Tyuteronome Nuarin-tas alupas 24.
Nuarin-tas alupas 24.
1 Va nabraig pagki ehgan tah. 5 Inyi eti apan an nedoa a natimi inig et tup pam leh ehgan aien. 6, 10 Va nitai asjaaicnaig. 7 Va natimi inig et ahneg atimi aien. 8 Va naleprose. 14 Eri alupai natimi auritai nimtan. 16 Va neruvaig atoh. 19 Va nedo aiheuc.
1EL et leh intakata tah natimi mika yi ehgan, el et eti aiyu upene inliinmopon aien vai yin vaig tah nitai has et ecetai iran aien: etmu aged nitaasviitai va nabrai yin aien, um alupai yin, um abrai yin mika yi udei neom o un aien.
2Et wat atga o un aien um udei neom o un, el et ehgai intak atimi aien;
3el et lep amcel vai yin a natamnyu un apitac, um aged nitaasviitai va nabrai yin, um alupai yin, um abrai yin mika yi udei neom o un aien; ka el et mas a natamnyu un apitac, is leh yin aien ehgan;
4et itap vai natamnyu un uhup, is abrai yin aien, in lep leh yin vaig, et wat has aien; nedo has nigki an nuhup u Ihova: namu jim atupun nedo has aiek an pece et alupai euc a Ihova Atua unyum mika an ohuun aiek.
5El et tup pam leh ehgan tah natimi, etmu jim apan aien u nedoa, uhmu jim lep asaig ehelen tah nauritai: etmu amen aien an nimnim o un an mesese inyi ethi, um aminjinaig ehgan is leh aien.
6Etmu jim leh inhat irara flaur sepamki ka ijinies tah natimi nimtan: et atipagki nitai imiatamaig atimi aien.
7El er ato mika et ehneg tah ilpu etwan irai up Isreel tah natimi um asaig naheca ehelen, ka ahtai yin; etmu idim mas a natimi iyehki et ehneg atimi aien; um atipagki nedo has iram.
8Namu aktaktai aiek an nemehe leprose um imiaiji upene, um ago nedo asega inigki erupu esege imi caua a ilpu atimi ahlap, ilpu mapoi Livai: akumu ago nedo asega inig aijaua kis asaig ehele ra ainyak.
9Aktaktai nitai inig is ago a Ihova Atua unyum irai Miriam an nefalaig, akis wat udei Ijipt aijaua.
10Nau wit alupai etwam tah nitai aiek mika an lep leh aiek, jim apan anliin neom o un um leh tah nitai nimtan.
11Namu amen ijo aiek, ja etmu imiapok ijo nimtan ehelum a natimi inig as alupai yin tah nitai aiek, mika an lep leh aiek.
12El et ihkin natimi aien, jim umjeg aiek et wat amen nimtan ehelum:
13namu lep alupai yin nimtan aiek et wat ete nagesega, va etpu umjeg an napelumai o un aien, um acis yi alwai euc: nedo upene nigki an nuhup u Ihova Atua unyum.
14Namu jim ehcerucai tah natimi et aheca unyum aien va nimtan, et wat auatialidi aien um ihkin natimi, el et etwam aien, ka el et atimi et eche an pece unyum et amen aien an nimnim unyum:
15namu alupai yin nimtan aiek irai iji adiat ja etpu ete nagesega; et ihkin natimi aien, um merit vaig: vai yi jim ahlaig vai Ihova aien va nedo unyum, etpu lep eteuc nedo has iram.
16Uhmu jim atgei ilpu etmara vai ilpu hal ura, um jim atgei ilpu hal ura vai ilpu etmara: uhmu atgei atimi va nedo has ura ache, athi um athi ehni.
17Namu jim tas alep has aiek vai nup urai taka uarin, im ilpu umnij; um jim leh napelumai u intakata is mas natamnyu un nimtan:
18ja namu imiehva aiek mika as aheca aiek an pece Ijipt, ja is imiatamai euc eahki a Ihova Atua unyum: va nitai inigki ek asaig ehelum ainyak mika an ago nitai inigki aiek.
19Nau wit aldei korn unyum aiek umam, jam imiahnag an nuhud irai korn et ethi umam, jim lep apan um leh: tup udei vai nup urai taka uarin, im ilpu umnij, im ilpu takata eris emesmas a ilpu atamnyu ura: va etpu aiheuc vai euc a Ihova Atua unyum irai iji auritai asega unyum.
20Nau wit ahtaijiraig inrai cai oliv unyum aiek, jim lep etcei ran: tup udei vai nup urai taka uarin, im ilpu umnij, im ilpu takata eris emesmas a ilpu atamnyu ura.
21Nau wit aldei nohwai vaine aiek anliin nokoro vaine unyum, jim ehlek apitac atimi: tup udei vai nup urai taka uarin, im ilpu umnij, im ilpu takata eris emesmas a ilpu atamnyu ura.
22Namu imiehva aiek mika as aheca aiek an pece Ijipt: va nitai inigki ek asaig ehelum ainyak mika an ago nedo inigki aiek.
Currently Selected:
Tyuteronome Nuarin-tas alupas 24.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)