Baloma Kutontolola
Kutontolola
Liñwati lya Paulu ku Baloma watikitile ngayi linge lya kuwahisha nzila yendi ha bihanganiko biya ekalile nabyo bya kuya ku litengo lya ku Loma. Bihanganiko byendi byengile bya kuya na kutenda milimo mukati ka Bakakilishitu ba ku Loma mu matena akwezekela, pe kami bakatwesha kumuyavwa ngayi akaye ku Shipeni. Watikitile kutontolola ku yuvwishisha kwendi ha kukulupila kwa Bakakilishitu nanebye byatendiwanga mu wumi wa Bakakilishitu baya banakulupili. Libuka lya Baloma lyekala na ncango nimwazo za kwinzala za Paulu.
Munyima ya kushangwisha bantu ba mu litengo lya ku Loma, hamo na kubatongweza bya malombelo endi hahabo, Paulu unamoneshe mutwe wa Liñwati lya Baloma ngayi, “Ncango zaziwahe zinahololo ngayi Nyambi unayaka bantu kwinga bakwoloka kukwendi kupitila mu kukulupila kufuma ku kutatika kutwala ku mamaninino.” (1:17.)
Paulu unaneneheshe ou mutwe ngayi, mikoka nimwayo ya bantu, Bayunda hinge Bakamatunga ba kushingiwa kwingiwa bakwoloka kuli Nyambi ndaba nimwabo wubili wabo, bali mu nceto ya ngovu za wubi. Bantu bakwingiwa bakwoloka kuli Nyambi kupitila muli Yeshu Kilishitu oho bakukulupila mumwendi. Kami Paulu unatontololo bya wumi wawupya muli Kilishitu uya unezi ndaba ya noku kulilumikila kwakupya na Nyambi. Mukakukulupila uli mu ku mwena na Nyambi kami Moyo wa Nyambi unamushobololo ku ngovu za wubi na ku ngovu za lufu. Mu matapululo 5-8 Paulu kami unamba ebye zezilile Ndayano za Nyambi na bya ngovu za Moyo wa Nyambi mu wumi wa bakakukulupila. Kami ntumwana Paulu unezeke shikuma kulubulula ha liyipu likwamba ngayi kati Bayunda na Bakamatunga bali nahiti mu bihanganiko bya Nyambi ha muntu. Unamanishi na kwamba ngayi, kukaniwa kwa Yeshu ku Bayunda, yinengi mbalila ya bihanganiko bya Nyambi bya kuleta mikoka nimwayo ya bantu mu nceshe za Nyambi zili muli Yeshu Kilishitu, kami Paulu unakulupili ngayi Bayunda kaliha bakatwalililaho kukana Yeshu. Ku mamaninino Paulu unatikiti eshe banafwanini kuyoya Bakakilishitu, shinene eshe banafwanini kulihaka umo na wamina. Eye mitwe unayitoyo ngayi yinengi mulimo kuli Nyambi, kami niwo mulimo wa Bakakilishitu ku litunga na ku umo na wamina mu kuholola bihanganiko bya kulubuluka. Namanishilili liñwati na mazu wendi hamo na mazu akuyemeza Nyambi.
Biya Bilimo
Kutontolola na bya mutwe wa ncango 1:1-17
Kupulwishiwa kukushingiwa 1:18—3:20
Nzila ya Nyambi ya kupulwisha 3:21—4:25
Wumi wawupya muli Kilishitu 5:1—8:39
Ishalela mu bihanganiko bya Nyambi 9:1—11:36
Nyoyelo ya Bakakilishitu 12:1—15:13
Mamaninino na kushangwisha kwa bantu 15:14—16:27
Currently Selected:
Baloma Kutontolola: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.