Zincimpi 25
25
Zincimpi zimina za Sholomoni
1Eze kami zinengi zincimpi za Sholomoni batikitile bantu ba mwene Hezekiya wa litunga lya Yunda.
2Wenga wuwahe wa Nyambi wakuholeka byuma,
ngoboni wuwahe wa bamyene wenga wakufwatula byuma.
3Nehi mayilu ekala kwakutali shikuma na hanci henga ha kunonka,
nisho kami yekala mitima ya bamyene,
kowa ukutwesha kufwatula byuma mu mitima yabo.
4Fumisha makango ku shiliva,
pe muka kufula ukawanaho ebye akafula.
5Fumisha wakuluwa ku meho a mwene,
pe litanda lyendi likazikiwa mukwoloka.
6Hinga ulikatula ku meho a mwene,
hinge kwimana muya bemananga babalemu.
7Ndaba shenga shashiwahe kutongweziwa ngayi, “Yeka wikale kuno,”
kupitakana ku shepeshiwa ku meho a mwene.
8Hinga unyankupila ku nkuta ha shuma unamono na meho wobe,
ndi paki wamina akuwana ngayi uli na mulandu, haya ukatenda nahiti?
9Ndi obe na ndambo yobe mwalishempe ku mazu,
shimanishenu mukatikenu hinga mukaholola bya kuwi.
10Ndelewa muntu nimwendi ukatosha ngayi kulama bya kuwi mufwako,
pe mpupo yenu yayibi kukamifuma yifwako.
11Lizu linambiwi shiwahe,
linafweke ngo mukabo wa ma apulu wafwikiwi na ngolinde mu shikwatilo sha shiliva.
12Ngonehe kambalamunwe ka ngolinde,
hinge mukali wawuwahe wa ngolinde yayiwahe ya muno mukaye ka bantu ba kushipa,
linengi lizu lya ngana lya kutengulula baya ba kuyuvwako.
13Linafweke ngo mbundu yaletanga kubombola shikati sha kuteza,
unengi ngo ntumwana wa kupwisha ku baya banamutumu,
watulishanga mutima bahekulyendi.
14Muntu wakuliyemeza na shiya anabulu kupana,
unafweke ngo makumbi na mpepo bya kubula mvula.
15Ku mwena na lunzewe bikutwesha kukandamika kalela,
kami nyambilo yayiboto yikutwesha kutengulula muntu wamukalu mutima.
16Ndi unawana wushi, lyaho kwezekesha na livumo lyobe,
kutina kuwu luka ndi ukuwulya shikuma.
17Hinga uvulishako myanza ku litala lya ndambo yobe,
ndelewa ukakuzimba ndi wakunyikwakale.
18Muntu waku bangila ndambo yendi bya mahalo, unafweke ngo muwana wakunzita,
hinge mpoko ya mukwale hinge muvwi wawutwe.
19Kukulupila muntu wakubula kupwisha ha bikati bya makando,
shinafweke ngo liyewe lya ku bola hinge liwulu lya kushonkonoka.
20Muntu ukwimbila lwimbo ku muntu uli mu wukalu,
unalifweke nanou ukuvula shivwalo shendi ha mutena wa mashika,
nanou ukuyaka mululwe ha shitombo.
21Ndi mukankole wobe uli na nzala,
mupane bya kulya alye, ndi uli na linyontwa, mupane mema anwe.
22 #
Lom 12:20. Ndaba ndi ukwinga noho, ukabungika mashanga a mundilo ha mutwe wendi,
pe Nyambi ya Ngula ukakupana ncuungu.
23Lulimi lwa katungwila lwapilamishanga,
nehi mpepo yaku ncelele yaletanga mvula.
24Shashiwahe kwikala mu nkomi kuyilu ya litala
kupitakana kwikala mu litala limo na mbuyama wa kanwa.
25Kutambula lushango lwa lu wahe ku litunga lya kwakutali,
shinengi shuma shimo ngonehe mema a kubombola ku muntu nafu linyontwa.
26Ngonehi kaheloke ka mema kanenzala ndoba na lishima likwikala na mema amabi,
shinengi shuma shimo ku muntu wakulunga ukupana nzila ku muntu wakuluwa.
27Kaliha shashiwahe kulya wushi wawingi,
nehi kami muntu ukulinenehesha niyemwine.
28Muntu wakubula kukwata mutima,
ukufweka ngo munzi wawunene ou mamota wawo bananyemunu na kuwu shiya nahiya.
Libuka Lya Kuyela © Bible Society of Zambia, 2020.