Yona 1
1
Yona ukubula kwombatala Nyambi ya Ngula
1 #
2Bamy 14:25. Lizu lya Nyambi ya Ngula lyezile kuli Yona, mwana Amitayi ngayi, 2“Katuka uye ku Neniva, lukena lwalunene, pe ukabilike ndaba ya kuluwa kwalyo.” 3Ngoboni Yona wakatukile na kutinina ku Tashishi kufuma ku meho a Nyambi ya Ngula. Wayile ku Yopa oko akawanine shishepe shayilenga ku Tashishi, niho ayumbile mali a nzila na kwingina mu shishepe ngayi aye nabo ku Tashishi, kutina Nyambi ya Ngula. 4Ngoboni Nyambi ya Ngula watumine mpepo yayinene ha liwate. Nkuli yengile yayinene shikuma ngayi shishepe shekalile mu wukalu wakushinga kutabuka. 5Bakakuvuwa bekalile na bowa, pe muntu na muntu wakalokelele kuli nyambi yendi ngayi amuyavwe. Pe batatikile kuyumbayumbila ntutu yabo mu liwate ngayi bahehupile. Ngoboni Yona wekalile mukati ka shishepe omo alalile tulo twatunene.
6Niho mukulwane wa shishepe ezile kukwendi na kwamba nendi ngayi, “Ukutontolola shumangani obe muntu watulo nehe? Pinduka, wihane nyambi yobe, kampe ukutuyuvwa ngayi tubule kunonga.”
7Niho balyambashanine umo kuwamina ngayi, “Yekenu tukune nyela, mwanga tulimuke ngayi yani unaleteshe ou wukalu kwiza hahetu.” Niho bakunine nyela, pe nyela yawililile hali Yona. 8Niho bambile kukwendi ngayi, “Tutongweze, wukalu ou ukwiza hahetu ndaba yayani? Watendanga mulimo ngani? Kami ukufuma kuti? Kami ukufuma ku litunga ngani? Kami uli mushobo ngani?”
9Yona wakumbwile ngayi “Nili Kahebelu, kami natinanga Nyambi ya Ngula, Nyambi wa mayilu, ou walengele liwate na litunga.” 10Niho bantu bayo bekalile na bowa shikuma, pe niho bambile kukwendi ngayi, “Shuma ngani eshe unatende!” Ndaba bayo bantu balimukile ngayi Yona watininenga ku meho a Nyambi ya Ngula, ndaba wa batongwezele. 11Nkuli yanenehelenga, pe niho bamwipwile ngayi, “Tukwinga nahiti ngayi nkuli yimwene?”
12Wakumbwile kukwabo ngayi, “Nyumbilenu mu liwate, pe liwate likamwena, ndaba nikulimuka ngayi ami naleteshe ngayi nkuli eye yayinene yize hahenu.”
13Ngoboni bakakuvuwa bavuwile shikuma na ngovu kutwala shishepe ku lukandwa, ngoboni shabakwangile ndaba nkuli yanenehelenga. 14Nohobene bakalokelele kuli Nyambi ya Ngula ngayi, “Tuli na kukulambilila, obe Nyambi ya Ngula, hinga witabila ngayi tunonge ndaba ya wumi wanou muntu, kami hinga utupana mulandu ha muntu wakubula mulandu, ndaba obe Nyambi ya Ngula watendanga omu unashingili.” 15Niho bakatwile Yona na kumuyumbila mu liwate, pe nkuli yamwenene. 16Pe bakakuvuwa bekalile na bowa shikuma ku meho a Nyambi ya Ngula. Batupwile nkombela na kulibeza kukwendi.
17Niho Nyambi ya Ngula atumine nyinci wamunene kwiza na kumina Yona. Pe Yona wekalile mu livumo lya nyinci matena ahatu na zinciku zihatu.
Currently Selected:
Yona 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
