Tyuteronome Nuarin-tas alupas 31.
Nuarin-tas alupas 31.
1 Et ahugni atimi a Moses. 7 Et ago emda inliinmopoi Josua aien. 9 Et alupai ilpu atimi ahlap niji tas alep u Atua aien, mika eri esvi ehele atimi irai iji yier sevend. 14 Et asan tas asuptecnaig ehele Josua a Atua, 19 im nohranitai par acaiji atimi. 24 Et ati nitaasviitai u intas alep aien imi ilpu mapoi Livai mika eri aminjinaig. 28 Et ated ilpu atimi alupas ura a Moses.
1IS apan a Moses um asaig intas iji igki ehele nup Isreel asega.
2Is ika ehele ra aien, Et eteuc inmesese et wun huntret im twente irak an nadiat inigki; et ehka vai nyak inlep ago vaig itai: is lep ika ehelek a Ihova, Napu eti algaunyi Jortan inigki aiek.
3Etpu atga um uhup iramia a Ihova Atua unyimia, etpu auahas nup urai pece iji igki aien an nuhup unyimia, akupu lep ohuun niji pece ura aijaua: etpu uhup iramia a Josua, et idivaig is asaig a Ihova.
4Etpu ago ira ra a Ihova et idivaig is ago aien irai Saihon im Oc, ohwat atimarid u nup Emor, im lep irai pece urau, is auahas aien.
5Etpu ikni ra a Ihova an nuhup unyimia, mika aki ago vai ra aijaua et idivaig intas alep asega kis asaig ehelemia ainyak.
6Akumu emda aijaua, um jim auatialidi, um jim imtitaig, um jim eucjeucjeucaij vai ra: et idim ahced caua a Ihova Atua unyimia; inyi eti udei caua aien, um eti atcijaig caua.
7Is ahlaig vai Josua a Moses, um tas ehelen an nuhup u nup Isreel asega, um ika, Namu emda aiek, um jim auatialidi: namu idim ahced atimi iji igki aiek, um apan an pece is upyi asaig a Ihova ehele ilpu retpora mika uhpu alupai ra; namu ikni ra aiek mika eri ohuun ara.
8Et idim apan a Ihova um uhup iramia; etpu amen ehelemia aien, um eti udei caua, um eti atcijai euc: jim imtitaig, um jim auatialidi.
9Is aged intas alep inigki a Moses, um ati ehele ilpu atimi alupas asega u nup Isreel, im ilpu atimi ahlap, ilpu mapoi Livai, eris apos nelcau ara is amen iran intas alep u Ihova.
10Is tas ehele ra a Moses, um ika, Etu wit ti pan itac inmesese inyi seven, uhu wit asjapicnaig an mesese inig eri atcijai atimi iran, an nasjapicnaig atimi irai iyum uriicai,
11eru wit apam a nup Isreel asega, um ehcohos an nuhup u Ihova Atua unyimia, an nuarin inig etpu anvai aien, akumu esvi intas alep inigki aijaua mika eri atahaijeg a nup Isreel asega.
12Akumu asjapicnaig atimi aijaua, ilpu atamaig, im ilpu takata, im ilpu halav, im nup urai taka uarin irai imnim unyimia, va erupu atahaijeg ara, um ato, um imtitai Ihova Atua unyimia, um imiaiji intas asega an tas alep inigki:
13va erupu atahaijeg, um ato, um imtitai Ihova Atua unyimia a ilpu hal ura, eris eti ato itai ara, an namen asega unyimia an pece akupu algaunyi Jortan aijaua par ohuun.
14Is tas a Ihova ehele Moses, um ika, Et ubutpotet nopan mas unyum: ahlaig vai Josua aiek, um apan aijaurau an neom er asjapicnaig o un, mika ki tas alep ehelen ainyak. Erus apan a Moses im Josua, um ehcohos an neom er asjapicnaig o un.
15Is ehcohos a Ihova anliin neom atga an napat: is aiji napat iyehki ithan neucse neom atga ijinies.
16Is tas a Ihova ehele Moses, um ika, Napu umjegse ehele ilpu retpom aiek; ja erupu atidai natimi iji igki, um apan, um ahnag vai ilpu atmas u nup urai taka uarin an pece iyehki, erupu apan iran ara par amen ehele ra; um udei nyak, um atladwi intas etipup unyak kis asig yi aktit ehele ra ainyak.
17Ja etpu atupun nedemda unyak vai ra an nopan iyehki, ekpu udei ra ainyak, um adenaig nesganimtak vai ra, uhpu auahas ra, etpu lep yetpam ira ra niji itai has im nohocred inyi ahinag; erupu ika ara an nopan iyehki, Et eti amen eheleija a Atua, uja, va nitai inigki et yetpam iraija nitai has iji igki.
18Ekpu idim adenaig nesganimtak ainyak an nopan iyehki va niji itai has asega erupu ago ara, um apitac ilpu atmas u nup urai iji pece.
19Akumu aged nohranitai inigki imi caua aijaua, um esege imi nup Isreel: ati an nipjineucsem,, va etpu itai asjaaicnaig unyak nohranitai inigki vai nup Isreel.
20Eku wit imiapan ra ainyak an pece iyehki kis asaig ehele ilpu retpora ainyak, et alupas nidenided im hune iran; eru wit hag ara, um geije, um alupas, erupu apitac ilpu atmas u nup urai iji pece ara, um aheca ura, um auahas inliinmopok, um imipalea intas etipup unyak.
21Ja etu wit yetpam ira ra niji itai has im nohocred inyi ahinag, inyi asuptecnaig vai ra nohranitai inigki, et idivaig natimi asuptecnaig; eri imiehva a ilpu mapora: ek ato naktaktai u inliinmopora ainyak era ago ara an nopan inig, ek wat eti fi imiapan ra ainyak an pece kis upyi asaig vaig ainyak.
22Is aged nohranitai inigki a Moses an nadiat iyehki, um esege imi nup Isreel.
23Is tas ehele Josua inhal u Nun aien, um ika, Namu emda aiek, um jim auatialidi: napu idim imiapan nup Isreel aiek an pece iyehki kis asaig ehele ra ainyak: ekpu ahced euc ainyak.
24Is aged ehni intas alep asega iji igki an nitaasviitai a Moses,
25ja is par tas a Moses ehele ilpu mapoi Livai, eris apos nelcau ara is amen iran intas alep u Ihova, um ika,
26Leh nitaasviitai inigki et amen intas alep iran, um ati an nahaijin nelcau et amen iran intas alep u Ihova Atua unyimia, mika yi amen eahki par asuptecnaig vai caua.
27Ek ato inliinmopomia nimiisjisitai ainyak, im inliinmopomia ipjin: kis amen ehelemia ainyak um imihum pam an nopan inig, ja eka imipalea intas o Ihova aijaua; ja eku wit mas ainyak akupu lep ago aijaua.
28Erumu ahtag pam ehelek a ilpu atimi alupas asega irai iji elcau unyimia, im ilpu atimi atauai unyimia, mika ki asaig intas iji igki ehele ra ainyak, um ahlaig vai nohatag im nobohtan par asuptecnaig vai ra.
29Ek ato ainyak mika eku wit mas ainyak, akupu auahas caua aijaua, um udei nedo inig ek mun asaig ehelemia ainyak; etpu lep yetpam niji itai has iramia an taka opan; va nedo unyimia, nikavaig, akupu ago nedo has aijaua an nuhup u Ihova, mika yi atupun nedemda o un va nauritai irai ikmamia.
30Is asaig intas asega an nohranitai inigki a Moses ehele nup Isreel, um tas ehni.
Currently Selected:
Tyuteronome Nuarin-tas alupas 31.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)