Zakaliya 12
12
Kushoboloka kwa Yelushalema
1Lizu lya Nyambi ya Ngula alubulwile muluwe wa Nyambi hali Ishalela. Nyambi ya Ngula, ou watandubwile mayilu na kuyaka mwimbi wa hano hanci, ou wayakile moyo wa muntu ou uli mumwendi, ukwamba ngayi, 2“Mona, nilinakufutula Yelushalema kwinga nkomoki ya kutalangisha bantu ba matunga nimwabo bamuzinguluka, Yunda kami bakazinguluka hamo na Yelushalema. 3Ha mutena uya nikatenda Yelushalema kwinga limanya lyalilemu lya bantu ba matunga nimwawo, aba bakezeka kulikatula bakalemanako. Matunga nimwawo akakunguluka kami kulwisha Yelushalema. 4Nyambi ya Ngula ukwamba ngayi, ha mutena uyo, nikakama bambishi nimwabo mwanga bakekale mu lumpa, pe bakakukandamaho bakapempela. Ngoboni nikapenza meho wami baka litala lya Yunda, oho nikakama bambishi ba bakamatunga nimwabo na wushishitwa. 5Niho ba mavumo a Yunda bakalyambisha nibo bamwine ngayi, ‘Baka litala lya Yelushalema ba kushuma, ndaba Nyambi wa Makunge, Niye Nyambi yabo.’
6“Ha mutena uyo nikatenda mavumo a Yunda kwinga ngo nyungu yili ha mundilo banatakamiki ha nkuni, ngo lumuni lwa mundilo mukati ka bikuta. Bakalobesha bantu ba mishobo nimwayo bamizinguluka baya bali ku shilyo naku shimoho, ngoboni Yelushalema ukenzala na bantu.
7“Nyambi ya Ngula ukapana kukoma ha kutatika ku baka litala lya Yunda, ngayi maleema a baka litala lya Ndavita na maleema anaba bazika mu Yelushalema akabule kupitakana maleema a Yunda. 8Ha mutena uyo Nyambi ya Ngula ukalamwina aba bazika mu Yelushalema, ngayi mwanga wamushe shikuma hakati kabo ukalifweka ngo Ndavita, kami litala lya Ndavita bakalifweka na Nyambi, ku mitwe yabo bakalifweka ngo lingeloyi lya Nyambi ya Ngula. 9Pe ha mutena uyo nikashinga kulobesha matunga nimwawo aya akeza na kulwisha Yelushalema.”
Kulila ou bayahile na mulinga
10 #
Yowa 19:37; Kuh 1:7. #Mat 24:30; Kuh 1:7. Baka litala lya Ndavita nanaba bazika mu Yelushalema nikayitila moyo wa nceshe na wakulambilila, nohobene ngayi oho bakapenza kukwami uya bayahile, pe bakamulila ngo muntu ukulila mwana umo pele na kupwezuma ngo muntu ukupwezuma ha kufwa kwa mwanendi wa mweli. 11Ha mutena uyo kulila kwa mu Yelushalema kukenga kwakunene ngo ba kulila Handandi-Limoni#12:11 Handandi-Limoni: Lizina lya Mbaalu, nyambi wa zimbuto mu Kenaani na Shiliya. Oho mbuto yafwilenga mu mwaka na mwaka, bantu babo bahanganikilenga ngayi na nyambi naye nafu, pe ba kulila lufu lwendi. mu mbuwa ya Mengindo. 12Litunga likalila livumo ha livumo bakalila ninkayabo, bakalupashi lwa Ndavita ninkayabo na bakazabo bakalila ninkayabo, bakalupashi lwa Natani ninkayabo na bakazabo bakalila ninkayabo, 13bakalivumo lya Levi ninkayabo na bakazabo bakalila ninkayabo. Bakashimeyi bakalila ninkayabo na bakazabo bakalila ninkayabo, 14na mavumo aya anashalaho akalila ninkayabo na bakazabo kami ninkayabo.
Currently Selected:
Zakaliya 12: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
