Zakaliya 11
11
Kuloba kwa bamalamo ba Ishalela
1Shinkulula bihala byobe, obe Lembanoni,
ngayi mwanga mundilo utweshe kuhokesha mitondo yobe ya shinda#11:1 Mitondo ya shinda, Banaliyavwishi mitondo kwinga kufwekesha na batulela, shinene baya bakanguma..
2Lilenu shikuma enu mitondo ya Shayipulashi,
ndaba mitondo ya shinda yinawu,
mitondo yayiwahe, yinalobo!
Lilenu enu mitondo ya Oka yaku Mbashani,
ndaba lishaka lya kuzika linatemiwi.
3Yuvwililenu kulila kwa balishani,
mabuyishilo wabo a wilo, analobeshiwi!
Yuvwililenu kukangoka kwa babimbwi,
ndaba shimbundu sha Yondana shinalobo.
Balishani babili
4Nyambi ya Ngula, Nyambi yami ukwamba ngayi, “Buyisha litanga lya bambelele likuya na kuzihiwa. 5Aba ba kubalanda, ba kubaziha, ngoboni ku shushuliwa bafwako. Pe obo ba kubalandisha, bakwamba ngayi, ‘Yemezenu Nyambi ya Ngula, Ami nahetakale,’ Niho balishani babo kubayuvwila nceshe bafwako.” 6Nyambi ya Ngula ukwamba ngayi, “Haya kuyuvwila nceshe aba bazika mu litunga nifwako. Nikayaka bantu nimwabo mu maboko anaba bazika nabo hahepi naku mwene yabo uya ukalobesha litunga. Pe kuka balamwina nifwako.”
7Niho nengile mulishani wa bambelele baya balandiwile kuya mukuzihiwa. Nashimbile miwana yibili ya wulishani, muwana umo nawutumbile ngayi, “Nceshe,” wamina ngayi, “Umo” pe nabuyishilenga bambelele. 8Nafumishile balishani bahatu mu ngonda yimo.
Ndaba nayongeshele shikulupisho, kami bazimbile. 9Nambile ngayi, “Nifwako kukenga mulishani wenu. Haya aba ba kulifwila, bafwenga tuhu. Aba ba kuyongala, bayongwelenga tuhu, pe aba ba kushalaho, balivwote umo na wamina.”
10Niho nashimbile muwana watumbiwile ngayi, “Nceshe,” nawupokwele na kumanisha kulimama kuya nalimamine na matunga nimwawo. 11Kuya kulimama, kwamanine wawuya mutena, pe bambelele baya bayandishiwilenga, baya bamonene ebye natendele, balimuke ngayi, linengi lizu lya Nyambi ya Ngula.
12 #
Mat 26:15. #Mat 27:9-10. Nambile kukwabo ngayi, “Ndi shinawaha kukwenu, mpanenu ncuungu yami. Ndi shilolo shiwahe, pe hinga mumpanika.” Niho bampanine, makumi ahatu a muwayawaya wa shiliva. 13Niho Nyambi ya Ngula ambile kukwami ngayi, “Wupuhile ku mukakubumba.” Pe nashimbile makumi ahatu a muwayawaya wa shiliva, ndando yayiwahe eye bahanganikile ngayi niyo yafwanina kwinga ncuungu yami na kupuhila mu Litala lya Nyambi ya Ngula. 14Niho napokwele muwana wawubili watumbile ngayi, “Umo,” kupokola shikonzi mukati ka Yunda na Ishalela. 15Nyambi ya Ngula niho ambile kukwami ngayi, “Shimba bya kuliyavwisha bya mulishani wakuyeba. 16Ndaba nikayaka mulishani mu litunga, ou ukabula kutwala mutima ku bambelele ba kuyongala, hinge kukafwatula babashe, hinge kupanga ba kukola, hinge kulisha balishiwahe, ngoboni ukalya nyama ya bambelele babawahe na kutabula zimpazi zabo. 17Makando wendi ou mulishani wakuyeba, ou unashiyi bambelele! Mukwale mwanga uketule liboko lyendi na liho lyendi lya shilyo, liboko lyendi mwanga linyate na liho lyendi lya shilyo mwanga lifwe!”
Currently Selected:
Zakaliya 11: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
