Eksotus Nuarin-tas alupas 31.
Nuarin-tas alupas 31.
1 El aniv Besaliil im Aholiab a Atua um ago arapakau rau va nauritai u neom atga. 12 Et aketo a Atua um tas alep mika eri apos nadiat atumop. 18 Et leh inhat et ero a Moses.
1IS tas a Ihova ehele Moses, um ika,
2Namu ato aiek mika, kis anvi nidan ainyak um ahlaig vai Besaliil, inhal u Urai, inhal u Hur, mapoi Juta:
3kis lep ati alupas ehelen Nesgai Atua ainyak, mika yi arapakau aien, um amarero, um ato niji auritai asega,
4um aktaktai niji auritai ehka, um auritai irai colt, im silver, im bras,
5um ahumiai hat par ikni irai itai, um ucsei nalmuitai irai cai, um ago niji auritai asega.
6Kis lep ati ehelen ainyak Aholiab, inhal u Ahisamak, mapoi Tan: kis lep ati narapakau ainyak an liinmopoi ilpu atimi arapakau asega; mika eri ago nitai iji igki asega ara ek mun asaig ehelum ainyak; nikavaig,
7Neom eri asjapicnaig o un, im nelcau urin tas alep, im intapnes ijinies iran, im niji itai asega uri neom atga,
8im nefata im niji itai urin, im nitai atijai incap alahala upene iran im niji itai asega urin, im natau eri atnamud nitai auanipin upene iran,
9im natau uri niji itai ahlap er atnamud, im niji itai asega urin, im nipjinitai ereuc iran im intapnes,
10im napelumai uri itai, im napelumai itap u Eron natimi ahlap, im napelumai u ilpu hal o un, mika eri ago nauritai u ilpu atimi ahlap iran ara,
11im narakei aspi, im nitai auanipin upene va nuarin itap: erumu ago nitai iji igki asega ara ek mun asaig ehelemia ainyak.
12Is tas a Ihova ehele Moses, um ika,
13Namu tas aiek ehele nup Isreel, um ika, Akumu idim apos niji adiat atumop unyak aijaua: nitai asjaaicnaig imi nyak nigki, im lep imi caua, um yetpan irai ilpu mapomia; mika aki ato aijaua mika, ek Ihova ainyak, ek ago upene caua ainyak.
14Akumu apos nadiat atumop aijaua; et itap vai caua: uhmu idim atgei ra asega eri auahas ara: el et ago nauritai iran tah, uhmu atipagki nat naico ehele ilpu etwan.
15Uhmu ago nauritai ira adiat inyi siks; ja et adiat atumop iran nadiat sevend, um itap vai Ihova: aien et ago tah nauritai aien an nadiat atumop, uhmu idim atgei yin.
16Erumu aminjinaig nadiat atumop a nup Isreel, um apos nadiat atumop, im ilpu hal ura, im lep ilpu mapora, irai iji mesese, par itai asjaaicnaig vai intas etipup unyak.
17Et itai asjaaicnaig imi nyak nigki, im lep imi nup Isreel irai iji mesese: is ago nohatag a Ihova im nobohtan ira adiat is siks, ja is eklim amen aien an nadiat sevend, um atumop.
18Is wat tas ehni ehele Moses a Atua an lolan nedoon Saine, is alupai yin inhat is ero aien is amen intas alep iran, is aged a Atua an nikman.
Currently Selected:
Eksotus Nuarin-tas alupas 31.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)