Yelemiya 50
50
Kulubulula bya ha Mbambiloni
1Lizu ambile Nyambi ya Ngula kuli muluwe Yelemiya ha Mbambiloni na ha bantu bamo ngayi,
2“Shimika na kubilika ku matunga,
katula ndembela, kami ubilike lizu,
hinga ulimbalyo, ngoboni wambe ngayi,
‘Mbambiloni unakoniwi.
Mbelu unayeneshiwi, Melondaki unashampuliwi.
Bifwekesha byendi binayeneshiwi,
tunankishi twendi tunashampuliwi.’
3Ndaba litunga lya ku ncelele linamukatukili na kumulwisha,
Mbambiloni ukafutuka libelelengwa,
kowa bantu bakazikamo,
bantu na batuyamana baketukamo.”
Kuboka kwa Ishalela
4Nyambi ya Ngula ngayi, “Ha matena ayo na shikati shiyo, bantu ba Ishalela na Yunda bakakungulukila hamo hibeza na kulila, bakashinga Nyambi ya Ngula, Nyambi yabo. 5Bakepula nzila ya kuya ku Ziyoni pe bakapenzesha zimpala zabo kumbalila iyo na kwamba ngayi, ‘Tuyenu tulinunge hamo kuli Nyambi ya Ngula mu kulimama kwa mwaya myaka kwabula kuvulamiwa.’ 6Bantu bami banengi bambelele ba kuyonga, balishani banabayongeshe mu mapili, banayambangili kufuma ku lipili limo na kuya kulyamina, kami banavulama oku kwekala mwanya wabo. 7Aba babawanine nimwabo babalobeshele, niho bamalamo babo bambile ngayi, ‘Mulandu tufwawo ndaba banatende wubi kuli Nyambi ya Ngula, mayoyelo wabo akupwisha. Niye Nyambi ya Ngula, kulumbeza kwa batatizabo.’ 8Enu ba Ishalela, fumenu mu Mbambiloni, tinenu mu litunga lya Mbambiloni, mwinge ngo bikungwe bya bampongo kumbili ya muhoko. 9Haya mona, nili na ku shonkomona na kuleta ha Bakalandiya muhoko wa matunga aku ncelele mu kulwisha lukena na kulukona, mivwi yabo yenga ya bakanzita bawunongi, iya yabulanga kuhweta. 10Mbambiloni ukapukuliwa, kami baya bakamupukula nimwabo bakashimba byuma nimwabyo bakushinga.” Eshe nisho anamba Nyambi ya Ngula.
Kuwa kwa Mbambiloni
11Enu bakakupukula likona lyami, mu ku wahilila na kukeyuka na kukiloka ngonehe mwana ngombe ukupula mayila na kukoloma ngonehe bambishi, 12mandiyenu Mbambiloni ukayeneshiwa shikuma, ou bene wamibelekele ukashampuliwa. Mbambiloni ukenga wamushe shikuma ku matunga amanene nimwao, ukafutuka nyuminine na libelelengwa lya kubula mema. 13Kowa muntu ukazika mu Mbambiloni ndaba ya wukali wa Nyambi ya Ngula. Mbambiloni ukenga lipembe. Aba bakapitako bakalikomokela na kulakama kuneshe shinatendiwi. 14Enu mwapuhanga bipando bya mivwi, kwalamenu ku nzita mulwishe Mbambiloni naku mu zinguluka. Puhenu mivwi yenu nimwayo ku Mbambiloni, ndaba unabipishili Nyambi ya Ngula. 15Muwelukenu mu zimbalila nimwamo za lukena, walishishakale, bipata byendi byawakale. Twimbi twendi tunabunkoko na ku shiwukila hanci. Bweshenu wubi ku wubi hahendi, tendenu kukwendi ngonehe eshe atendele baminendi, ndaba oku niko kubweshela kwa Nyambi ya Ngula ha baka Mbambiloni. 16Kanishenu mukakukuba mbuto mu Mbambiloni, hinge muka kuteza ha shikati sha kuteza. Muntu na muntu ukaboka ku bantu bendi, kami muntu na muntu ukatinina ku litunga lyendi ndaba ya mukwale wa mukakuyandisha.
Kuboka kwa Ishalela
17Bantu ba Ishalela banafweke ngonehe bambelele banatandiwi na kupanzanishiwa ku bimbwi. Ha kutatika babalwishile kuli mwene wamunene wa Ashiliya. Wamamaninino kumbulukuta bifupa wengile Nembukandineza mwene wa Mbambiloni. 18Nohobene Nyambi wa Makunge, Nyambi wa Ishalela unakwamba ngayi, “Nikashushula mwene wa Mbambiloni na litunga lyendi, ngonehe nashushwile mwene wa Ashiliya. 19Nikabwesha bantu ba Ishalela ku litunga lyabo. Bakalya byakulya biya byamenanga ha lipili lya Kamela na ha lipili lya Mbashani. Bakalya byakulya nimwabyo bakushinga biya byamenanga mu litunga lya Efulemu na Ngiliyande.” 20Nyambi ya Ngula unakwamba ngayi, “Ha mutena uyo, kowa milandu yikawaniwa mu Ishalela, kami kowa wubi ukawaniwa mu Yunda, baya bantu banashalaho nikabayatila.”
Nyambi ukuyata Mbambiloni
21Nyambi ya Ngula unakwamba ngayi, “Lwishenu bantu ba ku Melatayimu na ba ku Pekondi. Bazihenu na kubalobesha, tendenu nimwabyo ebye namitongweze. 22Miyoyo ya nzita na makando amanene bili mu litunga. 23Shikoma sha hanci nimwaho shinamunguku na kupokozoka. Matunga nimwawo analikomokele hanebye binatendiwi ku Mbambiloni. 24Obe Mbambiloni na kuvwimine kantamba kaya wabulile kulimuka, niho wafwilemo. Wawaniwile hinga wafwa ndaba wakanine Nyambi ya Ngula. 25Nyambi ya Ngula unashinkululu ku makongelo wendi, unatutwishi bilwisho bya wukali wendi. Mwene Nyambi wa Makunge uli na mulimo akushinga kutenda mu litunga lya baka Mbambiloni. 26Balwishenu enu mu kufuma ku matunga akwakutali. Nyemunenu bishete byabo, bungikenu nimwabyo bya mu Mbambiloni ngonehe mishiinzi ya mpeka. Balobeshenu, hinga mushiyaho bamo. 27Zihenu bankunzi babo nimwabo. Batwaliwe na kuzihiwa nimwabo. Bali mu makando ndaba mutena na shikati sha kubashushula shakumakale. 28Yuvwililenu, kunobo banapanza kufuma mu Mbambiloni, bali na kwiza na kwamba mu Ziyoni, ebye anatende Nyambi ya Ngula, Nyambi yetu, bya kulobesha baka Mbambiloni, ndaba ya biya batendele ku Litala lya Nyambi. 29Yihanenu bakanzita nimwabo baya bawunongi, bakakupuha bipando bya mivwi beze na kulwisha Mbambiloni na kuzinguluka lukena. Hinga mwitabila ngayi kupanze hinge muntu umo. Bweshelenu bantu ba Mbambiloni kwezekesha na nebye banatende. Batendenu ngonehe batendele ku baminabo. Ndaba banaliyemeze na kubula kwombatala Nyambi ya Ngula, wa Kuyela wa Ishalela. 30Ha mutena uyo, bandumbana ba mu lukena bakafwila mu mikwakwa, kami bakanzita babo bakalobeshiwa.” Eshe nisho anamba Nyambi ya Ngula. 31Nyambi wa Makunge ngayi, “Monenu, nikamilwisha baka Mbambiloni enu bakakuliyemeza, ndaba mutena na shikati sha kumishushula shakumakale. 32Bakakuliyemeza bakapukala na kuwa, kami kukabula wakubapindula, nikabangiza mundilo mu minzi yabo, uya ukahokesha nimwabyo binazinguluku.”
33Nyambi wa Makunge unakwamba nehi ngayi, “Bantu nimwabo ba Ishalela naba Yunda, banalyatililiwi. Nimwabo baya babatwalile mu wuntapwa, bali na kukana ku balubula ngayi baye. 34Hinge noho mukakubapulwisha uli na ngovu, lizina lyendi niye Nyambi wa Makunge. Ukabalamwina ngayi mwanga alete ku mwena mu litunga na kuleta makando ku bantu ba mu Mbambiloni.”
35“Mukwale ukaziha baka Mbambiloni
nanaba bazikamo nimwabo.
Mukwale ukaziha babilolo babo,
na bantu babo bangana.”
36“Mukwale ukaziha bamiluwe ba mahalo,
kami bakenga bakuyeba.
Mukwale ukaziha bakanzita babo,
kami bakanongeshiwa.
37Mukwale ukaziha bambishi babo na makoloyi wabo,
Mukwale ukaziha bakanzita ba ku matunga
ashenge baya banalifungili nabo.
Nohobene, baya bakanzita bakafutuka ngo bambuyama.
Zimfuma zabo zikanongeshiwa na mukwale,
pe bakalishimbila ebye bilimo.
38Linanga likeza mu litunga lyabo
liya likayumisha mema,
ndaba Mbambiloni lyenga litunga lya
bifwekesha bya tunankishi.
Tunankishi tunabayebeshe
na ku bapempelesha.
39“Haya batuyamana ba mu libelelengwa bakekala hamo na ba mitambwe mu Mbambiloni. Makungulu nanibo bakekalangamo. Kowa bantu aba eze bakekalemo, kami kowa aba eze bakazikemo ku bihemunwino nimwabyo. 40Shikatendiwa ku Mbambiloni ngonehe shatendiwile ku Shondoma na Ngomola na ku minzi ya bazingulukile oho na banongeshele. Kubihemunwino nimwabyo, kowa muntu ukekalamo.” Eshe nisho anamba Nyambi ya Ngula.
41“Monenu, bantu bakeza kufuma ku litunga lya ku ncelele,
mukoka wawunene na bamyene
babengi bakufuma ku zimbalila za
kwakutali za hano hanci.
42Bakeza na bipando bya mikunzi na milinga,
benga bantu banguma bakubula nceshe,
Mishindo yabo, yikayuvwanika ngonehe
ku nkwancana kwa liwate, oho bakeza ku nzita
hinga bakandama ha bambishi.
Banaliwahishili kulwisha Mbambiloni.
43Oho mwene wa Mbambiloni anayuvu byabo,
maboko wendi anapopo.
Uli mu malwa ngonehe kukola kuya
ayuvwanga mbuyama ha kubeleka.
44“Ngonehe shimbwi afumanga mu lishaka lya kuzika lya Yondana na kuya ku mwila wawuwahe mabuyishilo na nami nikafumisha baka Mbambiloni mu litunga lyabo shawangu. Nikahata mukakutwaminina ou ukalela litunga. Yani ukutwesha kulifwanikiza na nami? Yani ukutwesha kunkanangana? Yani mukakutwaminina ukutwesha kwimana ku meho wami? 45Haya yuvwenu ebye anafungu Nyambi ya Ngula bya kulwisha Mbambiloni na bihanganiko byendi bya kulwisha baka Mbambiloni. Bana babo bakakwatiwa, pe litunga lyabo likaloba. 46Oho Mbambiloni akakoniwa, kaye kakakanka, lukuwa lwa kulila kwabo lukayuvwanika ku matunga amina.”
Currently Selected:
Yelemiya 50: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
