Tyuteronome Nuarin-tas alupas 11.
Nuarin-tas alupas 11.
1 Intas ahugni ra mika eri imiaiji intas alep u Atua, 2 va nato vaig ura u niji auritai alupas u Atua, 8 vai intas upyi asaig u niji itai upene um alupas u Atua, 16 im lep vai intas acaiji ra o un. 18 Eri aktaktai upene intas o Atua. 26 Er ati an nuhup ura intas acis yi alwai ra im intas ahlaijai ra.
1ETMU aiyu inliinmopomia aijaua vai Ihova Atua unyimia, um apos intas o un, im nedo o un, im nitai merit o un, im intas alep o un irai iji adiat.
2Akumu ato aijaua an nadiat inigki: ek eti tas ainyak ehele ilpu hal unyimia, eris eti ato ara, um eti almoi nedo ated caua u Ihova Atua unyimia, im nedo esjilid o un, im nikman adai, im nikman emda,
3im nedo emda o un, im niji auritai o un, is ago aien an pece Ijipt irai Fero natimarid u nup Ijipt, im lep an pece asega o un;
4im lep nedo o un irai ilpu eucsupo u nup Ijipt, im lep irai hors ura, im jariot ura; nikavaig, is ika aien yi ataluopni pam ra injap an Jap cap, eris wat apitac caua ara, is auahas ra a Ihova um imihum pam an nopan inig;
5im lep nedo o un vai caua an namasacen, um imihum pam an nopan iyehki akis hamki aijaua;
6im lep nedo o un vai Tedan im Abairam, ohwat hal u Elaiab, mapoi Ruben: is asalgei nipjineucsen nobohtan, um atleg rau, im ilpu hal urau, im neom atga urau, im niji itai asega urau, an nuhup u nup Isreel asega:
7ja akis almoi aijaua niji auritai esjilid asega is ago a Ihova.
8Va nitai inigki akumu apos intas alep asega iji igki aijaua ek asaig ehelemia ainyak an nadiat inigki, va akupu emda aijaua, um apan um ohuun inpece iyehki, akupu apan iran aijaua um ohuun;
9um amen um itu iramia an pece iyehki, is asaig a Ihova ehele ilpu retpomia mika etpu alupai ra aien im ilpu mapora, inpece inig et ohua nidenedid im hune iran.
10Et eti idivaig inpece Ijipt, akis ahes nan aijaua, inpece iyehki akupu apan iran aijaua um ohuun, akis ahwaig upsiitai eahki aijaua, um leh inwai urin irai eduomia, et idivaig inceslum an tah nokoro:
11ja et eteuc nedoon im niskanse an pece iyehki, akupu apan iran aijaua um ohuun, et lep alupas incopda et ahes an nohatag:
12inpece et aktaktai vaig a Ihova Atua unyimia: et amen nesganimtai Ihova Atua unyimia iran irai iji adiat im niji mesese.
13El eka atahaijeg upene intas alep unyak aijaua ek asaig ehelemia ainyak an nadiat inigki, um aiyu inliinmopomia aijaua vai Ihova Atua unyimia, um aheca o un an liinmopomia asega im lep an nesgamia asega,
14ekpu alupai caua incopda an pece unyimia an nopan o un, incopda uhup im incopda apitac, va akupu asjapicnaig korn unyimia aijaua, im nide vaine unyimia, im narakei oliv unyimia.
15Ekpu lep ikni nefelelicai umamia ainyak incai niji itai eklim edo irai pece unyimia, va akupu hag aijaua um geije.
16Akumu aminjinaig caua aijaua, vai yi jim ahnag inliinmopomia aijaua, um adumoij, um aheca u ilpu atmas u nup urai iji pece, um ago nalaigaheni vai ra;
17ja etpu edemda vai caua a Ihova, um atapnes an nohatag, vai yi jim ehe, inyi eti lep ededel niji itai an nobohtan; akupu auroauro aijaua um emesmas an pece upene iyehki et alupai caua a Ihova.
18Va nitai inigki akumu ikni intas iji igki unyak an liinmopomia aijaua, im lep an nesgamia, um arore mika yi itai asjaaicnaig an nikmamia, um lep idivaig itai imiehva juju an nesganimtamia.
19Akumu esege intas iji igki imi ilpu hal unyimia aijaua, um tas vaig, aku wit ateuc iraili eom unyimia aijaua, um atga an nefalaig, um asjeucse, um atidai.
20Akumu lep aged aijaua irai auicai an neucse neom unyimia, im lep irai eucse irahed unyimia:
21va etpu ahinag nadiat iramia, im lep irai ilpu hal unyimia, an pece is asaig a Ihova ehele ilpu retpomia mika etpu alupai ra aien, et idivaig etpu amen nohatag ijinies an nobohtan.
22El eka emda aijaua um apos intas alep iji igki asega ek asaig ehelemia ainyak, mika aki ago aijaua, um aiyu inliinmopomia vai Ihova Atua unyimia, um ahced nefalaig asega o un, um apol iran;
23etpu ahlo nup urai pece asega iji ehki a Ihova an nuhup unyimia, akupu ohuun niji pece u atimi iji ig aijaua era ahinag ara um esjilid iramia.
24Akupu ohuun niji uarin asega aijaua akupu atga iran aijaua: etpu ahes an namasacen um yetpan an nedoon Lebanon, um ahes an nofowai, nofowai Yufretes marom, um yetpan an jap itac acen.
25Inyi eti emda tah natimi natidai vaig an nuhup unyimia: erupu imtitai caua, um eucjeucjeucaij vai caua, a nup urai iji pece asega akupu atga iran aijaua, vai Ihova Atua unyimia, et idivaig is asaig ehelemia aien.
26Akumu ato aijaua mika, ek ati an nuhup unyimia ainyak nitai upene im nitai has an nadiat inigki;
27nitai upene, el eka imiaiji intas alep u Ihova Atua unyimia aijaua, ek asaig ehelemia ainyak an nadiat inigki;
28ja nitai has, el eka imipalea intas alep u Ihova Atua unyimia, um adumoij an nedo inigki ek asaig ehelemia ainyak an nadiat inigki, um apitac ilpu atmas u nup urai iji pece, akis eti ato ra aijaua.
29Etu wit imiapan caua a Ihova Atua unyimia an pece iyehki, akupu apan iran aijaua um ohuun, akumu ati nitai upene aijaua an lolan nedoon Cerisim, jam ati nitai has an lolan nedoon Ibal.
30Et eteuc an nahaijin Jortan igcapan, an nuarin u nete u nagesega, an pece u nup u Kenan, era amen ara an nuarin marara et ehnan pan Cilcal ubutpotet pan nuarin marara Mori.
31Akupu algaunyi Jortan aijaua um apan par ohuun inpece et alupai caua a Ihova Atua unyimia, akupu ohuun aijaua, um amen iran.
32Akumu apos aijaua um ago intas alep im nedo asega ek ati an nuhup unyimia ainyak an nadiat inigki.
Currently Selected:
Tyuteronome Nuarin-tas alupas 11.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)