Yona 2
2
Lilombelo lya Yona
1Niho Yona alombelele kuli Nyambi ya Ngula ou wenga Nyambi yendi hinga ekala mu livumo lya nyinci, 2na kwamba ngayi, “Nehanine Nyambi ya Ngula mu makando wami, pe wankumbwile nakalokele hinga nekala mu livumo lya kalunga ka bafu, pe wayuvwile lizu lyami. 3Wanyumbilile mu limpunga lya ku nceto ya mawate, oku anzingulukile mema, mankanyi obe nimwawo ankupwile. 4Niho nambile ngayi, ‘Nayumbiwi kufuma ku meho wobe, nikatilamina kami ku Litala lyobe lya kuyela.’ 5Mema ankupwile nashingile kufwa, mampunga anzingulukile, kahuki kampombelele ku mutwe. 6Na kunkulukile ku nceto ya mipishi ya mapili, kami kalunga ka bafu kancinkilile. Ngoboni obe Nyambi ya Ngula, obe wenga Nyambi yami, wapulwishile moyo wami ha kumfumisha mu kalunga ka bafu.
7Oho nalungukile nanukile obe Nyambi ya Ngula, pe malombelo wami akumine kukwobe, mu litala lyobe lya kuyela. 8Obo bakulemesha tunankishi twowa banafutamini nceshe za maleema abo kukwobe. 9Ngoboni ami na lizu lya ku kukambilila, nikapana nkombela kukwobe, eshe na kulupishi nisho nikapana, ndaba obe mwene obe Mukakupulwisha, obe wenga Nyambi ya Ngula!” 10Niho Nyambi ya Ngula ambilile nyinci, pe nyinci walukile Yona ku lukandwa.
Currently Selected:
Yona 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
