Milimo 28

Paulu ha shikuli sha Malita

1Oho twapulukile, twayuvwile ngayi shikuli shiyo shatumbiwile Malita. 2Bantu banaha ha shikuli batumoneshele nceshe zazinene. Batutambwile shiwahe batuyibikilile mundilo, ndaba ya mvula walokelenga, pe kwekalile mashika. 3Paulu wayile na kuchaba shikuta sha nconco, oho ashiyakile ha liziko, niho liyoka lyafuminemo ndaba ya ntukumina, pe lyalamatilile ku liboko lyendi. 4Oho bayo bantu bamonene liyoka lya wuhungu lya nyenzelele ku liboko lyendi, balyambashanine ngayi, “Mwa shikuma muntu ou mukakuziha! Hinga napuluku ku liwate, ngoboni Nyambi wakwoloka kwitabila wufwako ngayi ayoye.” 5Ngoboni Paulu waminzwilile liyoka mu mundilo, kwakubula kuyuvwa kukola. 6Bantu batatilile ngayi ukazimba, hinga ngayi ukawila hanci na kufwa. Ngoboni oho bamutilaminine shikati shashitali, ngoboni bamonene ngayi kowa shimina shinatendiwi, bantu bafutukile mu bihanganiko byabo, pe bambile ngayi, “Nengi umo wa banyambi!”

7Hahepi na mbalila iyo kwekalile mafuba a Pambuliyashi, mukulwane wa shiya shikuli. Watutambwile na kutukobelela shiwahe mu litala lyendi matena ahatu. 8Tata Pambuliyashi walanganine, ndaba wakolelenga mashikashika mu lutu na wulweli wa mu livumo wakupitisha mukeza. Paulu wenginine mu litala wamulombelele, niho amukambikile maboko, pe wamunyongomanishile. 9Oho kwatendiwile ebye, bantu bamo bakolelenga ba mu shikuli bezile, Paulu wabanyongomanishile. 10Bantu bayo batupanikile ntupu yayingi, kami oho twayilenga batupanikile nebye twabulile.

Paulu ukukuma ku Loma

11Munyima ya zingonda zihatu, twayile mukala wetu mu shishepe shimina, shiyo shekalile mu shikuli shikati sha mupepo. Shishepe eshe shafuminenga ku Alekizandiliya, pe shatumbiwile ngayi, “Bana ba Bambuyu.” 12Oho twafuwile mu Shilakushi, twonzelelemo matena ahatu. 13Oho twafuminemo kuyo twakulishile shibumbo sha liwate, niho twakafuwikile ku Lenjo. Munyima ya mutena umo, mpepo ya mu mbowela yapepokele, ha mutena wakulundamina twafuwikile ku Puteoli. 14Kuyo twawanineko bakakukulupila bamo, batunyepele ngayi twikale nabo shunda. Niho twayile ku Loma. 15Oho bakakukulupila bayuvwile mpupo yetu, bezile na kutushimbawila kukuma ku Mwanya Wakulandishila wa Apiyashi na ku Matala a Bayeni Ahatu. Paulu oho abamonene, wakambilile kuli Nyambi, kami washumankanishiwile.

Paulu uku shimikila ku Bayunda ku Loma

16Oho twakumine mu Loma, Paulu bamwitabilishile kwikala ninkayendi na mukazinta mukakumulama.

17Munyima ya matena ahatu, Paulu wehanine bakulwane ba Bayunda ngayi ba kunguluke. Oho bakungulukile wambile kukwabo ngayi, “Bawushinda wami, hinge nabulu kutenda shuma sha kulwisha bantu, hinga biheka bya batatizetu na mushobo wetu, ngoboni nengile kayili kufuma ku Yelushalema, pe bantwalile ku Baloma. 18Nibo bantatubile, bashingile kuncobolola, ndaba babulile kuwana mulandu waku fwanina kunzihila. 19#Mil 25:11. Ngoboni oho Bayunda bakanine na kandikiziwile kunyepa ngayi mulandu wami ukayatishiwe kuli Nkeshali. Hinge noho nabulile shuma sha kuyatisha mushobo wami. 20Nibyo namihanini mukumimona na kwambola nenu. Ndaba namangiwi na mawenge awa ndaba ya kulumbeza kwa Ishalela.”

21Bakulwane ba Bayunda bamukumbwile ngayi, “Etu shilolo tutambule mañwati akufuma ku Yundeya akwamba byobe. Kami kowa ku bawushinda wetu, wezile kuno mu kututontwelela hinga kututongweza shuma sha shibi hahobe. 22Ngoboni shinene tukushinga kuyuvwa bihanganiko byobe, ndaba kuti na kuti bantu bakwamba bya kanzunga kenu.”

23Hohobene baliyuvwashanine nendi mutena, babengi bezile ku litala ekalile. Paulu wabalongeshelenga, kutatika lumenemene kukuma na ku mazolo na kubatontwelela bya Wene wa Nyambi. Ha ku batoyela mulao wa Moshesha na ku bamiluwe, wezekele ku bakoka ngayi ba kulupile Yeshu. 24Bamina bakulupilile ebye ambile, ngoboni bamo bakanine kukulupila. 25Oho baya bantu babulile kuliyuvwashana mukati kabo, pe bafumineho. Ngoboni shilolo bafumeho, Paulu wambile mazu awa kami ngayi, “Moyo wa Kuyela wambile shiwahe oho atongwezele bankakazenu kuli muluwe Ishaya ngayi, 26#Isha 6:9-10. ‘Yanga ku bantu ba mushobo ou,

ubatongweze ngayi, kuyuvwa mukayuvwa,

ngoboni kukayuvwishisha mufwako,

ku mona mukamona,

ngoboni kukamoneshesha mufwako.

27Ndaba mitima ya bantu aba yayikalu,

bakuzika matu abo kami banazimanana meho abo.

Kutina bamona na meho wabo,

na kuyuvwa na matu wabo,

na ku yuvwishisha mu mitima yabo,

na kutengulukila kukwami

ngayi ni ba nyongomanishe.’ ”

28Paulu wabatongwezele ngayi, “Limukenu ngayi Nyambi unapana kupuluka oku ku Bakamatunga. Nanibo bakayuvwa.” 29Paulu oho ambile mazu awa, Bayunda bafumineho na kulikananganisha shikuma.

30Paulu wekalile kuyo myaka yibili mu litala lyendi apatalilenga, kami wabatambwilenga shiwahe nimwabo bezilenga kukwendi. 31Washimikilenga bya Wene wa Nyambi na ku longesha bya Mwene Yeshu Kilishitu kwakubula muntu wamukanishile.

Currently Selected:

Milimo 28: LLK

Highlight

Compare

Copy