Tyuteronome Nuarin-tas alupas 21.
Nuarin-tas alupas 21.
1 Nitai ahlap va natgei atmas inig er eti ato natimi ago. 10 Intas alep vai intakata inig et leh yin an nedoa tah, um ika yi ehgan. 15 Et itap vaig tah par atipagki nuarin itai u inhalav atamaig inmeto o un vai intup merit o un. 18 Eri asji irai hat mika yi mas intakuras inig et ago nedo ipjin vai ohwat atmil o un aien. 22 Er idim ika eri jim eijcei an nauincai an nepig asega natimi auatatimi inig eris atgei yin.
1EL eh ecet tah natimi eris atgei yin, nasjeuc vaig an nobohtan, an pece inig et alupai euc a Ihova Atua unyum mika an ohuun aiek, el eh eti ato yin is atgei yin aien:
2erumu ham a ilpu atimi alupas unyimia im ilpu atimi tas alep unyimia, um asjaaicnaig pan irai iji maliyum arehed iran eris atgei yin:
3inyi uce an maliyum iyehki et eteuc ubutpotet pan u natimi eris atgei yin; erumu leh kurimatau atahig inig a ilpu atimi alupas, is eti auritai aien, um eti aihiaig itai an nitai atipe;
4erumu imiapan kurimatau atahig iyehki an nofowai et ahgarero a ilpu atimi alupas, eris eti ahapol iran um eti ahwai itai, um acaldei nidjini kurimatau atahig eahki an nofowai:
5erumu apan ubutpotet a ilpu atimi ahlap ilpu mapoi Livai; is aniv ra a Ihova mika eri aheca o un ara, um asan tas acis yi alwai an nidai Ihova; erumu tas alep ara va nimiisjis itai asega im natgei atmas asega:
6erumu lep ahisjum a ilpu atimi alupas asega an maliyum ubutpotet pan u natimi eris atgei yin, ijinies irai kurimatau atahig iyehki eris atipagki nidjinin an nofowai:
7erumu tas ara, um ika, Ecris eti atgei natimi inigki irai ikmama aijama, um eti ecetai an nesganimtama.
8Ak Ihova, namu aiheuc vai nup Isreel aiek ilpu atimi unyum, as imiatamai ra aiek, um jim atijai irai up Isreel ilpu atimi unyum inmas u natimi eti ago nedo has. Uhpu eti aru ira ra vai inmas iyehki.
9Et um uco, akupu atipagki iramia inmas u natimi eti ago nedo has aijaua, aku wit ago nedo atoh an nuhup u Ihova aijaua.
10Nau wit apan aiek um ago nedoa vai ilpu atimi tak atimi iram, el et ikni ra an nikmam a Ihova Atua unyum, el et lucsei ra aiek,
11um almoi intakata eklim upene ehele ra sji igki na lucsei ra aiek, um merit vai yin, mika yi ehgam;
12namu imiapan yin an neom unyum aiek; etpu ucsei numri nidjinin aien, um adi nihinagai an nikman;
13etpu lep atipagki napelumai an nauanaheca o un aien, um amen anliin neom unyum, um imitaig etman im risin an mohoc inyi ethi: ja namu apan ehelen aiek, um atamnyu un, etmu lep ehgam aien.
14Ja el et eti aiyu inliinmopom aiek vai yin, namu atcijai yin aiek mika yi apan aien an nuarin inig et merit vaig aien; jam jim ahtai yin vai mune, um jim leh nimtan vai yin, is ehgam aien.
15El et ero ehnaa o un tah natimi, el et lep aiyu inliinmopon aien vai yin et ethi, jam esjum vai yin et ethi, el erus apos ilpu halav imi yin arau ero, aien et aiyu inliinmopon aien vai yin, im yin et esjum vai yin aien; el et halav atamaig o un et esjum vai yin aien inmeto:
16etu wit ahaig inpadiaig o un aien imi ilpu hal o un, etmu jim ika aien yi esjilid a inhal inmeto o un et aiyu inliinmopon aien vai yin, irai inhal o un et esjum vai yin aien; et idim inhal o im inmeto aien.
17Etmu ika aien et hal o un inmeto, inhal o un et esjum vai yin aien, um alupai yin nuarin inpadiaig asega o un inyi ero: et hal o un inmeto aien; etmu ohuun nuarin inmeto aien.
18El et eteuc inhalav atamaig o un tah et ipjin um has nedo o un, um eti imiaiji intas o etman im intas o risin, el et lep imipalea aien eru wit acaiji yin arau:
19erumu asjirai yin a etman im risin, um imiapan yin ehele ilpu atimi alupas an maliyum o un, an neucse nathatahau an maliyum o un;
20erumu tas ehele ilpu atimi alupas an maliyum o un arau, um ika, Et ipjin um has nedo o inhalav atamaig inigki unyimrau, et eti imiaiji intas unyimrau aien; et lep hag alupas aien, um umnyi kava.
21Erumu asji yin irai hat natimi asega an maliyum o un, mika yi mas aien: uhmu atipagki nedo has iramia an nedo inigki; erupu lep atahaijeg a nup Isreel asega, um imtitaig.
22El et ago tah nedo has eh mas vaig tah natimi, el er ika eri atgei yin, uhmu eijcei yin an nauincai:
23etmu jim amen nohun an nauincai an nepig asega, uhmu atelmoi yin an nadiat iyehki; vai yi jim has inpece et alupai euc a Ihova Atua unyum; (et has a natimi inig an nuhup u Atua er eijcei yin.)
Currently Selected:
Tyuteronome Nuarin-tas alupas 21.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)