Zincimpi 24
24
Kushiwulula 19
1Hinga uyuvwila mwili bantu bababi,
hinge kwikala na nyumwa nabo hamo,
2ndaba bifungo byabo bya kutenda mishunga,
kami mivumbo yabo ya kwamba bya kutenda wukalu.
Kushiwulula 20
3Litala lyazikiwanga na ngana,
kami lyazikiwanga na ku yuvwishisha.
4Kuli kalimukisho tumpenci twenzalanga na wuheti
na byuma nimwabyo bya kuwahilisha.
Kushiwulula 21
5Muntu wangana wenga wakushuma shikuma kupitakana muntu wa ngovu,
kami muntu wa kalimukisho na pitakana muntu wa nyala,
6ha kuya mu kulwa nzita ukushinga kutwamininiwa,
ndaba kuli kukona kuya kuli bakakubela babengi.
Kushiwulula 22
7Ku muntu wakuyeba byuma bya ngana shashikalu kubiyuvwishisha.
Kutwesha kuliwana na kanzunga ka bakulwane wufwako ku lipangati lya munzi wawunene.
Kushiwulula 23
8Muntu wayongolanga kutenda byabibi
ukatumbiwa mukakuleta wukalu.
9Bihanganiko bya wakuyeba byenga byabibi,
kami muntu wa wuncengwe wenga wa wunyengwe ku bantu.
Kushiwulula 24
10Ndi ukupukala ha shikati sha wukalu,
pe nyala zobe zenga zazishe.
Kushiwulula 25
11Lamwina bantu bali na kutwaliwa ku lufu,
kami kwata obo bali na kutalyangila kuya mu kuzihiwa.
12Ndi ukwamba ngayi, “Kaliha twashilimukile,”
Kati ou walamanga mutima ku shimona wufwako ndi?
Kati ou walamanga moyo wobe kulimuka wufwako ndi?
Kati niye kukabweshela muntu kwezekesha na milimo yendi wufwako ndi?
Kushiwulula 26
13Mwanami, lyanga wushi ndaba wenga wawuwahe,
kami mwenzu wa mulikanza wenga wawutobe.
14Limuka ngayi ngana zenga zaziwahe munyinkalo yobe,
ndi ukuziwana pe ukekala shiwahe kumbili ya matena,
kami kulumbeza kwobe kukamana kufwako.
Kushiwulula 27
15Obe muntu wakuluwa, hinga wongeza kubelamina ku litala lya muntu wakulunga,
hinga uleta mishunga ku litala lyendi.
16Hinga ndi wakulunga wawanga mutanu na kabili, pe ha kukatukamo kami,
ngoboni bantu bakuluwa bakekala mu makando.
Kushiwulula 28
17Hinga uwahilila oho mukankole wobe akupukala,
kami mutima wobe hinga uwahilila oho akutalangila.
18Nyambi ya Ngula amonasho ukapilama,
pe ukalehasho kumushushula.
Kushiwulula 29
19Hinga utina ndaba ya bakakutenda byabibi,
kami hinga ulishoza bya bakuluwa,
20ndaba mukakutenda byabibi kukekala shiwahe kumbili wufwako.
Lumuni lwa bantu bakuluwa lukazimiwa.
Kushiwulula 30
21Mwanami, yuvwila Nyambi ya Ngula na mwene bowa.
Kami hinga ulifungila na bantu bakakufutulukila,
22ndaba bali na ngovu za kuleta makando sha wanguwangu,
kami kowa walimukanga malwa aya afumanga kuli Nyambi ya Ngula na mwene.
Zinyambilo Zamina za Ngana
23Ezi kami nizo zinyambilo zamina za bantu bangana.
Kuyata na shihota kaliha shenga shashiwahe.
24Nimwendi ukwamba ku muntu wakuluwa ngayi, “Mulandu wufwawo.”
Ukakutiwa ku bantu na kuzimbiwa mu matunga.
25Ngoboni nimwabo ba kushushula muntu wakuluwa bakawahilila,
kami bakawana mfuywezi zazinene.
26Muntu ukukumbula shiwahe,
ukwinga ngo ukukuzupeza mu liboko#24:26 Liboko: Mu Shihebelu shihemwa shabo ku zupeza ha mivumbo..
27Wahisha mulimo wobe wa ha munkanda,
tenda mulimo wobe shiwahe ku mafuba, nohoboni uzike litala lyobe.#24:27 Nguli yikutontolola ngayi yongola bya kumbili mwanga ukayoyeleho.
28Hinga ubangila ndambo yobe byambo kwakubula mulandu,
kami hinga wongeza.
29Hinga wamba ngayi, “Nikamutenda ngonehe anantende,
nikabweshela kukwendi ebye anantende.”
30Napitile ku mfuba ya muvwa,
ku mfuba ya shinyanca ya muntu wakubula ngana,
31nimwayo yakupukile na mihongela.
Nimwamo mwekalile nkululumbe,
kami liyo limota lya mamanya lyanyemukile.
32Nahanganikile shikuma kunebye namonene,
kami nalilongeshele hanebye namonene.
33Ashulubaleko taha, akatulukeko shashishe,
na kulivunga maboko kukwanguluka shashishe.
34Oho muvwa ashili kulangana, wuncepwe ukamushintikiza,
ngonehe mwizi uli na bilwisho.
Libuka Lya Kuyela © Bible Society of Zambia, 2020.