Baloma 10
10
1Bawushinda, bifungo bya mutima wami na kulombela kwami kuli Nyambi ngayi Baishalela mwanga bapuluke. 2Ndaba nikubapakila ngayi bali na shizundami kuli Nyambi, ngoboni kaliha shizundami sha kalimukisho. 3Ndaba shilolo balimuke nzila iya Nyambi akwolokesha nayo bantu kukwendi, nohobene, banalishingili nzila yabo nibo bamwine, pe banabulu kwombatala nzila ya Nyambi iya akwolokesha nayo bantu. 4Ndaba Kilishitu niye mamaninino a ndayano ngayi mwanga muntu nimwendi ukukulupila, enge wakwoloka kuli Nyambi.
Kupuluka kwa bantu nimwabo
5 #
Bal 18:5. Moshesha watikitile bya kwolokeshiwa kuli Nyambi hakwombatala ndayano ngayi, “Muntu ukutenda ebye byuma, ukayoya nabyo.” 6#Nday 30:12-14. Ngoboni kwoloka kukufuma ku kukulupila kukwamba ngayi, “Hinga wamba mu mutima wobe ngayi, ‘Yani ukaya Muyilu?’ ” (Ebye binengi bihanganiko bya kuleta Kilishitu hanci). 7Hinge kwamba ngayi, “Yani ukakunkulukila mu litunga lya ku nceto?” (Ebye binengi bihanganiko bya ku shangula Kilishitu ku bafu.) 8Haya bili na kwambiwa ebye, ngayi, “Lizu lya Nyambi lili hahepi na nobe, lili mu kanwa kobe na mu mutima wobe.” Elye nilyo lizu lya ncango za kukulupila, eze tu ku shimikila. 9Ndi ukwitabila na kanwa kobe ngayi Yeshu niye Mwene, pe hiwukukulupila mu mutima wobe ngayi Nyambi wamushangwile ku bafu, ukapuluka. 10Ndaba muntu wakulupilanga na mutima wendi, pe Nyambi ha kumwolokesha, kami wetabilanga na kanwa kendi, pe ha kupuluka. 11#Isha 28:16. Ndaba byatikitiwa bikwamba ngayi, “Nimwendi ukakulupila mumwendi, kukayuvwa lisheni wufwako.” 12Ndaba kowa kutapuluka mukati ka Bayunda na Bakamatunga, ndaba Nyambi niye Mwene wa bantu nimwabo, kami wapananga mfuywezi zazingi ku nimwabo bakwihana kukwendi. 13#Yowe 2:32. Ngonehe kwatikitiwa ngayi, “Nimwendi ukwihana ha lizina lya Mwene ukapuluka.”
14Haya bantu bakehana nahiti ou banabulu kwitabila? Pe baketabila nahiti kuli ou banabulu kuyuvwa byendi? Kami bakayuvwa nahiti byendi ndi kowa mukakushimikila? 15#Isha 52:7. Pe bantu bakashimikila nahiti ndi kowa wakubatuma? Ngonehe kwatikitiwa ngayi, “Enga amawahe mawulu a baka ku shimikila ncango zaziwahe.” 16#Isha 53:1. Ngoboni kaliha ngayi bantu nimwabo banatambulu ncango zaziwahe. Ndaba Ishaya wambile ngayi, “Mwene, yani unetabili ncango zetu?” 17Nohobene kukulupila kwezanga ndi muntu unayuvwu ncango, kami muntu wayuvwanga ndi kuli baka ku shimikila ncango za Kilishitu.
18 #
Nyi 19:4. Ngoboni nikwipula ngayi kati kaliha bayuvwile ndi? Byo, bayuvwile, ngonehe kwatikitiwa ngayi,
“Mazu abo anapanzanini hano hanci nimwaho,
ebye banamba binakumu ku mamaninino a kaye nimwamo.”
19 #
Nday 32:21. Nikwipula kami ngayi kati bantu ba Ishalela kaliha bayuvwishishile ndi? Ha muntanzi Moshesha wambile ngayi,
“Nikaliyavwisha bantu bakubula mukoka,
mwanga bakamiyuvwishe lihungu.
Kami nikaliyavwisha litunga lya bantu bakubula ngana,
mwanga bakapilamishe bantu bami.”
20 #
Isha 65:1. Ishaya kami wambile na kukanca ngayi,
“Bantu baya babulile kuncinga nibo bangwanine,
naliholwele ku baya babulile kunyipula.”
21 #
Isha 65:2. Ngoboni kuli Ishalela wambile ngayi, “Natandubulu maboko ami mutena nimwawo ku bantu bakubula kwombatala bakakundwisha.”
Currently Selected:
Baloma 10: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
