Tyuteronome Nuarin-tas alupas 22.
Nuarin-tas alupas 22.
1 Intas alep vai nedo aiheuc u atimi vai ilpu etwara. 5 Inyi eche napelumai u ilpu atamaig im ilpu takata. 6 Eri jim leh risi man im ilpu hal o un. 8 Eri ago nirahed an lolan neom. 9 Inyi tup apapa itai. 12 Nitai atid an napelumai. 13 Neruvaig irai natimi inig et asan tas has vai ehgan. 20, 22 Ingeijid. 25 Nauahas vaig u intakata. 28 Nedo has. 30 Nedo has esjilid.
1EL et ecetai kurimatau u etwam aiek ka siip o un melga vaig, jim udei yin: namu imiapan yin ehele etwam aiek.
2El et eti amen ubutpotet ehelum a etwam, ka el eti ato yin aiek, namu imiapan an neom unyum aiek, etmu amen ehelum um imihum pan an nopan iyehki etpu ahilek yin a etwam, ja namu lep alupai yin aiek.
3Namu lep ago nedo inigki aiek vai togke o un; um lep uce nedo unyum vai napelumai o un; etmu lep uce nedo unyum vai niji itai asega u etwam is etjo, ja as ecetai aiek: namu jim ateri vaig aiek.
4El et ecetai togke u etwam aiek nerop vaig an nefalaig, ka kurimatau o un, namu jim udei yin aiek; namu atau imi yin aiek um lep alcacsei rau.
5Etmu jim aso yin an napelumai u natamaig a intakata, um jim aso yin an napelumai u intakata a natamaig: et amcel a Ihova Atua unyum va ra asega era ago nedo inigki ara.
6El et eteuc nasiom u inman an nefalaig an nuhup unyum an cai, ka an nobohtan, el et amen iran inhakli man, ka nohwai man et eti fi agrei, el et lep aibuthan inhaklin a risin, ka nohwan et eti fi agrei, uhmu jim lucsei risin im lep inhaklin:
7namu atcijaig risin aiek, um lucsei inhaklin imtam; va apu amen upene aiek, um ahinag inmesese iram.
8Nau wit athai neom mat aiek, namu ago nirahed ijinies iran aiek, vai yi jim mas tah va neom unyum, el et etjo iran tah natimi.
9Namu jim ahwaig upsiitai acheiachei anliin nokoro vaine unyum aiek: vai yi jim has nohwai itai irai upsiitai as ahwaig aiek, um lep has nohwai itai anliin nokoro vaine unyum.
10Namu jim ika aiek eru aijiro kurimitau im nifo unyum um acujitai.
11Namu jim aso euc aiek ira apelumai, er ahod pelaig irai itai acheiachei, et idivaig numri siip im nelmai et tup ethi ache.
12Namu ati nitai atid aiek an nesvi nahaijin napelumai et for unyum, na adahpoi euc iran aiek.
13El et leh ehgan tah natimi, um amen ehelen, jam amcel vai yin,
14um imiapaahni intas vai yin, um asan tas has vai yin, um ika, Kis leh intakata inigki ainyak, ja is upyi amen ehele natamaig aien:
15erumu leh nitai asjaaicnaig u natahig o un a etman im risin, um imiapan ehele ilpu atimi alupas an neucse nathatahau an maliyum:
16etmu tas a etman ehele ilpu atimi alupas, um ika, Kis alupai natimi inigki inhalav atahig unyak ainyak mika yi ehgan, ja et amcel vai yin aien;
17et mun imiapaahni intas vai yin aien, um ika, Is upyi amen ehele natamaig a inhalav atahig unyum; ja nitai asuptecnaig vai yin ji igki, mika is eti upyi amen ehele natamaig aien. Erumu elgei napelumai arau an nuhup u ilpu atimi alupas an maliyum.
18Erumu leh natimi iyehki a ilpu atimi alupas an maliyum iyehki, um aredei yin;
19erumu lep aniv sikel irai silver et wun huntret ehelen, mika yi alupai etmai inhalav atahig iyehki, is imiapaahni intas has aien vai natahig u nup Isreel: etmu ehgan aien; etmu jim abraig pan yin aien irai iji adiat asega etpu umoh aien.
20Ja el et inveijec intas iyehki, el er ato mika is upyi amen ehele natamaig a natahig iyehki:
21erumu imiapan natahig iyehki an neucse neom u etman, erumu lep asji yin irai hat natimi an maliyum o un, mika yi mas aien: va nedo o un, nikavaig, is ago nedo ahnag aien ehele nup Isreel, um ago nedo has an neom u etman: et um uco, uhmu atipagki nedo has iramia.
22El eh ato mika is amen tah natimi ehele ehgai intak atimi, erumu emesmas arau, natimi is amen aien ehele intakata, im lep intakata: et um uco, uhmu atipagki nedo has iramia.
23El et ecet tah natahig aminjinanlai ehele natamnyu un tah natimi an maliyum, um amen ehelen;
24akumu imiapan rau an neucse nathatahau aijaua, um asji rau irai hat mika eru emesmas arau; is amen a natahig an maliyum, ja is eti aunyauwaig aien; is lep auahas ehgai etwan a natamaig; et um uco, uhmu atipagki nedo has iramia.
25Ja el et ecet natahig aminjinanlai anliin pece tah natimi, el et arop iran a natamaig um auahas yin: etmu mas a natamaig ache is amen ehelen aien:
26jam jim ago tah nitai irai natahig; is eti ago nedo has aien, mika yi mas vaig aien: et ago nedo aien et idivaig nedo o un tah et atidai aien vai etwan, um atgei yin:
27is ecet yin anliin pece aien, is aunyauwaig a natahig aminjinanlai, ja is eti amen tah par imiatamaig yin.
28El et ecet tah natahig is eti amen ehele natamaig aien, um eti aminjinanlai tah natimi, um arop iran, um amen ehelen, el eh ecet rau;
29etmu alupai etmai natahig iyehki sikel et fifte irai silver a natimi iyehki is amen ehelen aien, etmu lep ehgan aien; is idim auahas yin aien, va nitai inigki etmu jim atcijai yin aien irai iji adiat asega etpu umoh aien.
30Etmu jim leh ehgai etman tah natimi mika yi ehgan, is upyi amen ehelen a etman.
Currently Selected:
Tyuteronome Nuarin-tas alupas 22.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)