehteuc meled, um adahpoi euc an nikmak, an nahtaregdei vaig inhehteuc unyak:
23ekpu lep atipagki nikmak ainyak, napu almoi incehek aiek: ja uhpu eti almoi nesganimtak.
Currently Selected:
Eksotus Nuarin-tas alupas 33.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)