Tyuteronome Nuarin-tas alupas 17.
Nuarin-tas alupas 17.
1 Er idim ika eri upene asega nitai iji igki er ahlap iran. 2 Eri atgei ilpu atimi eri alaigaheui vai ilpu atmas ara. 8 Eri tas alep vai nimiisjisitai ehka a ilpu atimi ahlap im ilpu atimi alupas. 12 Eri atgei natimi inig et atladwi intas alep ura. 14 Intas alep par ati natimarid vaig. 16 Nedo im nauritai u natimarid.
1Namu jim ahlap vai Ihova Atua unyum aiek an tah kurimatau, ka siip, et amen iran tah nitai has, ka tah nitai er amcel vaig: et has nitai inigki an nuhup u Ihova.
2El er ato tah natamaig ka tah intakata ehelemia, an tah nuarin pece unyum is alupai euc a Ihova Atua unyum, is ago nedo has aien an nuhup u Ihova Atua unyum, um auahas intas alep o un,
3um apan um aheca u ilpu atmas u nup urai iji pece, um ago nalaigaheni vai ra, kit nagesega, ka inmohoc, ka inmoijeuv an nohatag, kis acaiji ainyak;
4el er asuptecnaig ehelum, el et lep atahaijeg aiek, um ahilek upene; el et inveijec mika eris ago nitai has ehele nup Isreel:
5namu imiapan an neucse irahed natamaig iyehki ka intakata iyehki aiek, is ago nedo has iyehki aien, natamaig iyehki marom ka intakata iyehki, um asji ra irai hat, va erupu emesmas ara.
6Uhmu atgei natimi iyehki, et upene mika yi mas aien, vai intas asuptecnaig u natimi asuptecnaig inyi ero ka inyi eseij; jam jim atgei yin vai intas u natimi asuptecnaig inyi ethi ache.
7Erumu uhup a ilpu atimi asuptecnaig um iknijai ikmara iran par atgei yin, ja par apitac natimi asega. Et um uce namu atipagki nitai has aiek iramia.
8El et ehka vai euc tah nitai eh tas alep vaig, nikavaig, va natgei atmas, ka va naged intas, ka va naredei atimi, ka va nimiisjisitai, er imiisjisitai vaig irai maliyum unyimia: namu atidai aiek um apan an maliyum etpu aniv a Ihova Atua unyum;
9namu apan aiek ehele ilpu atimi ahlap, ilpu mapoi Livai, im lep ehele natimi alupas an nopan iyehki, um ahodaig; erumu asuptecnaig ehelum intas alep vaig ara:
10namu ago aiek et idivaig intas erupu asuptecnaig ehelum ara, era amen ara an maliyum iyehki etpu aniv a Ihova; namu ago nitai iji igki asega aiek erupu asaig ehelum ara:
11namu ago aiek et idivaig intas alep erupu esege imi euc ara, um lep idivaig neruvaig erupu asuptecnaig ehelum ara: namu jim ahidaig pan euc aiek, an matam ka an mauum, vai intas alep erupu asaig ehelum ara,
12inyi mas a natimi inigki et ijinies nedo o un, um eti atahaijeg intas o natimi ahlap et atidai aien eahki, um auanaheca an nuhup u Ihova Atua unyum, ka natimi alupas: namu lep atipagki nitai has aiek ehele nup Isreel.
13Erupu atahaijeg natimi asega, um imtitaig, um eti lep ago nedo ijinies.
14Nau wit apan aiek an pece et alupai euc a Ihova Atua unyum, um ohuun, um amen iran, um ika, Ekpu ati natimarid ainyak imi nyak, et idivaig nup urai iji pece arehed irak;
15namu idim ati yin aiek mika yi atimarid imi euc, etpu aniv yin a Ihova Atua unyum: namu ati tah irai ilpu etwam aiek mika yi atimarid imi euc: namu jim ati nup urai taka pece aiek, et eti etwam aien.
16Etmu jim ahinag hors o un, etmu jim lep ika aien eri adumoij pan an pece Ijipt natimi, va erupu ahinag hors o un: is idim ika ehelemia a Ihova, Akumu jim lep apan aijaua an nefalaig iyehki.
17Erumu jim lep ahinag ilpu ehnaa o un, vai yi jim adumoij an liinmopon aien: etmu jim lep ikni silver im colt et ahinag aien.
18Etu wit ateuc a dorona an nelcau o un aien etmu aged intas alep inigki aien an nitaasviitai, et idivaig iyehki an nuhup u ilpu atimi ahlap ilpu mapoi Livai:
19etmu amen ehelen, etmu lep esviitai iran aien irai iji adiat an numoh vaig o un: va etpu ato aien par imtitai Ihova Atua o un, um apos intas alep iji igki asega im nedo iji igki, um ago:
20vai yi jim ijinies inliinmopon aien irai ilpu etwan, um eti adumoij pan, an matan ka an mauun, u intas alep: va etpu amen aien um itu iran an nelcau o un, aien, im ilpu hal o un, im ilpu mapon, ehele nup Isreel.
Currently Selected:
Tyuteronome Nuarin-tas alupas 17.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)