Baloma 9
9
Nyambi na bantu bendi
1Nikwamba kupwisha muli Kilishitu, kwamba mahalo nifwako, shikeketima shami shili na kumpaka mu Moyo wa Kuyela 2ngayi nili na lisheni lyalinene shikuma na makalikiza a kubula kumana mu mutima wami, 3ndaba ya bawushinda, bantu ba mushobo wami nikushinga kwinga wakukutiwa kuli Nyambi, ngayi nitapuluke kuli Kilishitu. 4#Kut 4:22. Aba nibo Baishalela, aba Nyambi ahatile kwinga bana bendi, walimamine nabo niho abapanikile wuwahe, pe wabapanikile mulao. Banalimuku kulemesha mu kupwisha kami banatambulu bikulupisho bya Nyambi, 5nibo bazukulu ba batatizetu, kami Kilishitu wahemuwilile mu lupashi lwabo. Nyambi uli hayilu ya byuma nimwabyo, ayemeziwe mwaya myaka. Ameni.
6Kaliha nikwamba ngayi ndayano za Nyambi zinakwangana. Ndaba ngayi kaliha bantu nimwabo bahemuwa ku mushobo wa Ishalela banengi Baishalela ba kupwisha. 7#Shit 21:12. Hinga bazukulu ba Abulahama, kaliha banengi bana ba Nyambi nimwabo. Ngoboni Nyambi wambile kuli Abulahama ngayi, “Muli Ishaki nimo ukawana bazukulu na ku kulupishile.” 8Kaliha ngayi nimwabo bana ba Abulahama banengi bana ba Nyambi byo, ngoboni bana ba shikulupisho nibo ba kulabiwa ngayi bazukulyendi. 9#Shit 18:10. Ndaba Nyambi wakulupishile ngayi, “Nikaboka ha shikati eshe, kami Shala ukabeleka mwana.”
10Kami kaliha eshe tuhu, ngoboni bana babili ba Lembeka bekalile na tatiyabo umo, nkaka yetu Ishaki. 11Ndaba aba bambuyu oho shilolo bahemuwe, kami oho shilolo batende shuma shashiwahe hinge sha shibi, shengile shifungo sha Nyambi ngayi biya anashingi bitendiwe, byatendiwile kaliha ndaba ya milimo ya muntu ngoboni ndaba Nyambi unamwihana. 12#Shit 25:23. Pe Nyambi watongwezele Lembeka ngayi, “Wa mukulwane ukatendela milimo wa kanuke.” 13#Mala 1:2-3. Ngonehi kwatikitiwa ngayi, “Yakobo namuhakile, ngoboni Ishau namuzimbile.”
14Haya tukamba bishini? Kati tukamba ngayi Nyambi wakatapulula ndi? Byo, kaliha noho. 15#Kut 33:19. Ndaba wambile kuli Moshesha ngayi, “Nikekala na nceshe kuli ou nikayuvwila nceshe, kami nikekala na shikeketima kuli ou nikayuvwila shikeketima.” 16Nohobene shuma shashinene kaliha ebye muntu akushinga, hinge ebye muntu akutenda, ngoboni shinene nceshe za Nyambi. 17#Kut 9:16. Nehi kwatikitiwa ngayi Nyambi watongwezele Mwene Fwalo ngayi, “Nakwingi mwene, ngayi nimoneshe ngovu zami, kami ngayi lizina lyami litumbalale hano hanci nimwaho.” 18Nohobene Nyambi uli na nceshe kuli ou a kuyuvwila nceshe, kami ukukaluhisha mutima wa nou akushinga kukaluhisha.
Wukali na nceshe za Nyambi
19Kampe wamina ukunyipula ngayi, “Ndabangani Nyambi ashili kutunyanca? Kati yani unakana shifungo sha Nyambi?” 20#Isha 29:16; 45:9. Ngoboni obe uli muntu tuhu, obeyani uli na kukanangana Nyambi? Kati nyungu ya lima yikamba kuli ou wayibumbile ngayi, “Bishini wantendele nehe?” 21Mukakubumba zinyungu uli na ngovu za kuliyavwisha liya lima, ukutwesha ku bumbaho zinyungu zibili, ukubumbaho nyungu ya kuliyavwisha bikati byamina na nyungu ya kuliyavwisha bikati nimwabyo.
22Na Nyambi kami nisho ali. Washingile ku monesha wukali wendi na kulimukisha ngovu zendi. Ndaba ya noho walehelele na kutatilila shikuma bantu aba apilaminine, aba bafwaninine kunonga. 23Nyambi washingile ngayi wuheti wawuwahe wendi wawingi ulimukiwe kukwetu etu ayuvwilile nceshe, etu awahishile mwaka ngayi tutambule wuwahe wendi. 24Ndaba etubene Nyambi anehana, kaliha ku Bayunda tuhu, ngoboni kami na ku Bakamatunga. 25#Hosh 2:23. Nehi Nyambi ambile kuli Hoshiya ngayi,
“Aba babulile kwinga bantu bami
nikabatumba ngayi, ‘Bantu bami.’
Litunga nabulile ku haka,
nika litumba ngayi, ‘Lya kuhakiwa.’
26 #
Hosh 1:10. Kami kuya babatoyele ngayi, ‘Enu kaliha muli bantu bami,’
niko bakatumbiwa ngayi, ‘Bana ba Nyambi wakuyoya.”
27 #
Isha 10:22-23. Ishaya kami wabilikizile bya Ishalela ngayi, “Baishalela hinge bakekala babengi ngonehe lihekelela lya liwate, ngoboni mashaliza tuhu nibo bakapuluka, 28ndaba Mwene ukayata bantu hano hanci. Kami u ka tenda sha wangu wangu na ku manishilila.” 29#Isha 1:9. Nehi ambile Ishaya mwaka ngayi, “Shinga Nyambi wa Makunge wabulile kutu shiyilako mashaliza a bantu bamo, pe shinga twafwekele ngonehe Shondoma na Ngomola.”
Paulu ukulombelela Ishalela
30Haya tukamba bishini? Twambe ngayi Bakamatunga baya babulile kukonkezeka kwoloka, banawana kwoloka, ndaba ya kukulupila. 31Baishalela bezekele kwinga bakulunga ha kukonka mulao, ngoboni bakwangile. 32#Isha 28:16. Ndabangani? Ndaba kaliha bashingile kuwahililisha Nyambi na kukulupila, ngoboni bahanganikile ngayi ba kutwesha kumuwahililisha Nyambi na milimo. Bapukalile ha “limanya lya kupukalisha,” 33nehi kwatikitiwa ngayi,
“Monenu, nikulangika mu Ziyoni
limanya likapukalisha bantu,
na limanya likabawisha.
Nimwendi ou ukakulupila mumwendi
kukayuvwa lisheni wufwako.”
Currently Selected:
Baloma 9: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
