Baloma 1

1Ami Paulu mukamulimo wa Yeshu Kilishitu, wehaniwile ngayi enge ntumwana, wahatiwile ngayi ashimikile ncango zaziwahe za Nyambi.

2Ncango zaziwahe ziya Nyambi a kulupishile kupitila muli bamiluwe ngonehe byatikitiwa mu Mabuka akuyela. 3Ncango zaziwahe zikwamba bya Mwanendi ou Mwene wetu Yeshu Kilishitu. Mu shihemwa shendi sha wuntu, wengile muzukulya Ndavita, 4ngoboni na Moyo wa Kuyela waholokele na ngovu zazinene ngayi niye Mwana Nyambi oho ashangukile ku bafu. Yeshu Kilishitu mwene wetu. 5Mumwendi etu tunatambulu nceshe na wuntumwana ngayi twihane bantu nimwabo ba mu matunga mwanga ba kulupile, pe bombatale, ndaba ya lizina lyendi. 6Nanenu kami muli mukati ka baya anehana Nyambi ngayi benge Bakayeshu Kilishitu.

7Nohobene ninatikitili nimwenu muli mu Loma, bakakuhakiwa kuli Nyambi, baya anehana ngayi benge bakakuyela.

Mwanga Nyambi Tatiyetu na Mwene Yeshu Kilishitu bamipane nceshe na ku mwena.

Kulombela kwa kukambilila

8Ha kutatika, nikukambilila kuli Nyambi yami muli Yeshu Kilishitu ndaba yenu nimwenu, ndaba kukulupila kwenu kunayuvwaniki mu kaye nimwamo. 9Nyambi niye paki wami ngayi ebye nili na kwamba bya kupwisha, Nyambi ou nikutendela milimo ya ku shimikila ncango zaziwahe za Mwanendi na mutima wami nimwawo, halimuka ngayi namyanukanga 10shikati nimwasho oho nalombelanga. Nalombelanga kuli Nyambi ngayi mu shifungo shendi, mwanga ku mamaninino ancinkwilile nzila ya kwiza oko kukwenu sha wuluno. 11Ndaba nikushinga shikuma kumimona, ngayi tulitapile bishemo bya moyo, bya kumishumisha. 12Ngayi mwanga enu na nami tulishumishe hamo na kukulupila kwa umo na wamina. 13#Mil 19:21. Bawushinda, kushinga ngayi mwikale mu wulube nifwako, ndaba bikati byabingi ninashingi kwiza kukwenu ngoboni ninakwanganga kukuma na ku shikati shino. Nikushinga niteze mukati kenu kami, ngonehe ninateze kami mukati ka Bakamatunga bamina. 14Ami nili nanebye nafwanini kutenda ku bantu nimwabo, ku bakakulilongesha na ku baya banabulu kulilongesha, ku bakakukeya na bakakuyeba. 15Nohobene niho nikushinga kami kwiza na ku shimikila ncango zaziwahe kukwenu muli mu Loma.

Ngovu za ncango zaziwahe

16 # Mako 8:38. Lisheni nifwalyo ku ncango zaziwahe ndaba nizo ngovu za Nyambi za kupulwisha muntu nimwendi ukukulupila, kutatika taha ku Bayunda niho ku Bakamatunga. 17#Hamba 2:4. Ndaba mu ncango zaziwahe, kwoloka kukufuma kuli Nyambi kunamoneke. Nikwo kwoloka kuya kwezanga na kukulupila, kufuma ku kutatika kutwala ku mamaninino, ngonehe kwatikitiwa ngayi, “Bakakwoloka kukufuma kuli Nyambi, bakayoya na kukulupila.”

Mulandu wa bantu nimwabo

18Ndaba wukali wa Nyambi unaholoko kufuma muyilu, unezi na kulwisha wubi nimwawo na kutengama nimwako kwa bantu aba ba kukanisha ngayi kupwisha kuholoke ndaba ya kutengama kwabo. 19Ndaba bya Nyambi ebye byafwanina kulimukiwa, nibo babilimuka shiwahe, ndaba Nyambi unabamoneshebyo. 20Ndaba kufuma kukulengiwa kwa kaye, byuma bya Nyambi bya kubula ku moneka, ngovu zendi za mwaya myaka na Wunyambi wendi, binamoneke shiwahewahe mu byuma biya alengele. Nohobene, bantu kowa ebye ba kutwesha kuliyawila. 21#Efwe 4:17-18. Hinge ndi balimukile Nyambi, kaliha bamupanine maleema ngayi niye Nyambi, kami kaliha bamukambililile. Ngoboni bihanganiko byabo byengile bya kubenkanya, kami mitima yabo yashipile. 22Hinge ndi baliyemezele ngayi nibo bakangana, bafutukile bakubula ngana. 23#Nday 4:16-18. Balehele kulemesha Nyambi wakubula ku bola, pe balemeshele bifwekesha bya kufweka muntu uya wabolanga na tuyoni na tunzama twa mawulu anaa na biya byalikokanga.

24Nohobene Nyambi wabapanine ku mazilo a mahungu amu mitima yabo, pe batendele bya lisheni ku zinyutu zabo ku umo na wamina. 25Bashiyile kupwisha kwa Nyambi, pe bakonkele mahalo, balemeshele na kutendela milimo ebye alengele Nyambi kupitakana niye Shakalenga, uya ukuyemeziwa mwaya myaka! Ameni.

26Ndaba yanebye, Nyambi unabalehe ngayi bakonke mahungu wabo a lisheni, ndaba hinge bambuyama, banalehe shiheka sha shihemwa ha bya maluwo, bali na kutenda biheka byashenge. 27Na balume kami banalehe kwambola na bambuyama ngo mu shiheka sha shihemwa, bali na ntukumina ya mahungu ku umo na wamina. Mulume na mulume bali na kutenda bya lisheni ku umo na wamina. Nohobene ndaba bali na kutenda bya kuluwa, bakatambula kashushwilo kanabafwanini.

28Ndaba baya bantu bakanine ku yuvwishisha kupwisha kwa Nyambi, Nyambi wabalehele ngayi bakonke bihanganiko bya kukontama ngayi mwanga batende byuma bya kubula ku fwanina. 29Banenzala na bya kutengama nimwabyo na bya wubi na mutongo na lwiholwiho. Banenzala na mwili na mponde na nkani na likeyelela na nzimbo. Bakakatungwila, 30kami bakakwamba byabibi ha baminabo, bakakuzimba bya Nyambi, bakalihandu, bakakuliyemeza na kulilundumika. Bakakuhanganika zinzila za kutatika kutenda byabibi, bakakubula kwombatala bahemi babo. 31Bakakubula ku yuvwishisha, bakakubula kutenda ebye banakulupishi, bakakubula nceshe, kami bakancili. 32Hibalimuka ngayi mazu a Nyambi akwamba ngayi bantu ba kutenda byuma bya noho, ba ku fwanina kufwa. Ngoboni hinge ndi hibalimuka, kaliha ba kutenda tuhu ebye byuma, ngoboni ba kuyamiziza baminabo baya ba kutenda byuma bya noho.

Currently Selected:

Baloma 1: LLK

Highlight

Compare

Copy