Malila 4
4
Kunyima ya kuwa kwa Yelushalema
1Ha! Wuwahe wa ngolinde yetu yakubyazima wunamana,
mamanya aku Litala lya Nyambi ya Ngula,
anapanzanini mu mikwakwa nimwamo.
2Bandumbana ba Ziyoni bengile
babawahe ngonehe mamanya a ngolinde kukwetu,
ngoboni lelo bali na kubatendesha
milimo ngonehe zinyungu za lima za kubumba.
3Hinge bamimbwe
bayamwishanga na kulela banababo shiwahe,
ngoboni bantu bami banafweke
ngonehe kayoni yimpye unaleyeke bana bendi.
4Bakulehelela banababo hibafwa kunzala
naku linyontwa,
batwanuke bali na kunyepa byakulya,
ngoboni kowa waku bapanabyo.
5Bantu bekalile na kulya byabiwahe
bali na kufwa nzala mu mikwakwa,
bantu bayo bekalilenga shiwahe
bali na kushingashinga byakulya mu mateke
mwakuyumbila bya mazilo.
6Bantu bami banabashushulu shikuma,
kupitakana baka Shondoma,
lukena luya lwalobele shikati shashishe na ngovu za Nyambi.
7Babilolo betu kaliha balibipishile,
ngoboni bengile ba kutuba ngonehe mahwe,
bekalile na nyala pe kami bengile bantu ba kushuma,
ba kubyazima na kupinduka shiwahe ngonehe mamanya a shafwila.
8Zimpala zabo zinashipi bwii pe bikonde byabo binayuminini,
ha zinyutu zabo ngonehe mitondo.
Haya hikowa wakubalimuka mu mikwakwa,
9Bayo bafwilile mu nzita bafwile shiwahe,
kupitakana bafwile ku nzala.
Aba bafwile bapopele kanikani
kutwala ha kumana ndaba ya kubula bya kulya.
10Makando amanene aya ezile ha bantu bami,
bambuyama banceshe lelo bana kuteleka banababo
kwinga byakulya byabo.
11Nyambi ya Ngula wapilamine shikuma,
niho abangizile mundilo uya wahokeshele Ziyoni nimwayo.
12Bamyene hano kaliha bakulupilile
hinge muntu nimwendi muno mu kaye,
ngayi bamalamo ba kutwesha kwingina mu Yelushalema.
13Ngoboni eshe shatendiwile,
ndaba bamiluwe na bakankombela bamu Yelushalema batendele wubi,
aba baleteshele lufu ha bantu bakubula mulandu.
14Bendanganinenga mu mikwakwa
ngonehe batushishitwa,
balibipishile ha bivwalo byabo nimwabyo na mukeza,
pe kowa hinge umo watweshele kubakwata.
15Bantu babilikizilenga ngayi, “Fumenu kukwetu,
munalibipishi hinga mutukwata.”
Nohobene bekalile bakakwendamo kufuma litunga kuya ku litunga limina,
ngoboni kowa na muntu wabatambwile.
16Nyambi ya Ngula niyemwine wabapanzanishile,
kaliha wekalile na nceshe kukwabo.
Kaliha wanukile bakankombela hinge bantwamina betu.
17Twekalile na kutatilila kuyavwiwa,
kutwala noho twakwangile kupenzelela.
Twapenzelele ngayi tuwane
kuyavwiwa,
kufumina ku bantu bamina,
ngoboni kowa nanaba
batuyavwile.
18Bamalamo betu batupenzelelenga,
pe kaliha twatweshele hinge kwenda mu mikwakwa.
Matena etu amanine,
twakumine ku mamaninino awo.
19Bakakutukonka batutandile shawangu
kupitakana bangonga bakakutuka.
Batukonkele naha binkanda,
batubazumwishilenga kutukwata mu libelelengwa.
20Pe bakwatile likota lya kuyoya kwetu,
uya mwene Nyambi ya Ngula ahatile,
ou twakulupilile ngayi ukatulama
ku bamalamo bakatwingina.
21Enu bantu ba Endoma na Uzi, wahililenu,
ngoboni nanenu kami kushushula kuli na kwiza,
nanenu kami mukayanda na kupelyangila muhelengwa
na kuyuvwa lisheni.
22Ziyoni natambulu ncuungu yendi ya wubi,
pe Nyambi ya Ngula wufwako kami
kukabekalika mu wutampwa.
Ngoboni Endoma, Nyambi ya Ngula
ukakushushula na kuholola milimo yobe ya wubi.
Currently Selected:
Malila 4: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
