Kulaba 23
23
1Mbalaamu wambile kuli Mbalaki ngayi, “Ntendele tuula kuno mutanu na tubili, pe undetele bankunzi mutanu na babili na bikungwe ba bampongo mutanu na babili.”
2Mbalaki watendele ngonehe atongweziwile, pe Mbalaamu wakombelele nkunzi na shikungwe wa mpongo ha kaala na kaala. 3Niho Mbalaamu ambile kuli Mbalaki ngayi, “Yimana kuno ku nkombela yobe yakuhokesha, aha nishili kuya mu ku mona ndi Nyambi ya Ngula ukangwana. Nikakutongweza nimwabyo ebye akaholola kukwami.” Nohobene wayile ninkayendi ha mutwe wa lipili ha kayelele, 4niho Nyambi aliwanine nendi. Mbalaamu wambile kukwendi ngayi, “Natende tuula mutanu na bibili na kukombelela nkunzi na shikungwe wa mpongo ha kaala na kaala.”
5Nyambi ya Ngula watongwezele Mbalaamu ngayi, “Boka kuli Mbalaki na kumutongweza awa mazu.” 6Nohobene wabokele pe wawanine Mbalaki hinga emana ku nkombela yendi yakuhokesha, hamo na bakakutwamina ba ku Mowambi.
7Mbalaamu wambile ngayi,
“Mbalaki mwene waku Mowambi unandete kumfumisha ku Alamu,
ku mapili aku mushamuko wambile ngayi,
‘Yeka, unkutile Yakobo,
pe yeka unyambilile bya nkole ku bantu ba Ishalela.’
8Nikutwesha nahiti ku kuta aba anabulu ku kuta Nyambi ya Ngula?
Hinge kwambila bya nkole ku naba anabulu kwambila bya nkole Nyambi ya Ngula?
9Nikutwesha kubamona oho nemana hayilu ya mapili amatali.
Nikutwesha kubashembuka oho nili ha binkanda.
Banengi mushobo uya wazika ninkayawo,
ba kulimuka ngayi banengi mushobo
wakuhatiwa mukati ka mishobo yamina.
10Yani ukutwesha kulaba bazukulya Yakobo,
bakwinga ngo luhekelela!
Banengi babengi shikuma,
na kubula kutwesheka kulabiwa.
Ndehenu nifwe lufu lwa bantu ba Nyambi,
pe kufwa kwami,
kwinge kwa ku mwena ngonehe bantu baya bakulunga.”
11Niho Mbalaki ambile kuli Mbalaamu ngayi, “Ebye unatende kukwami bya nahiti? Nakulete kuno mu kunkutwila bamalamo bami, ngoboni nimwabyo ebye unatende binabatandalishi.”
12Wakumbwile ngayi, “Nikutwesha kwamba tuhu ebye Nyambi ya Ngula akuntongweza kwamba.”
Kwamba kwa Mbalaamu kwa wubili
13Niho Mbalaki ambile kuli Mbalaamu ngayi, “Tuyenga nimwetu ku mbalila yamina oku ukutwesha ku mona tuhu Baishalela bamo. Ukabankutwileko.” 14Wamutwalile ku mfuba ya Zofwimu, ha mutwe wa Lipili lya Pishinga. Kuyo kami niko akatendelele tuula mutanu na tubili na kukombelela nkunzi na shikungwe wa mpongo ha kaala na kaala.
15Mbalaamu wambile kuli Mbalaki ngayi, “Yimana kuno ku nkombela yobe yakuhokesha, aha nishili na kuliwana na Nyambi kuyo.”
16Nyambi ya Ngula wawanine Mbalaamu na kumutongweza bya ku fwanina kwamba ngayi, “Boka kuli Mbalaki eshe nisho ukafwanina kwamba.” 17Nohobene, wabokele pe wakawanine Mbalaki ushili kwimana ku nkombela yendi yakuhokesha na bakakutwaminina ba ku Mowambi. Mbalaki wepwile eshe ambile Nyambi ya Ngula, 18niho Mbalaamu atatikile ngayi,
“Yuvwilila Mbalaki, yuvwilila kunebye nikwamba.
Yuvwilila ku mazu wami, obe mwana Zipola.
19Nyambi kaliha wenga ngonehe muntu,
ngayi niye ongeze,
Kaliha ngonehe muntu ou wafutulanga bihanganiko byendi.
Nimwabyo akulupishanga, wabitendanga,
ebye ambanga, ndele bitendiwe.
20Mona, ami banantongweze kufuywela,
kami oho Nyambi akufuywela,
ami kutwesha ku kuta nifwako.
21Niku mona ngayi kumbili ya Yakobo kutamwa ufwako,
hinge kukalikiza mu bantu ba Ishalela.
Nyambi yabo uli hamo nabo,
ba kubilika ngayi, ‘Niye nengi mwene yetu.’
22Nyambi unabafumishi mu Engepita,
ukubalwila ngonehe libongwe wa ngombe wa lishaka.
23Kowa wulozi hinge makuta bikatwesha kulwisha Yakobo,
hinge kubuka kufwako kukalwisha mukoka wa Ishalela.
Haya bantu bakashimoka habya Yakobo na Ishalela ngayi,
‘Monenu taha ebye Nyambi anabatendele!’
24Mukoka wa Ishalela ukufweka ngo shimbwi wa ngovu ukupinduka,
pe, ukulipukumuna ngonehe shimbwi,
kukatala ufwako hantu unakankulu na kuvwota,
hantu unanu mukeza wa nobo anazihi.”
25Niho Mbalaki ambile kuli Mbalaamu ngayi, “Unakana ku kuta bantu ba Ishalela, haya hinga ubafuywela taha.”
26Mbalaamu wakumbwile Mbalaki ngayi, “Kati kaliha na kutongweza ngayi nafwanina kutenda byuma nimwabyo ebye Nyambi ya Ngula akuntongweza ndi?”
Kwamba kwa Mbalaamu kwa wuhatu
27Mbalaki wambile kuli Mbalaamu ngayi, “Tuyenga nimwetu hamo, pe nika kutwala ku mwanya wamina. Kampe ndi Nyambi uketabila ngayi ukabankutwileko.” 28Nohobene Mbalaki washimbile Mbalaamu na kumutwala hayilu ya Lipili lya Peyola, elye lya lipenza na libelelengwa. 29Mbalaamu wambile kuli Mbalaki ngayi, “Ntendeleko tuula mutanu na bibili, pe undetele bankunzi mutanu na babili na bikungwe bya bampongo mutanu na babili.” 30Mbalaki watendele ngonehe amutongwezele Mbalaamu, pe wakombelele nkunzi na shikungwe wa mpongo ha kaala na kaala.
Currently Selected:
Kulaba 23: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.