Balevi 1
1
Zinkombela za ku fwanina kuhokesha za nzimba
1Nyambi ya Ngula niho ehanine Moshesha, wambile kukwendi kufuminina mu Ntanda ya Kuliwanina ngayi, 2“Tongweza Baishalela ngayi, oho muntu hakati kenu akupana ntupu kuli Nyambi ya Ngula, wafwanina kupanika kufuminina ku bimuna alinabyo nehe ku zingombe na bambelele.
3“Muntu nimwendi ukutupula nkombela ya shimuna, wafwanina kutupula nkunzi wakubula muhendo. Uku fwanina kumuleta ku menginino a Ntanda ya Kuliwanina, ngayi atambuliwe ku meho a Nyambi ya Ngula. 4Pe akayake liboko lyendi hayilu ya mutwe wa nou nkunzi, yikenga nkombela ya ku mu kuliza.
5“Niho akazihe uya nkunzi ya nkombela ku meho a Nyambi ya Ngula, niho bakankombela bana ba Aloni bakashimba mukeza na kuyitila uya mukeza kuzingwilisha kaala kali ku shipana sha Ntanda ya kuliwanina. 6Niho ukayuba uya kayamana na kumuketozola kutenda bituntula. 7Pe bakankombela bana ba Aloni bakawahisha nkuni na kuyibika mundilo. 8Niho bakankombela bana ba Aloni bakayaka biya bituntula na mutwe, hamo na mazi, babiyake ha nkuni za mundilo zili ha kaala ka mamanya. 9Ngoboni bayoweshe bya mu livumo na mawulu a kayamana na mema. Mukankombela ukahokesha nimwabyo ha kaala, kwinga nkombela ya kuhokesha, ntupu ya kutupula ha mundilo, livumba lya neye nkombela likuwahililisha shikuma Nyambi ya Ngula.
10“Ndi ntupu yendi yikafuma ku litanga lya bambelele hinge ku bampongo, wafwanina kutupula shikungwe wakubula muhendo. 11Akamuzihile ku ncelele ya kaala ku meho a Nyambi ya Ngula na bakankombela bana ba Aloni bakayitila mukeza kuzingwilisha kaala. 12Muntu ukaziha kayamana, ukamuketula bituntula na mutwe wendi na mazi wendi, pe mukankombela ukabiyaka ha nkuni zili ha kaala. 13Pe bya mukati na mawulu bakabiyoweshe na mema. Pe mukankombela ukatupula nimwabyo na kubiyoha ha kaala, yikenga nkombela ya kuhokesha, nkombela ya ha mundilo, likututwitisha livumba lyaliwahe kuli Nyambi ya Ngula.
14“Ndi ntupu yendi kuli Nyambi ya Ngula inengi nkombela ya kuhokesha tuyoni, pe uku fwanina kukombelela nkombela ya katela hinge nkilimba. 15Niho mukankombela uku fwanina kutuleta ku kaala naku tukondolola mukoshi na kutu yoha ha kaala, mukeza wato ukayitiwila kunkumo ya kaala. 16Mukankombela ukafumisha lihakwilo na mahako wato na kubiyumbila ku mushamuko wa kaala, ku mwanya wa mutoko. 17Ukakakwata ku mbando zako na kukatabula hakati kwakubula kukacancozola nimwako. Pe mukankombela ukakahokesha ha kaala, ha mundilo uli ha nkuni, yinengi ntupu ya kuhokesha ha mundilo, yikututwisha livumba lyaliwahe kuli Nyambi ya Ngula.”
Currently Selected:
Balevi 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
