Tyuteronome Nuarin-tas alupas 18.
Nuarin-tas alupas 18.
1 Eri lucsei nitai iji ig a ilpu atimi ahlap im ilpu mapoi Livai er ahtai imi Ihova, par asjapigmoig niji uari obohtan ura. 3 Nuarin u natimi ahlap. 6 Nuarin u mapoi Livai. 9 Eri jim ago nedo er amcel vaig u nup urai iji pece. 15 Eri atahaijeg intas o Naprofeta iyehki, Kristo marom. 20 Naprofeta inig et tup ispun asuptecnaig intas ahcil o un aien inyi idim mas aien.
1Eri jim ohuun tah nobohtan ka tah nitai ehele nup Isreel a ilpu atimi ahlap, im ilpu mapoi Livai, ilpu mapoi Livai asega marom: erumu caig niji itai ahlap atnamud vai Ihova ara, im nahaijin imi yin.
2Eri jim ohuun tah nitai ara tup eti ache pan irai ilpu etwara: erumu ohuun nahaijin imi Ihova ara, et idivaig is asaig ehele ra aien.
3Et upene yi leh nahaijin inig ehele atimi a natimi ahlap, ehele ra era ahlap an nitai ahlap ara, kit kurimatau ka siip; erumu alupai natimi ahlap neuhlin ara, im nehpan ero, im incetpapu.
4Uhmu lep alupai yin inhupnan irai korn unyum, im nide vaine unyum, im narakei oliv unyum, im nuarin uhup an nalau irai siip unyum.
5Is aniv yin a Ihova Atua unyum irai iji elcau asega unyimia, mika yi atidai aien um aheca an nidai Ihova, aien im ilpu hal o un irai iji mesese.
6El et ahes an tah anuarin pece u nup Isreel tah mapoi Livai, um apan an nuarin iyehki etpu aniv a Ihova va nitai merit u inliinmopon;
7etmu aheca aien an nidai Ihova Atua o un, et idivaig ilpu etwan asega ilpu mapoi Livai, era atidai eahki ara an nuhup u Ihova.
8Inyi tup apapa nitai caig incara, im lep nimtan inig etpu leh aien va nahtai u itai u ilpu retpon.
9Nau wit apan aiek an pece iyehki et alupai euc a Ihova Atua unyum, uhmu jim esege imi euc par ago et idivaig nedo has u nup urai pece iji ehki.
10Etmu jim amen ehelemia tah, et atijai inhalav atamaig o un ka inhalav atahig o un aien an cap imi Molok, ka tah era ahu intas iran a ilpu atmas, ka natimi aminjinaig hal opan, ka nup itap an numlaig, ka natimi araces,
11ka natimi ago inmas, ka natimi era ahei yin a ilpu atmas, ka natimi asig yi opdicrai itai, ka natimi apol irai ilpu atmas.
12Et amcel vai ra sji igki asega a Ihova era ago nedo iji igki ara: et ahlo ra an nuhup unyum a Ihova Atua unyum va nedo has iji igki.
13Namu upene asega aiek an nuhup u Ihova Atua unyum.
14Eris apol irai ilpu atimi araces im ilpu atimi era ahu ira ra a ilpu atmas a nup eahki akupu asjeupigmoig ra aijaua: ja is acaiji caua a Ihova Atua unyimia, va aki jim ago aijaua.
15Etpu imiatidai Naprofeta inyi ethi imi caua a Ihova Atua unyimia, irai ilpu etwamia, inyi idivaig nyak; akumu atahaijeg intas o un aijaua;
16et idivaig nitai iji igki asega akis merit vaig aijaua Horeb ehele Ihova Atua unyimia, an nadiat asjapicnaig, um ika, Ecrumu jim lep atahaijeg nohrai Ihova Atua unyima aijama, um jim lep almoi incap alupas inigki, va ecri jim emesmas aijama.
17Is ika ehelek a Ihova, Et idim upene intas ura.
18Ekpu imiatidai Naprofeta inyi ethi imi ra ainyak irai ilpu etwara inyi idivai euc aien, um ati intas unyak an nipjineucsen; etpu asuptecnaig ehele ra aien intas asega ekpu asaig ehelen ainyak.
19El et eti atahaijeg intas unyak tah natimi etpu asaig aien an nidak, ekpu aru iran ainyak.
20El et lep auroauro tah naprofeta um asuptecnaig tah intas an nidak, kis eti asaig ehelen ainyak, ka tas an nidai ilpu atmas irai up urai iji pece, etpu mas a naprofeta iyehki.
21Ja el et ika inliinmopomia aijaua, Ecrupu ehvato aijama intas inig is eti asaig a Ihova?
22El et asaig tah nitai an nidai Ihova tah naprofeta, el et eti yetpam, um eti ehneijid intas o un, is idim eti asaig intas iyehki a Ihova, is auroauro um tas a naprofeta iyehki: akumu jim imtitai yin aijaua.
Currently Selected:
Tyuteronome Nuarin-tas alupas 18.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)