Kulaba 24
24
1Oho Mbalaamu amonene ngayi Nyambi ya Ngula washingile ngayi afuywele bantu ba Ishalela, nohobene kaliha wayile mu kupenza ku bilubwilisho ngonehe atendele ha kutatika. Watengulukilile kulwa libelelengwa 2kami Mbalaamu wamonene bantu ba Ishalela banatulu, mushobo na mushobo. Pe moyo wa Nyambi wezile hahendi, 3pe wambile ngayi,
“Lizu lya Mbalaamu mwana Mbeyola,
mazu a muntu ou ukutwesha ku mona shiwahe,
4Ou ukutwesha kuyuvwa ebye ali na kwamba Nyambi,
ou uku mona bimono bya Nyambi Mpandashilanga,
ou ukuwila hanci ngo unafu,
ngoboni meho wendi akutona na ku mona nimwabyo.
5Zintanda za Yakobo zinengi zaziwahe,
na minkungwa yobe, obe Ishalela yayiwahe,
6Ngonehe zimbuwa zinatandubuku,
hinge mafuba a kunkumo ya mushinzi,
ngonehe lilambwe liya akunine Nyambi ya Ngula,
hinge ngonehe mitondo ya shinda kunkumo ya mushinzi.
7Nibo bakekala na mvula wamwingi,
pe bakakuna mbuto yabo ku mafuba alokelanga mvula shiwahe.
Mwene yabo ukenga wamunene shikuma kupitakana Angange,
pe kulela kwendi kukakuma kwakutali na kuneneha.
8Nyambi wabafumishile ku Engepita,
ukubalwila ngonehe libongwe wa ngombe wa lishaka.
Pe ba kuvwota bamalamo babo ba matunga,
kucancola bifupa byabo,
na kupokozola mivwi yabo.
9 #
Shit 49:9. Mukoka ukufweka ngonehe shimbwi wa ngovu,
oho akulangana yani ukutwesha kumuholela na kukanca kumutonesha.
Muntu nimwendi wakufuywela Ishalela,
naniye kami ukenga wakufuyweliwa.
Pe muntu nimwendi wakukuta Ishalela,
naye kami ukenga wakukutiwa.”
10Mbalaki wakamine mu maboko na wukali pe wambile kuli Mbalaamu ngayi, “Nakwihanina ku kuta bamalamo bami, ngoboni bikati ebye bihatu unabafuywele. 11Haya boka kukwenu! Nakukulupishile kukupana ncuungu, ngoboni Nyambi ya Ngula unakuyawishi kutambula ncuungu.”
12Mbalaamu wakumbwile Mbalaki ngayi, “Natongwezele miluwe eye watumine kukwami ngayi 13hinge shinga ndi Mbalaki wampanikile shiliva na ngolinde mu musheke wobe nimwawo, shinga kutwesha kubula kwombatala ndayano za Nyambi ya Ngula nifwako na kutenda shuma shamina amimwine. Nikamba tuhu ebye Nyambi ya Ngula anantongweze kwamba.”
Kwamba kwa Mbalaamu kwamamaninino
14Mbalaamu wambile kuli Mbalaki ngayi, “Haya nili na kuboka ku bantu bami, ngoboni oho shilolo niye, nili na kukubela ebye bakatenda kumbili bantu ba Ishalela ku bantu bobe.” 15Niho alubulwile ngayi,
“Lizu lya Mbalaamu mwana Mbeyola,
mazu a muntu ou ukutwesha ku mona shiwahe,
16Ou ukutwesha kuyuvwa ebye akwamba Nyambi,
na kutambula kalimukisho kaya kakwiza ka kuli Wakukangana.
Ou uku mona bimona bya Nyambi Mpandashilanga,
ou ukuwila hanci ngonehe muntu unafu,
ngoboni meho wendi akutona ku mona byuma nimwabyo.
17Pe niku mona ebye bikwiza kumbili,
niku mona mwene ukeza,
ngoboni kaliha uli kwakutali,
Niye ukulifweka na lunyenye lwa kubyazima,
ukapinduka kuli Yakobo,
munyingo ukemikiwa mu Ishalela.
Ukakoma bakakutwaminina Bamowambi
na kukoma bantu nimwabo ba ku Sheta.
18Ukakoma bamalamo bendi mu Endoma,
na bamalamo bendi bamu Sheya kami bakakomiwa,
aha Ishalela ashili kuzamina kuya na kukoma.
19Mukoka wa Yakobo ukabalyatangilila hanci na kulobesha baya bakashala mu munzi.”
20Niho mu shimonekesho shendi Mbalaamu, wamonene Baamaleki pe wambile ngayi,
“Ameleki wengile mukoka wa ngovu shikuma,
kupitakana mishobo nimwayo,
ngoboni ha kukotoka niwo ukaloba peluu.”
21Mu shimonekesho shendi Mbalaamu wamonene Bakeneta, pe walubwilile ngayi,
“Ku mwanya ou mukwikala niwo wakupulukila,
uli shiwahe ngonehe lihwa lyekala hayilu ya mwata wa limanya,
22Ngoboni enu Bakeneta mukalobeshiwa,
oho Baashiliya bakamitwala mu wuntapwa.”
23Mbalaamu wambile ngayi,
“Kati bayani aba bakekala na wumi,
ndi Nyambi ukatenda ebye nimwabyo?
24Bakakukatukila mutakwe bakafuma ku bibumbo bya Kitimu mu mato,
bakakoma Ashiliya na Emba,
ngoboni nibo kami bakaloba nimwabo.”
25Niho Mbalaamu akatukile pe wabokele kukwabo na Mbalaki wayile kukwabo.
Libuka Lya Kuyela © Bible Society of Zambia, 2020.