Tyuteronome Nuarin-tas alupas 15.
Nuarin-tas alupas 15.
1 Er idim ika eri atcijaig itai vai ilpu ihki atimi an mesese sevend. 7 Uhmu jim atapnes nedo aiheuc ura an mesese inigki. 12 Intas va naheca Hibru, 16 el et eti esjum aien napan vaig, eri atcijaig yin an mesese sevend um lep aiheuc upene vai yin, um alupai yin itai tup ahtai. 19 Eri ikni vai Ihova inmeto atamaig asega irai itai eklim edo irai pece.
1ETU wit yetpam niji mesese sevend asega, namu ago nedo aiheuc va atimi aiek.
2Etmu uce nedo o naiheuc unyum: Etmu jim aktaktai neruvaig tah natimi is ahtai itai aien imi natimi eblaamnem o un; Etmu jim ugyi natimi eblaamnem o un vaig aien, ka etwan; et anvi nidan par ika natcijaig u Ihova nigki.
3Namu ugyi aiek ehele nup urai taka pece: ja et wat amen tah nitai unyum ehele etwam namu tup atcijaig aiek;
4va erupu eti amen ehelemia a ilpu ihki atimi; etpu idim acis yi alwai caua a Ihova an pece et alupai caua a Ihova Atua unyum, mika aki ohuun aijaua um amen iran:
5el et atahaijeg upene nohrai Ihova Atua unyum aiek, um aktaktai um apos intas alep asega iji igki ek asaig ehelum ainyak an nadiat inigki.
6Et ago nedo upene vai euc a Ihova Atua unyum, et idivaig is upyi asaig ehelum aien: napu ahtai itai aiek imi nup urai iji pece inyi ahinag, jam eti ugyi itai; napu lep atimarid aiek irai iji pece inyi ahinag, ja inyi eti atimarid iram tah.
7El et amen ehelum tah nihkin natimi irai ilpu etwam an tah anuarin pece unyum an pece unyum et alupai euc a Ihova Atua unyum, etmu jim ipjin inliinmopom aiek, um jim avaktit nikmam vai etwam et ihkin natimi aien:
8namu asalgei upene nikmam vai yin aiek, um ahtai imi yin nitai iji igki et upene vai yin va nihkin natimi o un.
9Etmu jim aktaktai inliinmopom has aiek um ika, Et mun ubutpotet inmesese sevend, inmesese er atcijaig itai va atimi iran; um has nesganimtam vai etwam et ihkin natimi aien, um eti alupai yin tah nitai; etpu ahlaig vai Ihova aien vai euc, etpu lep amen iram nedo has.
10Namu alupai yin itai aiek, um jim ohocred inliinmopom, nau wit alupai yin itai aiek: etpu idim ago nedo upene vai euc a Ihova Atua unyum irai iji auritai asega unyum va nitai inigki, im lep irai iji itai asega na ago an nikmam aiek.
11Eri eti lep tiih a ilpu ihki atimi an pece: va nitai inigki ek asaig ehelum ainyak mika, namu asalgei upene nikmam aiek vai etwam, im ilpu atimi auatialidi unyum, im ilpu ihki atimi unyum an pece unyum,
12El er ahtai etwam imtam, nup u Hibru atamaig, ka nup u Hibru takata, el et lep aheca unyum aien irai mesese inyi siks; namu tup aticijai yin aiek an mesese sevend.
13Nau wit tup aticijai yin aiek, jim abrai yin mika yi atga o un jam ihkin natimi:
14namu aiheuc vai yin aiek um ispum alupai yin itai, irai siip unyum, im itai anliin neom ikni itai unyum, im itai an nuarin ikni nide vaine unyum: namu alupai yin tah nitai iji igki aiek, is alupai euc a Ihova Atua unyum.
15Namu imiehva aiek mika as aheca aiek an pece Ijipt, ja is iknipagki euc a Ihova Atua unyum: va nitai inigki ek asaig nitai inig ehelum ainyak an nadiat inigki.
16Ja el et ika ehelum aien, Inki eti udei euc ainyak; va naiyu u inliinmopon vai euc im ra an nimnim unyum, im lep namen upene o un ehelum;
17namu leh nitai ahed aiek, um aiji intikgan an tapnes neom, etpu aheca unyum aien irai iji mesese. Namu lep ago nedo inig vai naheca atahig unyum aiek.
18Etmu jim ehka vai euc intup abrai yin vaig; is upene vai euc aien is idivaig naheca is ero erus aheca unyum arau va nimtan, is aheca unyum aien irai mesese is siks: etpu lep acis yi alwai euc a Ihova Atua unyum irai iji itai asega na ago aiek.
19Namu ikni vai Ihova Atua unyum aiek inmeto atamaig asega irai kurimatau unyum im siip unyum: namu jim ago tah nauritai aiek irai meto atamaig irai kurimatau unyum, um jim ucsei nalau irai meto irai siip unyum.
20Namu caig ra aiek an nuhup u Ihova Atua unyum irai iji mesese an nuarin iyehki etpu aniv a Ihova, aiek im ra an nimnim unyum.
21El et has tah nuarin iran, el et atga has, ka apat nesganimtan, ka has tah nuarin, uhmu jim ahlap iran vai Ihova Atua unyum.
22Uhmu caig anliin nokoro unyum: erumu ehras caig ara era has ara, im ra era upene ara, et idivaig robuk im hart.
23Jam jim caig inja iran; namu atladwi se an nobohtan aiek, et idivaig inwai.
Currently Selected:
Tyuteronome Nuarin-tas alupas 15.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)