Tyuteronome Nuarin-tas alupas 28.
Nuarin-tas alupas 28.
1 Niji tas acis yi alwai vai ra era imiaiji intas o Atua ara. 15 Niji tas ahlaijaig vai ra era imipalea intas o Atua ara.
1EL eka atahaijeg upene nohrai Ihova Atua unyimia aijaua, um imiaiji intas alep asega o un ek asaig ehelemia ainyak an nadiat inigki, etpu ikni caua a Ihova Atua unyimia mika aki esjilid aijaua irai iji pece asega an nobohtan:
2etpu yetpam iramia, um uhum pam caua, nitai upene iji igki asega, el eka atahaijeg nohrai Ihova Atua unyimia aijaua.
3Akupu ahesmoij aijaua irai maliyum unyimia, akupu ahesmoij aijaua irai pece unyimia.
4Akupu ahesmoij aijaua vai ilpu hal unyimia, im nohwai itai an nobohtan; etpu ahad upene niji itai eklim edo irai pece unyimia, inyi ahinag kurimatau im siip unyimia.
5Akupu ahesmoij aijaua vai cet itai unyimia, im ipjiitai aplamod flaur iran unyimia.
6Akupu ahesmoij aijaua aku wit apan aijaua iraili eom unyimia, akupu ahesmoij aijaua aku wit alau ijo aijaua.
7Etpu ika a Ihova uhpu auud an nuhup unyimia ilpu atimi tak atimi iramia: erupu atidai vai caua ara an nefalaig yi ethi, jam aha irai efalaig inyi seven.
8Etpu asan tas acis yi alwai caua a Ihova, irai eom ikni itai unyimia, im lep irai iji itai asega eka ago aijaua irai ikmamia; etpu asan tas acis yi alwai caua aien an pece inig et alupai caua a Ihova Atua unyimia.
9Etpu ikni caua a Ihova mika aki ilpu atimi upene o un aijaua, el eka imiaiji intas alep u Ihova Atua unyimia aijaua, um ahced nefalaig o un.
10Erupu ato natimi asega an nobohtan mika et amen nidai Ihova iramia; erupu lep imtitai caua ara.
11Etpu ika a Ihova yi ahinag niji itai upene unyimia, im ilpu hal unyimia, im niji itai eklim edo irai pece unyimia, im nohwai itai unyimia an nobohtan, an pece inig is upyi asaig a Ihova ehele ilpu retpomia mika yi alupai caua.
12Etpu asalgei niji itai upene o un vai caua a Ihova, nohatag marom, va etpu ehe an nobohtan unyimia an nopan o un, mika yi upene nauritai asega irai ikmamia: akupu alupai nup urai pece inyi ahinag itai aijaua, jam eti ugyi itai ura.
13Etpu ika a Ihova aki esjilid aijaua um eti apitac; akupu amen ijinies aijaua um eti amen sepagko: el eka atahaijeg intas alep u Ihova Atua unyimia aijaua, ek asaig ehelemia ainyak an nadiat inigki, um imiaiji:
14akumu jim atidjimia aijaua iran tah intas ek asaig ehelemia ainyak an nadiat inigki, um apan an matamia ka an mauumia, par apitac irai ilpu atmas irai up urai pece um aheca ura.
15Ja el eka eti atahaijeg nohrai Ihova Atua unyimia aijaua, um eti imiaiji intas alep asega o un, im nedo o un, ek asaig ehelemia ainyak an nadiat inigki; etpu yetpam iramia nitai has iji igki asega, um uhum pan caua.
16Uhmu ahlaijai caua irai maliyum unyimia, uhmu ahlaijai caua irai pece unyimia.
17Uhmu ahlaijai caua irai eet itai unyimia, im ipjiitai aplamod flaur iran unyimia.
18Uhmu ahlaijai caua vai ilpu hal unyimia, im nohwai itai an nobohtan unyimia, etpu ahad has kurimatau unyimia im siip unyimia.
19Uhmu ahlaijai caua aku wit apan iraili eom aijaua, uhmu ahlaijai caua aku wit alau ijo aijaua.
20Etpu iknijai iramia inhas a Ihova, im nohocred, um ated caua irai iji itai asega eka ago irai ikmamia aijaua, um imihum pan an nopan iyehki uhpu auahas caua, akupu lep auroauro aijaua um emesmas; va nedo has unyimia, nikavaig, akis udei nyak aijaua.
21Etpu ika a Ihova yi apol iramia nemehe has, um imihum pan an nopan iyehki etpu auahas ehni caua aien an pece iyehki, akupu apan iran aijaua par ohuun.
22Etpu auud caua a Ihova an narici, im nemehe ihlup, im noplec has, im nehri alupas, im lep an nedoa, im nimtinjap has, im nara; etpu apitac caua nitai iji igki um yetpan an nauahas caua vaig.
23Inyi bras nohatag ithamia ijinies, inyi lep aiurn nobohtan ithan neduomia.
24Etpu ika a Ihova yi ohpa im mah incopda an pece unyimia: etpu ahes an nohatag um asuol iramia, um yetpan an nauahas caua vaig.
25Etpu ika a Ihova eri auud caua a ilpu atimi tak atimi iramia: akupu apan ehele ra aijaua an nefalaig yi ethi, jam aha an nuhup ura irai efalaig inyi seven: uhpu lep imiapan caua irai iji pece asega an nobohtan.
26Inyi itai incai man asega an nohatag, im niji itai eklim edo irai pece nohumia emesmas; inyi eti ahrei ra tah natimi.
27Etpu atijai iramia a Ihova namasaki an pece Ijipt, im naredared an ja, im inmocop, im nehias, inyi ehka nago cehcehe caua vaig.
28Etpu lep auud caua a Ihova an nahnag, im napat u nesganimtamia, im nehioehio u inliinmopomia:
29akupu raprap an nadiatadiat aijaua, et idivaig era raprap a ilpu atimi apat nesganimtara an nepig, inyi eti upene namen unyimia; uhpu ehcerucai caua, eri atoraliak itai unyimia irai iji adiat, inyi eti imiatamaig caua tah.
30Etpu aminjinanlai ehelum a ehgam, ja etpu amen ehelen a intak atimi: napu ago neom aiek, jam eti amen iran: napu ahwaig vaine aiek anliin nokoro unyum, jam eti aldei nohwai vaine.
31Uhpu atgei kurimatau unyum an nuhup unyum, ja napu eti caig iran aiek: uhpu atoraliak togke unyum an nuhup unyum, um eti lep alupai euc: uhpu alupai ilpu atimi tak atimi iram siip unyum, ja inyi eti lep lucsei ra tah.
32Uhpu alupai nup urai taka uarin ilpu halav atamaig unyum im ilpu halav atahig unyum, napu anani nesganimtam aiek, jam auatialidi va naitgaig vaig unyum an nadiat asega: inyi eti emda nikmam.
33Erupu caig nohwai itai an pece unyum, im nauritai asega unyum, a nup urai taka pece na eti ato ra aiek; uhpu ehcerucai euc um ehtipidai euc irai iji adiat:
34etpu ti lelum aiek va nitai iji igki napu ecetai aiek an nesganimtam.
35Etpu auud euc a Ihova an mocop alupas irai eijin neduom, im lep neduom, inyi ehka nago cehcehe euc vaig, inyi atupun an nugnyan neduom um yetpan ijinjinies an nidjinum.
36Etpu imiapan caua a Ihova, im natimarid unyimia akupu ati yin aijaua, an pece akis eti ato aijaua im lep ilpu retpomia; akupu aheca u ilpu atmas u nup urai pece eahki aijaua, incai im inhat.
37Uhpu imiali caua, um tas ecsipece vai caua, um imiafakahcil caua, irai iji uari pece asega etpu imiapan caua iran a Ihova.
38Akupu lucsei pan umamia nupsiitai inyi ahinag, jam aldei inyi eti elpat; etpu atahni inheled.
39Akupu ahwaig vaine aijaua iraili okoro unyimia, um aminjinaig, jam eti umnyi nide vaine, um eti aldei nohwan; etpu caig nimyeuv.
40Etpu eteuc nauicai oliv irai iji uari pece unyimia, ja akupu eti aspi caua aijaua an narakei iran; etpu upumure nohwai oliv unyimia.
41Akupu apos ilpu halav atamaig aijaua im ilpu halav atahig, ja akupu eti ohuun ra aijaua; uhpu atoraliak ra an nedoa.
42Etpu atahni nauicai asega im nohwai itai asega an pece unyimia inheled.
43Erupu esjilid iramia a nup urai taka uarin era amen ehelemia ara; akupu asuol acen aijaua.
44Erupu alupai caua itai ara mika eri lep leh, ja akupu eti alupai ra itai aijaua mika aki lep leh: erupu esjilid ara, ja akupu takitai aijaua.
45Etpu yetpam iramia nitai has iji igki asega, um apitac caua, um uhum pan caua, um imihum pan an nopan iyehki uhpu auahas caua; va nedo unyimia, nikavaig, akis eti atahaijeg intas o Ihova Atua unyimia aijaua, par apos intas alep o un, im nedo o un, is asaig ehelemia aien:
46etpu amen iramia nitai iji igki mika yi itai asjaaicnaig, um itai imiali vaig, im lep irai ilpu mapomia irai iji mesese.
47Vaig inig nikavaig, akis eti aheca u Ihova Atua unyimia aijaua an liinmopomia imiacitak, im inliinmopomia upene, va niji itai asega et ahinag;
48va nitai inigki akupu aheca u ilpu atimi tak atimi iramia aijaua, etpu abraig pan ehelemia a Ihova, an numlaig has, im nahvig wai, im intup atga, im nihkin natimi va niji itai asega: etpu lep atijai nitai apos aiurn an nauinwamia aien, um imihum pan an nopan iyehki etpu auahas caua aien.
49Etpu imiapam nup uran pece itac acen an tid an nobohtan a Ihova par ago nedoa vai caua, inyi auroauro et idivaig inmeijcop alupas; nup uran pece eka eti ato intas ura aijaua;
50nup uran pece et imrig nesganimtam ara, eri eti aktaktai ilpu fatimi ara, um eti aiheuc vai ilpu halav:
51erupu caig niji itai eklim edo irai pece unyimia ara, im nohwai itai an pece unyimia, um imihum pan an nopan iyehki uhpu auahas caua eri eti udei tah korn unyimia ara, im nide vaine, im narakei, im inhakli kurimatau unyimia, im inhakli siip unyimia, um imihum pan an naopan iyehki uhpu auahas caua.
52Erupu atapnes neucse nathatahau asega unyimia an nedoa, um imihum pan an nopan iyehki etpu eropse nathatahau unyimia et ijinies um emda, eka asgeig iran aijaua, an pece asega unyimia; erupu atapnes neucse nathatahau asega unyimia ara an nedoa, an pece asega unyimia, et alupai caua a Ihova Atua unyimia.
53Napu caig ilpu hal unyum aiek, nohui ilpu halav atamaig unyum im ilpu halav atahig unyum, etpu alupai euc ra a Ihova Atua unyum, an nedoa, im lep an nohocred iyehki, erupu atijai iram a ilpu atimi tak atimi iram:
54etpu imiaaij itai vai etwan a natimi inig et alupas naiheuc o un, um eti metug, im lep vai ehgan et aiyu inliinmpon aien vai yin, im lep vai nahaiji ilpu hal o un era amen ara, eh eti atahni ra;
55inyi eti alupaig tah ra aien tah nuarin nohui ilpu hal o un etpu caig ra aien: inyi eti amen ehelen tah nitai inyi eche va nedoa, im nohocred iyehki, erupu atijai iram a ilpu atimi tak atimi iram an neucse nathatahau asega unyum.
56Inyi eti lep aiheuc vai natamnyu un, im inhalav atamaig o un, im inhalav atahig o un, a intakata inig ehelemia is esjilid aien, im intakata esga atimi, is ehka vai yin natise vaig nugnyan neduon an nobohtan va namen upene o un, im nikni itai o un,
57inyi eti alupai ra tah nuarin u inhal o un is apos yin aien: etpu caig yin aien jam adenaig, va nedoa, im nohocred iyehki, erupu atijai iramia a ilpu atimi tak atimi iramia an neucse nathatahau unyimia.
58El eka eti aktaktai aijaua um imiaiji intas alep iji igki eris aged an nitaasviitai inigki, va akupu imtitaig nidan esjilid inigki aijaua eri imtacimtac iran, IHOVA ATUA UNYIMIA;
59etpu atijai iramia niji itai has a Ihova, im niji itai has irai ilpu hal unyimia, niji itai has esjilid inyi eti fi tiih, im nemehe esjilid inyi eti fi tiih.
60Etpu lep atijai iramia nemehe asega an pece Ijipt aien, akis imtitaig vaig aijaua; etpu lep apol iramia.
61Im lep nemehe asega, im nauatialidi asega, eris eti aged an nitaasviitai vai intas alep inigki, etpu atijai iramia a Ihova, um imihum pan an nopan iyehki uhpu auahas caua.
62Akupu eti elpat aijaua, ja akis ahinag aijaua um idivaig inmoijeuv an nohatag; va nedo unyimia, nikavaig, akis eti imiaiji intas o Ihova Atua unyimia.
63Is idim merit a Ihova nago vaig nedo upene vai caua, um ika aki ahinag aijaua; et idim uco, etpu merit a Ihova nauahas caua vaig, um ika aki tiih aijaua; uhpu iknipagki caua an pece iyehki akupu apan iran aijaua par ohuun.
64Etpu imiterimterim caua irai iji uari pece asega a Ihova, um yetpan an tid an nobohtan asega; akupu aheca u ilpu atmas u nup urai pece eahki aijaua, akis eti ato ra aijaua im ilpu retpomia, incai im inhat marom.
65Ja akupu eti amen upene irai pece iji ehki aijaua, inyi eti lep eteuc nuarin atumop imi caua: ja etpu alupai caua inliinmopomia imtitaig eahki a Ihova, im nesganimtamia apat, im inliinmopomia auatialidi:
66akupu ubutpotet u inmas unyimia aijaua; akupu imtitaig aijaua irai iji adiat im niji epig, akupu eti ato aijaua mika aki umumoh aijaua:
67akupu ika an nuhialeg aijaua, El et jupura el et upene! akupu lep ika an jupura aijaua, El et uhialeg el et upene! va netehto alupas u inliinmopomia, im nitai iji ig akupu ecetai aijaua.
68Etpu lep imiapan caua an pece Ijipt irai elcau a Ihova, an nuarin iyehki kis tas vaig ehelemia ainyak, Akupu lep eti ecetai aijaua: uhpu ahtai caua eahki imi ilpu atimi tak atimi iramia mika aki ilpu aheca atamaig ura aijaua im ilpu aheca atahig ura, ja inyi eti auanimtamia tah natimi.
Currently Selected:
Tyuteronome Nuarin-tas alupas 28.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)