Tyuteronome Nuarin-tas alupas 10.
Nuarin-tas alupas 10.
1 Nedo aiheuc u Atua par aketo um aged an hat is ero, 6 par ati Eliesar mika yi isjeupigmoig Eron, 8 par ikni ilpu mapoi Livai, 10 par atahaijeg intas ugyi u Moses va atimi. 12 Intas ahugni ra mika eri imiaiji intas o Atua.
1IS ika ehelek a Ihova an nopan iyehki, Namu ates inhat apalapal yi ero aiek et idivaig erahki uhup, um aridjipam ehelek an lolan nedoon, um ago nelcau irai uari cai.
2Ekpu aged an hat erahki ainyak intas is amen an hat erahki uhup, as ahtagrei aiek, ja namu iknise an nelcau iyehki aiek.
3Kis ago nelcau ainyak an cai sitim, um ates inhat is ero is idi-vaig erahki uhup, um aridjipan an lolan nedoon, um apos inhat is ero erahki an nikmak.
4Is aged an hat erahki aien is idivaig intas eris upyi aged: intas alep et ten, is asaig ehelemia a Ihova an nedoon, anliin cap, an nadiat asjapicnaig: is ati ehelek a Ihova.
5Kis ahidai nyak ainyak um ahes an lolan nedoon um asuol, um ikni inhat erahki anliin nelcau kis ago ainyak; et amen eahki, et idivaig is asaig ehelek a Ihova.
6Eris ahes Biirod a nup Isreel inpece u nup u Jeakan um atga ura um apan Mosera: is mas eahki a Eron, eris lep atelmoi yin eahki: is isjeupigmoig yin a Eliesar inhal o un um ago nauritai u natimi ahlap.
7Eris ahes eahki ara um apan Cutcota; um lep ahes Cutcota um apan Jotbad, inpece et amen iran nofowai.
8Is ikni ilpu mapoi Livai a Ihova an nopan iyehki, mika eri apos nelcau ara is amen iran intas alep u Ihova, um aiji an nuhup u Ihova, um aheca o un, um asan tas acis yi alwai an nidan, um umihum pam an nopan inig.
9Va nitai inigki eris eti leh tah nuarin nobohtan a ilpu mapoi Livai, ka tah nitai eri ohuun tup ethi ache pan irai ilpu etwara; et ura a Ihova, et idivaig is upyi asaig ehele ra a Ihova Atua unyimia.
10Kis amen ainyak an lolan nedoon ira adiat is forte im nepig is forte, is idivaig kis upyi ago ainyak; is lep atahaijeg intas unyak a Ihova, is lep esjum a Ihova nauahas caua vaig.
11Is ika ehelek a Ihova, Atidai aiek, um atga um uhup ira atimi, va erupu apan ara um ohuun inpece iyehki, kis asaig ehele ilpu retpora ainyak mika ekpu alupai ra ainyak.
12Ak nup Isreel, et idim merit nitai inigki ehelemia a Ihova Atua unyimia, mika aki imtitai Ihova Atua unyimia aijaua, um ahced nefalaig asega o un, um aiyu inliinmopomia vai yin, um aheca u Ihova Atua unyimia an liinmopomia asega, im lep an nesgamia asega,
13um imiaiji intas alep asega u Ihova, im nedo o un ek asaig ehelemia ainyak an nadiat inigki, va akupu amen upene aijaua.
14Et idim ohuun nohatag im nohatag ijinies acen a Ihova Atua unyimia, im lep nobohtan, im niji itai asega iran.
15Ja is imiacitak ilpu retpomia a Ihova, um aiheuc vai ra, um ehtai ilpu mapora, aijaua marom, ira atimi asega, et idivaig an nopan inig.
16Va nitai inigki etmu aperitome inliinmopomia aijaua, um jim lep ipjin inliinmopomia.
17Et idim Atua irai ilpu atua, um Atimarid irai ilpu atimarid a Ihova Atua unyimia, Atua esjilid, um emda, er lep imtitaig vai yin, et eti asjaaicnaig ira atimi aien, um eti lucsei nimtan:
18et ago nedo atoh aien vai ilpu umnij, im ilpu takata eris emesmas a ilpu atamnyu ura, um aiheuc vai nup urai taka uarin, um alupai ra nitai caig im nitai aso ra.
19Akumu aiheuc vai nup urai taka uarin aijaua: akis up urai taka pece aijaua an pece Ijipt.
20Akumu imtitai Ihova Atua unyimia aijaua; um aheca o un, um apol iran, um asan tas aktit an nidan.
21Et itai imiacitak vaig unyimia aien, et lep Atua unyimia, aien is ago niji itai esjilid im niji itai imiali imi caua, akis almoi aijaua an nesgaiimtamia.
22Eris asuol an pece Ijipt a ilpu retpomia, eris atimi is sevente ara; ja eka ahinag aijaua an nopan inig va Ihova Atua unyimia, um idivaig inmoijeuv an nohatag.
Currently Selected:
Tyuteronome Nuarin-tas alupas 10.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)