Tyuteronome Nuarin-tas alupas 14.
Nuarin-tas alupas 14.
1 Er idim ika eri jim auahas nohura a ilpu hal u Atua an nehtigtaig ura. 3 Nitai iji ig eri caig im nitai iji ig eri jim caig, 4 irai iji itai eklim edo irai pece, 9 irai mu, 11 irai man. 21 Eri jim caig nitai inig et tup mas. 22 Niji uari tend irai itai va nauritai u Atua. 23 Niji uari tend im inmeto an nimiacitak an nuhup u Natimarad. 28 Niji uari tend irai itai tup ahtai im niji itai an tup naiheuc irai iji mesese dirt.
1EKA ilpu hal u Ihova Atua unyimia aijaua: akumu jim attai nohumia aijaua, um jim ucsei numri ipjiimtamia vai ilpu atimi emesmas.
2Eka ilpu atimi itap vai Ihova Atua unyimia aijaua, is ehtai caua a Ihova mika aki ilpu atimi o un ache aijaua, irai up urai iji pece asega an nobohtan.
3Akumu jim caig tah nitai has aijaua.
4Akumu caig nitai eklim edo irai pece iji igki aijaua: nan, kurimatau, im siip, im nanin,
5im hart, im robuk, im tiir cap, im nanin aleg, im antilop, im kurimatau aleg, im siip aleg.
6Akumu lep caig niji itai eklim edo irai pece asega aijaua et imhagro neduora ara, um lep imhagro nahaijin im nohaijin is atiakoai, um amai nitai caig par asjages, akumu caig aijaua.
7Jam jim caig nahaiji itai iji igki era amai nitai caig ara par asjages, im lep nahaiji ra et imhagro neduora; nan, kamela, im heer, im rabit: era amai nitai caig ara par asjages, jam eti imhagro neduora; va nitai inigki era has vai caua ara.
8Im lep picad, et imhagro neduon, jam eti amai nitai caig par asjages, et has vai caua: akumu jim caig nohura aijaua, um jim ubli nohura emesmas.
9Akumu caig nitai iji igki asega an jap, ka an wai aijaua: nikavaig, niji itai asega et amen iran nenihin im naran:
10jam jim caig nitai iji igki et eti amen iran naran im nenihin: et has vai caua.
11Akumu caig inman upene asega aijaua.
12Jam jim caig nitai iji igki; nan, inmeijcop, im inmeijcop alupas, im ospre,
13im cliit, im fakon, im vultur, im niji itai et idivaig,
14im reven asega, im niji itai et idivaig,
15im ostrij, im nalidmot, im kuku, im inmeijcop haklin, in niji itai et idivaig,
16im nalidmot haklin, im nalidmot alupas, im swan,
17im pelikan, im vultur ahi, im kormorant,
18im stork, im inpaig, im niji itai et idivaig, im intauoc, im nekrai.
19Et lep has vai caua niji itai atahas asega et lep ae: uhmu jim caig.
20Ja uhmu caig inman upene asega.
21Akumu jim caig tah nitai aijaua et ispun mas: namu alupai natimi an taka pece aiek et amen aien an nimnim unyum, mika yi caig aien; ka ahtai imi nup urai taka uarin: eka ilpu atimi itap vai Ihova aijaua Atua unyimia. Namu jim atho inhakli nanin an nidenided u risin.
22Namu asjapicnaig niji uari tend aiek irai ohwai itai asega unyum, et ededel an nobohtan irai iji mesese.
23Namu hag aiek an nuhup u Ihova Atua unyum, an nuarin iyehki etpu aniv aien par ati nidan iran, niji uarin tend irai korn unyum, im nide vaine unyum, im narakei oliv unyum, im inmeto irai hakli kurimatau unyum, im siip unyum; va apu ato aiek par imtitai Ihova Atua unyum irai iji adiat.
24El et opra acen nefalaig vai euc, um ehka vai euc napos vaig; el et itac acen vai euc nuarin iyehki etpu aniv a Ihova Atua unyum par ati nidan eahki, etu wit asan tas upene vai caua a Ihova Atua unyum:
25namu ahtai aiek vai mune, um atohwaig mune um apos an nikmam, um apan an nuarin iyehki etpu aniv a Ihova Atua unyum:
26namu lep auarimtai itai iji igki aiek na ahvig aiek, irai mune iyehki, kurimatau, ka siip, ka nide vaine, ka nitai umnyi, ka tah nitai et merit vaig inliinmopom aiek: namu hag eahki aiek an nuhup u Ihova Atua unyum, um imiacitak, aiek, im lep ra an nimnim unyum,
27im lep mapoi Livai an nimnim unyum, jim udei yin; et eti eteuc nobohtan o un, ka tah nitai o un tup ethi ache pan iramia.
28Etu wit ti pan itac inmesese inyi eseij, namu lucsei niji uari tend asega aiek irai ohwai itai unyum an mesese iyehki, um ikni irai imnim unyum:
29erumu ham a ilpu mapoi Livai, (et ti nobohtan ura im ti nitai ura tup ethi ache pan iramia,) im natimi an taka pece, im ilpu umnij, im ilpu takata eris emesmas a ilpu atamnyu ura, era amen irai imnim unyum, um hag um geije; va etpu acis yi alwai caua a Ihova Atua unyum, irai iji auritai asega na ago an nikmam aiek.
Currently Selected:
Tyuteronome Nuarin-tas alupas 14.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)