Tyuteronome Nuarin-tas alupas 12.
Nuarin-tas alupas 12.
1 Eris idim ika eri auahas niji itai asega er ago nedo apat iran. 5 Eri aminjinaig nuarin inig er aniv va nauritai u Atua. 15, 23 eri jim caig inja irai itai. 17, 20, 26 Eri hag niji itai hegaig itap an nuarin itap ache. 19 Eri jim udei ilpu mapoi Livai. 29 Eri jim ahilek va nedo apat u nup urai pece.
1AKUMU apos intas alep im nedo iji igki asega aijaua, um ago an pece iyehki, et alupai caua a Ihova Atua u ilpu retpomia mika aki ohuun aijaua, ira adiat asega akupu umumoh aijaua an nobohtan.
2Akumu auahas ehni niji uarin asega aijaua, eris auanaheca u ilpu atmas ura iran a nup urai pece iji ehki akupu ohuun aijaua, irai lola au, im lep irai hakli edoon, im lep ithai cai mat asega:
3akumu alcapdicraig natau ura aijaua, um auahas natmasimai ura, um atnamud niji tap ura an cap; akumu lep acaldei nalmui ilpu atmas ura aijaua eris ates, um atipagki nidara an nuarin iyehki.
4Akumu jim ago nedo inigki aijaua vai Ihova Atua unyimia.
5Ja etu wit aniv tah anuarin irai iji elcau asega unyimia a Ihova Atua unyimia, mika yi ati nidan eahki aien, akumu ahilek nuarin amen o un aijaua, um apan eahki:
6akumu imiapan niji itai ahlap atnamud unyimia eahki aijaua, im niji itai ahlap, im niji uari tend unyimia, im niji itai ahlap ehvaig irai ikmamia, im niji itai ahlap vai intas aktit unyimia, im niji itai ahlap eka tup ago aijaua, im inmeto irai kurimatau unyimia im siip unyimia:
7akumu hag eahki aijaua an nuhup u Ihova Atua unyimia, akupu lep imiacitak niji itai asega aijaua eka ago irai ikmamia aijaua, im ilpu hal unyimia, nitai iji igki is acis yi alwai caua iran a Ihova Atua unyimia.
8Akumu jim ago aijaua et idivaig nedo asega inta ago akaija igcaki an nopan inig; nikavaig, era ago nedo inigki et upene ira ra natimi asega.
9Eka eti fi yetpan an nuarin atumop unyimia aijaua im inpece iyehki, et alupai caua a Ihova Atua unyimia.
10Ja aku wit algaunyi Jortan aijaua, um amen an pece iyehki et alupai caua a Ihova Atua unyimia mika aki ohuun aijaua, etu wit lep alupai caua nitai atumop aien vai ilpu atimi tak atimi iramia asega um arehed, um lep upene namen unyimia;
11etpu aniv intah anuarin a Ihova Atua unyimia, um ati nidan eahki par amen; akumu imiapan eahki aijaua niji itai asega ek asaig ehelemia ainyak; niji itai ahlap atnamud unyimia, im niji itai ahlap unyimia, im niji uari tend unyimia, im niji itai ehvaig irai ikmamia, im niji itai esjilid asega vai intas upyi asaig unyimia akis asaig ehele Ihova aijaua:
12akumu lep imiacitak aijaua an nuhup u Ihova Atua unyimia, im ilpu halav atamaig unyimia, im ilpu halav atahig unyimia, im ilpu aheca atamaig unyimia, im ilpu aheca atahig unyimia, im ilpu mapoi Livai era amen ara anliin nokoro unyimia; era idim eti ohuun tah nuarin nobohtan ara, ka tah nitai tup ethi ache pan iramia.
13Akumu aktaktai aijaua, um jim ahlap irai iji itai ahlap atnamud unyimia irai iji uarin asega akupu almoi aijaua:
14ja akumu ahlap aijaua irai iji itai ahlap atnamud unyimia, an nuarin iyehki etpu aniv a Ihova an tah nelcau unyimia, akumu lep ago eahki aijaua nitai iji igki asega ek asaig ehelemia ainyak.
15Ja akumu atgei nitai iji igki asega aijaua eka ahvig aijaua, um caig irai iji imnim asega unyimia, et idivaig naiheuc u Ihova Atua unyimia vai caua: erumu caig ara era has ara, im lep ra era upene ara, et idivaig robuk im hart.
16Jam jim caig inja iran; jam atladwi an nobohtan et idivaig inwai.
17Akumu jim caig niji uari tend irai korn unyimia aijaua iraili imnim unyimia, ka nide vaine unyimia, ka narakei oliv unyimia; ka inmeto irai hakli kurimatau unyimia, ka siip unyimia, ka tah nitai vai intas upyi asaig unyimia, ka niji itai ahlap eka tup ago aijaua, ka niji itai ahlap asjaig jipe irai ikmamia:
18ja akumu caig nitai iji igki an nuhup u Ihova Atua unyimia aijaua, an nuarin iyehki etpu aniv a Ihova Atua unyimia, aijaua, im inhalav atamaig unyimia, im inhalav atahig unyimia, im naheca atamaig unyimia, im naheca atahig unyimia, im ilpu mapoi Livai anliin nokoro unyimia: akupu imiacitak aijaua an nuhup u Ihova Atua unyimia irai iji itai asega akupu ago irai ikmamia aijaua.
19Akumu aktaktai aijaua um jim udei ilpu mapoi Livai an numumoh vaig unyimia an nobohtan.
20Etu wit ika a Ihova Atua unyimia mika, yi alupas inpece unyimia et idivaig is upyi asaig ehelemia aien, nau wit lep ika aiek ekpu caig nohu itai eklim edo irai pece ainyak, va nahvig niji itai eklim edo irai pece unyak; namu caig niji itai ek im edo irai pece aiek, nitai iji igki asega na ahvig aiek.
21El et itac acen vai euc nuarin etpu aniv a Ihova Atua unyimia nati vaig nidan eahki, namu atgei kurimatau unyum aiek im siip unyum, is alupai euc a Ihova, et idivaig kis asaig ehelemia ainyak, namu lep caig nitai iji igki aiek iraili imnim unyum na ahvig aiek.
22Uhmu caig nitai iji igki, et idivaig eh caig robuk im hart: erumu caig ra ara era has ara, im lep ra era upene ara.
23Jam jim caig inja iran: et itai umoh iran inja iran; namu jim caig nitai umoh iran aiek tup ethi ache pan an nohun.
24Namu jim caig aiek; namu atladwi aiek an nobohtan et idivaig inwai.
25Namu jim caig aiek; va apu upene aiek, im ilpu hal unyum erupu epitpitac iram ara, nau wit ago nedo inig aiek et upene an nuhup u Ihova.
26Ja namu lucsei niji itai itap ache unyum aiek, im niji itai ahlap as upyi asaig aiek, um apan an nuarin iyehki etpu aniv a Ihova:
27namu ahlap aiek irai iji itai ahlap atnamud unyum, nohun im inja iran, ijinies an natau u Ihova Atua unyum: uhmu atladwi inja irai itai ahlap unyum ijinies an natau u Ihova. Atua unyum, namu caig nohun aiek.
28Aktaktai um atahaijeg intas iji igki asega ek asaig ehelum ainyak, va apu upene aiek, im ilpu hal unyum erupu epitpitac iram ara irai iji mesese, nau wit ago nedo inig aiek et upene um atoh an nuhup u Ihova Atua unyum.
29Etu wit auahas nup urai pece iji ehki a Ihova Atua unyimia an nuhup unyimia, akupu apan iran aijaua um ohuun, aku wit asjeupigmoig ra aijaua, um amen an pece ura;
30akumu aminjinaig caua aijaua, va uhmu jim oop caua par apitac ra, uhu wit auahas ra an nuhup unyimia; um jim ahilek intas vai ilpu atmas ura, um ika, Eris aheca u ilpu atmas ura a nup urai pece iji igki um uauo? ecrupu lep ago nedo ura aijama.
31Akumu jim ago nedo ura vai Ihova Atua unyimia aijaua: eris ago vai ilpu atmas ura niji itai has asega et amcel vaig a Ihova; eris idim atnamud ilpu halav atamaig ura ara im ilpu halav atahig ura vai ilpu atmas ura.
32Akumu aktaktai aijaua um ago nitai iji igki asega ek asaig ehelemia ainyak: jim ehcilpun iran an tah nitai, um jim atipagki.
Currently Selected:
Tyuteronome Nuarin-tas alupas 12.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)