Tyuteronome Nuarin-tas alupas 19.
Nuarin-tas alupas 19.
1 Niji maliyum par ahapan iran. 4 Eri imiaras ilpu atimi atgei atmas iran ja par ahilek nedo ura. 14 Eri jim atipagki nitai asjaaicnaig nuari obohtan. 15 Eri eteuc natimi asuptecnaig itai et ero. 16 Neruvaig ira atimi asuptecnaig itai jam ahcil.
1ETU wit auahas ehni nup uran pece iyehki a Ihova Atua unyimia etpu alupai caua a Ihova Atua unyimia, aku wit asjeupigmoig ra aijaua um amen irai iji maliyum ura, im lep iraili eom ura;
2akumu aniv inmaliyum inyi eseij imi caua aijaua an pece iyehki unyimia, etpu alupai caua a Ihova Atua unyimia mika aki ohuun aijaua.
3Akumu ago nefalaig imi caua aijaua, um ahaig inpece iyehki, etpu alupai caua a Ihova Atua unyimia mika aki ohuun aijaua, inyi eseij nuarin iran, va erupu ahapan eahki a ilpu atimi atgei atmas asega.
4Inyi uce vai natimi atgei atmas, etpu ahapan eahki aien, um umoh: Aien et atgei etwan aien jam eti ethetiknaig, um eti edemda vai yin itu acen;
5et idivaig et wat apan an nesei tah natimi im lep etwan par atai auicai, el et etjo nesgan pas an nerehin, et wat auahan pas aien, um acaldei nauincai, um atgei etwan; etmu ahapan aien an tah inmaliyum erahki um umoh:
6vai yi jim apitac natimi atgei natmas a natimi aru inmas, et wat edemda inliinmopon aien, um uhum pan yin, va nopra an nefalaig, um atgei yin; et wat eti upene vai yin inmas vaig, is eti edemda vai yin aien itu acen.
7Va nitai inigki ek asaig ehelemia ainyak, mika aki aniv inmaliyum inyi eseij imi caua aijaua.
8El et ika a Ihova Atua unyum yi alupas inpece unyimia, et, idivaig is upyi asaig ehele ilpu retpomia aien, um alupai caua inpece asega is upyi asaig ehele ilpu retpomia aien;
9el eka apos intas alep asega iji igki aijaua um imiaji, ek asaig ehelemia ainyak an nadiat inigki, mika yi aiyu inliinmopomia aijaua vai Ihova Atua unyimia, um ahced nefalaig o un irai iji adiat; akumu lep aniv inmaliyum inyi eseij aijaua napah vaig erahki is eseij:
10va uhpu jim atgei tah natimi upene an pece unyimia, etpu alupai caua a Ihova Atua unyimia mika aki ohuun aijaua, vai yi jim amen iramia inmas o un tah.
11Ja el et edemda vai etwan tah natimi, um atpaijinai yin, um imiiris yin, um atidai, um auud yin mika yi mas aien, ja par ahapan an tah inmaliyum erahki:
12erumu leh yin eahki a ilpu atimi alupas an maliyum o un, um ati yin ehele natimi aru inmas, va etpu mas aien.
13Jim alum yin aijaua um aiheuc vai yin, jam atipagki nimtan mas u natimi upene irai up Isreel, va akupu amen upene aijaua.
14Jim atipagki nitai asjaaicnaig nuarin obohtan u natimi eblaamnem unyum aiek, eris ati a ilpu retpom umam napu ohuun aiek an pece, etpu alupai euc a Ihova Atua unyum mika an ohuun aiek.
15Et eti upene vai natimi echim asuptecnaig nedo acalacal o un tah, ka nedo maumau o un; ja eri asa neruvaig vai nitai iyehki vai intas o natimi asuptecnaig inyi ero, ka natimi asuptecnaig inyi eseij.
16El et atidai tah natimi asuptecnaig ahcil vaig tah natimi, um asuptecnaig tah nedo has o un;
17erumu atidai an nuhup u Ihova natimi erahki, erau imiisjisitai jipe arau, im lep an nuhup u ilpu atimi ahlap im ilpu atimi alupas, erupu amen ara an nopan iyehki;
18erumu ahilek upene a ilpu atimi alupas: el et atimi ahcil a natimi asuptecnaig, um asuptecnaig intas ahcil vai etwan;
19akumu ago nedo inigki vai yin aijaua, is ika aien yi ago vai etwan: va akupu atipagki nedo has ehelemia aijaua.
20Erupu atahaijeg vaig natimi asega, um imtitaig, um eti lep ago tah nedo has ehelemia inyi idivaig iyehki.
21Uhmu jim aiheuc vaig tah; uhmu lep aru inmas an mas; im nesganimtan an nesganimtan, im neijin an neijin, im nikman an nikman, im neduon an neduon.
Currently Selected:
Tyuteronome Nuarin-tas alupas 19.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)