Tyuteronome Nuarin-tas alupas 30.
Nuarin-tas alupas 30.
1 Er ika eri lucsei niji itai upene um esjilid, a ilpu atimi adumoij an liinmopora. 11 Et ubutpotet um lah intas alep u Atua. 15 Et ehcohos an nuhup ura inmas im nitai umoh iran.
1ETU wit yetpam iramia nitai iji igki asega, niji itai upene im niji itai has, ek mun ati an nuhup unyimia ainyak, aku wit lep aktaktai vaig aijaua irai iji pece asega, is ahlo pan caua iran a Ihova Atua unyimia,
2um adumoij pan ehele Ihova Atua unyimia, um imiaiji intas o un va niji itai asega ek asaig ehelemia ainyak an nadiat inigki, aijaua im ilpu hal unyimia, an liinmopomia asega, im nemda asega unyimia;
3etpu lep imiapam ra sji ehki eris lucsei ra an nedoa a Ihova, um aiheuc vai caua, um lep asjapicnaig caua irai iji pece asega is imiterimterim caua iran a Ihova Atua unyimia.
4El eris ahlo pan tah caua an tid an nobohtan, etpu asjapicnaig caua eahki a Ihova Atua unyimia, um imiapam caua:
5etpu imiapam caua a Ihova Atua unyimia an pece eris ohuun a ilpu retpomia, ja akupu ohuun aijaua; etpu ago nedo upene vai caua aien, um ika aki ahinag irai ilpu retpomia aijaua.
6Etpu aperitome inliinmopomia im inliinmopoi ilpu hal unyimia a Ihova Atua unyimia, mika yi aiyu alupas um emda inliinmopomia aijaua vai Ihova Atua unyimia, va akupu umumoh aijaua.
7Ja etpu atijai nitai has asega iji igki irai ilpu atimi tak atimi iramia a Ihova Atua unyimia, im lep ira ra era amcel vai caua ara, um atmas piv vai caua.
8Ja akupu adumoij aijaua um atahaijeg intas o Ihova, um imiaiji intas alep asega o un ek asaig ehelemia ainyak an nadiat inigki.
9Etpu lep ika a Ihova Atua unyimia yi upene niji auritai asega irai ikmamia, im ilpu hal unyimia, im ilpu hal u niji itai eklim edo irai pece unyimia, im nohwai itai an nobohtan unyimia, mika aki upene aijaua: etpu lep imiacitak upene caua a Ihova et idivaig is imiacitak ilpu retpomia aien:
10el eka atahaijeg intas o Ihova Atua unyimia aijaua, um apos intas alep o un, im nedo o un, eris aged an nitaasviitai inigki vai intas alep, um adumoij pan ehele Ihova Atua unyimia, an liinmopomia asega, im lep an nemda asega unyimia.
11Er eti adenaig vai caua intas alep inigki ek asaig ehelemia ainyak an nadiat inigki, et lep eti amen itac acen.
12Et eti amen an nohatag va aki jim ika aijaua, Etpu aridjai an nohatag vai caija a di, um imiapam eheleija, vai tupu atahaijeg akaija, um imiaiji?
13Et eti amen an nahaijin jap igcapan, va aki jim ika aijaua, Etpu atga an jap vai caija a di, um imiapam eheleija, vai tupu atahaijeg akaija, um imiaiji?
14Ja et amen ubutpotet ehelemia intas, an nipjineucsemia, im lep an liinmopomia, va akupu imiaiji aijaua.
15Ek mun idim ati an nuhup unyimia ainyak an nadiat inigki nitai umoh iran im nitai upene, im lep inmas im nitai has;
16nikavaig, ek asaig ehelemia ainyak an nadiat inigki mika yi aiyu inliinmopomia aijaua vai Ihova Atua unyimia, um ahced nefalaig o un, um apos intas alep o un, im nedo o un, im intas asaig o un, va akupu umumoh aijaua, um asvalav inyi ahinag: etpu lep acis yi alwai caua a Ihova an pece iyehki eka apan iran aijaua par ohuun.
17Ja el eka ahidai caua aijaua, um eti atahaijeg, jam adumoij, um imiahpas ilpu atmas u nup urai iji pece, um aheca ura;
18ek idim asaig ehelemia ainyak an nadiat inigki, mika akupu idim emesmas aijaua, inyi eti lep ahinag nadiat iramia an pece inig, akupu algaunyi Jortan aijaua par apan iran um ohuun.
19Er idim ato an nohatag im nobohtan an nadiat inigki, mika ek: mun ati ainyak nitai umoh iran im lep inmas an nuhup unyimia, im lep nitai upene im nitai has: akumu leh nitai umoh iran aijaua, va akupu umumoh aijaua im ilpu hal unyimia:
20va etpu aiyu inliinmopomia aijaua vai Ihova Atua unyimia, um imiaiji intas o un, um apol iran: et imiatumumoh caua aien, um ika yi ahinag niji adiat iramia: va akupu amen aijaua an pece is upyi asaig ehele ehtaij retpomia aien, ehele Ebraham, im Aisak, im Jekob, mika uhpu alupai ra.
Currently Selected:
Tyuteronome Nuarin-tas alupas 30.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)