Zakaliya 8
8
Nyambi ya Ngula ukulupisha kupindula Yelushalema
1Kami lizu lya Nyambi ya Ngula lyezile kukwami ngayi, 2Eshe nisho akwamba Nyambi wa Makunge ngayi, “Nili na lihungu lyalinene ha Ziyoni, pe nili na lihungu hahendi na wukali shikuma hahendi. 3Eshe nisho akwamba Nyambi ya Ngula ngayi, Nikuboka ku Ziyoni, pe nikekala mu Yelushalema, kami Yelushalema ukehaniwa lukena lwa kupwisha, pe lipili lya Nyambi wa Makunge likehaniwa ngayi, lipili lya kuyela.”
4Eshe nisho akwamba Nyambi wa Makunge ngayi, batukulukazi babalume naba bambuyama bakekala kami mu mikwakwa yamu Yelushalema hinga bakwata mikombo yabo mu maboko ndaba ya kukulumpala. 5Pe mu mikwakwa nimwamo mukenzala batwanuke babalume naba ba bambuyama bakafukaninangamo.
6Eshe nisho akwamba Nyambi wa Makunge ngayi, ndi shikenga sha kukomokesha ku bantu bakashalaho ha matena ayo, kami kati shikenga sha kukomokesha na kukwami ndi? Nisho akwamba Nyambi ya Ngula. 7Eshe nisho anamba Nyambi wa Makunge ngayi, “Nikalamwina bantu bami, pe nikabafumisha ku litunga lya ku mushamuko naku mponci, 8nikabaleta ngayi bakekale mu Yelushalema, bakenga bantu bami nami nikenga Nyambi yabo mu kupwisha namu kulunga.”
9Eshe nisho anamba Nyambi wa Makunge ngayi, “Shumenu, enu munaliyuvwili awa mazu bambile bamiluwe obo bekalileko, kufuma mutena uyo oho batendele mwimbi wa Litala lya Nyambi wa Makunge ngayi bazike Litala lya Nyambi. 10Ndaba oho matena ayo shilolo akume kowa muntu hinge shimuna shatambwilenga ncuungu ha mulimo. Kowa wahehezelenga mikwebo yendi shiwahe mu ku mwena ndaba yaka malamo wendi, ndaba muntu na muntu namwingishile ngayi balilwishe umo na kamalamo wa ndambo yendi. 11Ngoboni wuluno nifwako kukatenda nahiyo ku mashaliza anaba bantu bashalileho ngonehe shiya natendele ku matena akunyima. Eshe nisho anamba Nyambi wa Makunge. 12Mbuto yikakula shiwahe, mikolobozi ya shinyanca yikayima mikabo, hanci hakamenesha byakulya na mayilu akavwisha mume. Nikapana ebye byuma nimwabyo kwinga likona lya mashaliza anaba bantu. 13Enu bantu ba mu Yunda na Ishalela mwengile bantu ba kukutiwa shikuma mukati ka matunga ngoboni nikamilamwina, pe mukenga ba kufuyoliwa. Haya hinga mutina, ngoboni shumishenu maboko wenu.”
14Ndaba eshe nisho akwamba Nyambi wa Makunge ngayi, “Ngonehi nafungile kuleta makando hahenu oho batatizenu bampilamishile, pe nabulile kubweshamo mutima. 15Haya ndaba nafungakale kutenda shiwahe ku lukena lwa Yelushalema na bantu ba Yunda. Nohobene hinga mutina. 16#Efwe 4:25. Ebye nibyo byuma mukafwanina kutenda, ambenu kupwisha ku umo na wamina na kuyata kwa kupwisha kuya kukuleta ku mwena mu zinkuta zenu, 17hinga uhanganikila byabibi ndambo yobe kami hinga muhaka kubeza bya mahalo, ndaba nazimba byuma ebye nimwabyo. Eshe nisho anamba Nyambi ya Ngula.”
18Niho lizu lya Nyambi ya Ngula lyezile kuli Zakaliya kami ngayi, 19Eshe nisho anamba Nyambi wa Makunge ngayi, “Kuzila kulya kwa ngonda ya wunaa, ya mutanu naya mutanu na zibili na ya wulikumi bikenga bikati bya ku wahilila na kutangala, kami bikenga bimbo bya ku wahilila ku baka litala lya Yunda. Nohobene hakenu bya kupwisha na ku mwena.”
20Eshe nisho anamba Nyambi wa Makunge ngayi, “Bantu ba matunga na baya bazika mu minzi bakeza, 21bantu bamu lukena lwamina bakaya ku lukena lwamina bakamba ngayi, ‘Tuyenu wanguwangu tukalambilile kuyamiziziwa kwa Nyambi ya Ngula na kushinga Nyambi wa Makunge ngayi atuyuvwileko nceshe. Pe muntu na muntu wambile ngayi, ami kami nikuya.’” 22Niho bantu nimwabo na matunga a ngovu akeza mu Yelushalema na kushinga Nyambi wa Makunge, kwiza mu kulambilila kuyamiziziwa kwa Nyambi ya Ngula. 23Eshe nisho anamba Nyambi wa Makunge ngayi, “Mu matena ayo, bantu likumi ba ku zindimi nimwazo bakakwata na kuyuminina ku shivwalo sha Kayunda na kwamba ngayi, ‘Tuyenga nobe, ndaba tunayuvwu ngayi Nyambi uli hamo na nobe.’”
Currently Selected:
Zakaliya 8: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
