Balevi 2
2
Ntupu ya mpeka
1“Muntu nimwendi ukuleta ntupu yendi ya mpeka kuli Nyambi ya Ngula, ntupu yendi yafwanina kwinga ya muhunga wakulembuka, ukayitilaho mazi a olive na incence, 2bakayitwale kuli bakankombela bana ba Aloni. Pe ukashimbaho muhunga umo liboko lya kwinzala na mazi na incence na mukankombela ukahokeshabyo kwinga mbalila ya shanukisho ha kaala, ntupu ya kuhokesha, yikatutwisha livumba lyaliwahe lya kuwahililisha Nyambi ya Ngula. 3Pe ntupu ya mpeka yikushalaho yikenga ya Aloni na bana bendi, ndaba yinengi ntupu ya kuyela ya kuhokesha kuli Nyambi ya Ngula.
4“Oho akaleta linkende lya kuyoha ha mundilo kwinga ntupu, liku fwanina kwinga linkende lya kubula mumena lya muhunga wakulembuka waku vwela na mazi, hinge heke za kuwabaho na mazi.
5“Ndi ntupu yendi ya mpeka yikenga ya kuyoha ha shinzoyo, yikenga ya muhunga wakulembuka wakubula mumena, waku vwela na mazi. 6Ukapabozola linkende na kuyitilaho mazi, niyo yikenga ntupu ya mpeka.
7“Ndi ntupu yendi yikwinga ya mpeka za kuyoha mu mazi, yafwanina kwinga ya kutenda ha muhunga wakulembuka. 8Ukatwale kuli Nyambi ya Ngula kwinga ntupu, pe ukapana kuli mukankombela, niye ukatwala ku kaala. 9Mukankombela ukashimbako shitapilo shayo sha kwinga ngo shanukisho ngayi ntupu eye nimwayo ya kutupula kuli Nyambi ya Ngula, pe niye ukayihokeshela ha kaala. Yinengi nkombela yakuhokesha na mundilo, livumba lya neye ntupu ya byakulya likawahililisha Nyambi ya Ngula. 10Shitapilo sha ku shalaho shikenga sha bakankombela Aloni na bana bendi. Shinengi sha shizila shikuma ndaba shashimbiwa ku byakulya biya batupula kuli Nyambi ya Ngula.
11“Zintupu za mpeka mukaletanga kuli Nyambi ya Ngula hinga mukazitendesha na mumena, ndaba kaliha wafwanina kuli yavwisha mumena hinge wushi mu nkombela ya byakulya bya kupana kuli Nyambi ya Ngula. 12Mukutwesha kuleta kuli Nyambi ya Ngula ntupu yenu ya kutatika kuteza ha mwaka ha mwaka ya ku yaka mumena na wushi, ngoboni hinga yikahokeshiwa ha kaala. 13Zintupu zobe nimwazo za mpeka uku fwanina kukubaho mushele, hinga uvulamanga, ou mushele ukakwanukisha kulimama kwa Nyambi ya Ngula kwa mwaya myaka.
14“Oho mu kuleta ntupu ya mpeka ya kutatika kuteza kuli Nyambi ya Ngula, mpanenu mpeka za ku yoha hinge muhunga wakutwa. 15Niho ukafungileko mazi a olive pe ukayakeho incence. Niyo yikenga ntupu ya mpeka. 16Mukankombela ukahokesha shiya shitapilo kwinga shanukisho sha mpeka za kutwa na mazi, hamo na incence nimwayo, kwinga ntupu kuli Nyambi ya Ngula.
Currently Selected:
Balevi 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
