Tyuteronome Nuarin-tas alupas 23.
Nuarin-tas alupas 23.
1 Natimi iji ig eri jim ikni ra vai ilpu atimi alupas. 9 Inyi adicinadicin nuarin amen u ilpu eucsupo. 15 Va naheca inig et ahapan aien. 17 Va nedo has. 18 Va niji itai ahlap er amcel vaig. 19 Va nimtan alupas. 21 Va niji tas upyi asaig. 24 Va nauahas vaig u itai.
1ET itap par ati tah et eti atamaig upene aien, mika yi atimi alupas aien, um tup ethi ache pan ira ra era asjapicnaig ara va nauritai u Ihova.
2Inyi jim tup ethi ache pan irai ilpu atimi alupas va nauritai u Ihova a inhalav an nefalaig; inyi idim jim tup ethi ache pan irai ilpu atimi alupas va nauritai u Ihova aien, um yetpan irai ilpu mapon tend.
3Inyi jim tup ethi ache pan irai ilpu atimi alupas va nauritai u Ihova tah nup Amon, ka tah nup u Moab; inyi idim jim tup ethi ache pan irai ilpu atimi alupas va nauritai u Ihova tah ra, um yetpan irai ilpu mapora tend, maiya, um lep yetpan irai iji mesese:
4va nedo ura, nikavaig, eris eti aubilid caua an nefalaig ara um alupai caua nitai caig im inwai, an nopan iyehki akis udei Ijipt aijaua; eris imiacaij Belam inhal u Bior, nupu Pidor an pece Mesopotemia ara, um alupai yin nimtan, mika yi ahlaijai caua aien.
5Ja is eti atahaijeg intas o Belam a Ihova Atua unyum; ja is ahidaig intas ahlaijai caua aien pan an tas acis yi alwai caua a Ihova Atua unyum, is idim aiheuc vai euc a Ihova Atua unyum.
6Namu jim ahilek nigpa ehele ra aiek im namen upene ura irai iji mesese.
7Namu jim amcel vai nup Itom aiek; era ilpu etwamia ara: um jim amcel vai nup Ijipt; as atimi an taka pece aiek an pece ura.
8Erupu tup ethi ache pan irai ilpu atimi alupas va nauritai u Ihova a ilpu mapora dirt.
9Eru wit apan a ilpu eucsupo par ago nedoa vai ilpu atimi tak atimi iram, namu jim ago tah nedo has aiek.
10El et amen ehelemia tah natimi et eti upene aien va nitai has et yetpam iran an nepig, etmu udei nuarin amen u atimi aien um apan itac, etmu jim apan aien an nuarin amen u atimi:
11ja et wat jupura, etmu ereuc aien an wai: ja etu wit ete nagesega, etmu lep apan aien an nuarin amen u atimi.
12Etmu lep eteuc tah nuarin itac, mika an apan iran aiek:
13etmu lep amen nirak an nij va atimi unyum; ja nau wit apan an lelitai aiek, namu ucji iran aiek, um ahidai euc um atelmoi nohok et ahes iram:
14et idim atga jipe a Ihova Atua unyimia an nuarin amen u atimi par aminjinai caua, um atcijaig ilpu atimi tak atimi iramia an nuhup unyimia; va nitai inigki etmu upene nuarin amen iran unyimia: vai yi jim ecetai tah nitai has iramia aien, um udei caua.
15Namu jim ati aiek ehele natimi alupas o un naheca inig et mun aha vai natimi alupas o un aien, um apan ehelum:
16etmu amen ehelum aien, ehelemia marom, an nuarin inig et merit vaig aien, an tah nuarin pece unyimia, et upene iran: um jim ago nedo ipjin vai yin.
17Etmu jim amen tah intakata ago ingeijid ehele ilpu takata Isreel, um jim amen tah natimi ago nedo o nup u Sotom ehele ilpu atamaig Isreel.
18Uhmu jim imiapan anliin neom u Ihova Atua unyum nimtan takata ago ingeijid, ka nimtai kuri, vaig tah intas upyi asaig: et amcel vai nitai iraigki a Ihova Atua unyum.
19Namu jim alupai etwam itai aiek va neruvaig alupas; neruvaig irai mune, ka neruvaig an nitai caig, ka neruvaig an tah nitai eris alupai atimi mika eri lep leh neruvaig:
20namu alupai nup urai taka pece itai mika uhpu lep leh neruvaig, jam jim alupai etwam itai aiek mika uhpu lep leh neruvaig: va etpu asan tas upene vai euc a Ihova Atua unyum, irai iji itai asega napu ago aiek an pece iyehki an apan iran aiek par ohuun.
21Nau wit asan tas aktit unyum aiek ehele Ihova Atua unyum, jim auatialidi nehneijid vaig: etpu idim aitgaig neruvaig unyum a Ihova Atua unyum; nedo has nigki par eti aru.
22Ja el et eti upyi asan tas aktit aiek, et eti amen iram nedo has.
23Namu apos intas inig aiek et ahes an nipjineucsem um ago; namu ago aiek et idivaig intas upyi asaig unyum ehele Ihova Atua unyum.
24Nau wit apan aiek anliin nokoro vaine u etwam, namu caig nohwai vaine aiek um geije iran; jam jim atohwaig tah an cat u um.
25Nau wit apan aiek u korn u etwam er eti fi aldei, namu aldei nesgan aiek an nikmam; jam jim aldei korn u etwam an nauitoga uri korn.
Currently Selected:
Tyuteronome Nuarin-tas alupas 23.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)