Yelemiya 51
51
Shikoma sha Nyambi ya Ngula
1Nyambi ya Ngula ukwamba ngayi,
“Mona nili na kuleta mpepo yayinene ya
kulwisha Mbambiloni na naba bazikamo.
2Nikatuma bayeni ku Mbambiloni baka ku pepa,
pe baka mu pepa na ku shiya litunga lyendi mukungulu.
Oho uya mutena wakulobesha ukakuma,
bakeza na kumulwisha bakafuminina kuzimbalila nimwazo.
3Hinga mwitabilisha Bakabipando bya mikunzi kupuha mivwi yabo,
hinge mu kanzita kuvwala bivwalo bya nzita.
Hinga mushiyaho bandumbana,
kalobeshenu bakanzita nimwabo.
4Bakalemekiwa na kufwila mu mikwakwa ya munzi wabo.
5Litunga lya Mbambiloni nilyo lili na mulandu,
wakubipishila wa Kuyela wa Ishalela.
Ishalela na Yunda kuka kaniwa kuli Nyambi wa Makunge,
Nyambi yabo bafwako.
6Tinenu mufume mu Mbambiloni,
tinishenu myoyo yenu.
Hinga muzihiwa ndaba ya ku shushuliwa kwendi,
ndaba eshe nisho shikati sha Nyambi ya Ngula sha kubweshela wubi ku wubi na kubweshela ngonehe biya atendanga.
7 #
Kuh 17:2-4; 18:3. Mbambiloni wengile ngonehe nkomoki ya ngolinde mu liboko lyami,
na kwingisha hano hanci ngayi hakolwe.
Matunga anwine ku waine,
nohobene matunga aku moneka kupempela.
8Mbambiloni unawu naku mu bazumuna,
kami unalobeshiwi.
Tuwenu mbingo hahendi,
shingilenu ha bitombo byendi wanga,
kampe ukutwesheka kupola.”
9 #
Kuh 18:5. Mapukwenda bekalilenga kuyo bambile ngayi,
“Twezekele kupanga Mbambiloni ngoboni twakwanga,
tumushiyenu tuboke,
muntu na muntu aye ku litunga lyendi,
ndaba kuyatishiwa kwendi kunakumu na kuyilu,
kunengi kwakunene shikuma.”
10Bantapwa bafumine ku Yunda bakamba ngayi,
“Nyambi ya Ngula unatushambishi,
haya tubilikenu mu Ziyoni,
milimo ya Nyambi ya Ngula,
Nyambi wetu.”
11“Kumbenu mivwi yenu,
shimbenu makebo wenu.
Nyambi ya Ngula unashonkomono mitima ya bamyene ba Mendiya,
biyongola byendi bya kulobesha Mbambiloni.
Ndaba okwe nikwo kubweshela wubi ku wubi kwa Nyambi ya Ngula,
ukabweshela ndaba ya kuloba kwa litala lyendi.
12Yimikenu ndembela ya kulwisha twimbi twa Mbambiloni,
shumenu ha kulama, yakenu bakakulama,
kami yakenu bakakubelamina.”
Nyambi ya Ngula unatende ebye ahanganikile,
ngayi ukashitenda ku bantu ba Mbambiloni.
13 #
Kuh 17:1. Mbambiloni obe wazika ku mishinzi yayingi wuheti wakuvulila,
haya mamaninino wobe anakumu shikati sha kuyoya kwobe shinamana.
14Nyambi wa Makunge unalibeze ngayi,
mwa shikuma nikaleta bakanzita babengi ngonehe libimbe lya mikumbi,
bakawulumwina tunkelenkele twa kuwahililila ha kukona.
Lwimbo lwa kuyemeza Nyambi
15Nyambi ya Ngula niye walengele hanci na ngovu zendi,
walengele kaye na ngana zendi na kalimukisho kendi
watandubwile mayilu.
16Oho ambanga, mema a muyilu ankwancananga,
ukukakamisha makumbi kwakumina hano hanci,
wamwesheshanga mimuni ya kulokesha mvula,
kami wapepokeshanga mpepo kuyifumisha
oku ayikongelanga.
17Bantu nimwabo banengi bakuyeba,
na kubula kalimukisho.
Bamfuzi nimwabo banayeneshiwi na tunankishi twabo,
ndaba banyambi babo ba mahalo kami wumi bafwawo.
18Byenga byowa, kami bya mahalo.
Hashikati sha kushushuliwa kwabo bikaloba.
19Nyambi wa Yakobo
kaliha walifweka na tunankishi.
Niye walengele byuma nimwabyo
kami wahatile Ishalela kwinga bantu bendi,
lizina lyendi niye Nyambi wa Makunge.
Shikoma sha Nyambi ya Ngula
20Obe Mbambiloni uli shikoma shami,
na shilwisho shami sha nzita
naliyavwishile kucancola matunga a bantu
na kulobesha wene,
21kucancola bambishi na mukakukandamaho
kucancola makoloyi na baka kucayela.
22Mukucancola balume na bambuyama,
mu kucancola bakulwane na batwanuke
mu kucancola bandumbana naba tunkanga.
23Nikacancola balishani na
matanga wabo, nikacancola bandimi
na zingombe zabo za kulimisha.
Nikacancola batulela na babilolo.
Mbambiloni ukushushuliwa
24Nyambi ya Ngula ukwamba ngayi, “Mukamona eshe nikashushule Mbambiloni na bantu nimwabo baya bekalamo ndaba ya wubi nimwawo uya batendele mu Yelushalema.”
25Mbambiloni unafweke ngonehe lipili likulobesha,
obe uli na kulobesha hanci nimwaho.
Nikakulwisha na liboko lyami, nika kulwishila hanci,
kami nika kushiya mu mutoko.
Eshe nisho anamba Nyambi ya Ngula.
26“Bantu bafwako kukawana limanya lya mumbango,
hinge limanya lya kutendesha mwimbi.
Ngoboni ukenga ngonehe libelelengwa mwaya myaka.”
Eshe nisho anamba Nyambi ya Ngula.
27“Katula ndembela yobe ya shilimukisho sha nzita mu litunga nimwamo,
shiba mpandula mukati ka mikoka,
wambe na matunga,
mwanga baliwahishile kulwisha Mbambiloni.
Yihana wene waku Alalata naku Mini naku Ashikenazi,
beze na kulwisha Mbambiloni,
hata mukakutwaminina nzita.
Tuma bambishi,
mwanga benge ngonehe libimbe lya mikumbi.
28Amba na matunga mwanga baliwahishile kulwisha Mbambiloni.
Yihana bamyene ba ku Mendiya,
hamo na babilolo na bakakutwaminina,
na bakanzita bamu matunga nimwawo aya ali mu ngovu zabo.
29Hanci hali na kunyenkana na kukanka,
ndaba Nyambi ya Ngula uli na kutenda bifungo byendi,
bya kulwisha Mbambiloni na kulobesha litunga lya Mbambiloni
ngayi mwanga kukabule muntu wakwikalamo.
30Bakanzita bamu Mbambiloni banalehesho kulwa,
banekala tuhu nahiya mu bipata byabo,
ngovu zabo zinapopo,
bafutukakale ngonehe bambuyama,
bamalamo babo bali na kumungula bihala bya ku mapangati
na kuhokesha matala wabo.
31Bamiluwe ba ku li konkezekanga kwituka,
kutwala mazu kuli mwene wa Mbambiloni,
kumutongweza ngayi,
‘Lukena lwendi bali na kululwisha kuzimbalila nimwazo.
32Bamalamo bashimbakale mavwe nimwawo aku mushinzi,
bahokeshakale shitebe,
kami bakanzita bamu Mbambiloni batampwakale.’
33Nyambi wa Makunge,
Nyambi wa Ishalela ukwamba ngayi,
bamalamo bana kushekasheka na kulyatangila bantu bamu Mbambiloni,
ngonehe balyatangilanga mapumpwa kuya ba kupulila.
Shikati shabo sha kuteza, shili hahepi.”
34Bantu bamu Yelushalema bakwamba ngayi,
“Mwene Nembukandineza wa Mbambiloni,
unaketulu kami unatucancolo.
Unatwingi ngonehe zintesho za kubula byuma.
Unatumini, ngonehe liyoka wamunene,
washimbile nimwabyo
ebye ashingilenga na kuyumba biya
abulile ku shinga.”
35Bantu bekala mu Ziyoni bambe ngayi,
“Haya iya mishunga yekalile kukwetu,
mwanga yitendiwe mu Mbambiloni.”
Bantu bamu Yelushalema bambe ngayi,
“Mwanga mulandu wa lufu lwetu,
wikale ha bantu bamu Mbambiloni.”
Nyambi ya Ngula ukayavwa Ishalela
36Nyambi ya Ngula ukwamba ngayi,
“Monenu, nikamilamwina na kumi lwila,
kwezekesha ngonehe bamitendele.
Nikayumisha liwate lya ku Mbambiloni
na kuyumisha tuheloke twekalamo.
37Mbambiloni ukafutuka lipembe,
muya mukekala batuyamana bamu lishaka.
Yikenga mbalila ya kutinisha kuya kukabula kwikala bantu.
Baya nimwabo bakamonako, bakalikomokela.
38Baka Mbambiloni nimwabo,
bali na kukangoka ngonehe bimbwi.
Bali na kubuluma ngonehe bana ba babimbwi.
39Oho bashili ku wahilila,
nikabawahishila mayambwayambwa.
Nikabengisha ngayi bakakolwe mwanga bakawahilile shikuma.
Bakalangana mutulo, kukapinduka kami bafwako.
40Nikabatwala na kuzihiwa, ngonehe bana ba bambelele
na babikungwe na bampongo.”
Eshe nisho anamba Nyambi ya Ngula.
Malwa a Mbambiloni
41“Mbambiloni eshe anakoniwi,
lukena luya bayemezelenga mukaye nimwamo, lunakwatiwi.
Mbambiloni wafutukakale kwinga wakukendiwa ku matunga.
42Bamalamo bakulwisha Mbambiloni,
ngonehe mankanyi amanene akakupula litunga nimwalyo.
43Minzi yendi yinalobo,
litunga lyendi linafutuku libelelengwa.
Kowa muntu ukwikalamo,
hinge kwendamo.
44Nikashushula Mbelu nyambi wa Mbambiloni,
nikafumisha mukanwa kendi nimwabyo biya aminine.
Bakamatunga bakalehasho kwiza kukwendi na kumulemesha.
Kembi ka Mbambiloni kakanyemuka.
45Fumenumo, enu bantu bami.
Yitukenu, lamwinenu myoyo yenu.
Yitukenu mufume ku wukali wa Nyambi ya Ngula.
46Hinga mulikekula hinge kuyuvwa bowa,
oho mu kuyuvwa mbuzi mu litunga.
Mu mwaka na mu mwaka kwekalanga mbuzi ya mishunga
yili mu litunga kami wene ukulwisha wene wamina.
47Mwa shikuma shikati shili na kwiza oho nikashushula tunankishi twa mu Mbambiloni.
Litunga lyendi likayeneshiwa,
mituntu ya bantu ba kufwa yikalalamo.
48 #
Kuh 18:20. Niho liyilu na hano hanci na byuma nimwabyo bilimo
bikembila na ku wahilila ha Mbambiloni.
Bakanzita bakafuma ku ncelele bakeza naku lobesha Mbambiloni.
49 #
Kuh 18:24. Mbambiloni uku fwanina kuwa
ndaba ya Baishalela anazihi na baya azihile nimwabo hano hanci pe nafwanini kuwa.”
Eshe nisho anamba Nyambi ya Ngula.
Lizu lya Nyambi ku Baishalela bali mu Mbambiloni
50Nyambi ya Ngula ukwamba ngayi, “Enu munapanza kulufu, hinga mucincazala, anukenu Nyambi ya Ngula hinge ndi muli kwakutali, kami anukenunga Yelushalema mu mitima yenu. 51Tunayene ndaba tunayuvwu eshe ba kutuhandula, tuli na lisheni ku meho ndaba bayeni banengini mu myanya ya kuyela yamu Litala lya Nyambi ya Ngula.” 52Nyambi ya Ngula ngayi, “Monenu, matena ali na kwiza, oho nikashushula tunankishi twendi mu litunga nimwamo, banalemana nimwabo ba kushunga. 53Hinge ndi Mbambiloni ukulitwala kuyilu, hinge ndi ukashumisha bipata byendi, nikatuma nzita yikaya na kumulobesha.” Eshe nisho anamba Nyambi ya Ngula.
Mbambiloni ukulobeshiwa
54Nyambi ya Ngula ukwamba ngayi,
“Yuvwililenu mbingo za kulila kwa bantu mu Mbambiloni,
malila akuloba kwakunene
kuli naku fuminina mu litunga lya Mbambiloni.
55Nyambi ya Ngula ukalobesha Mbambiloni naku mwenesha miyoyo yendi,
bakanzita ba kuyunga ngo kukwancana kwa mankanyi,
miyoyo ya kuyunga kwa mazu wabo akuyuvwanika.
56Muka kulobesha Mbambiloni wakumakale,
bakanzita bendi bakakomiwa na bipando byabo,
bya mivwi, bikamunguliwa.
Nyambi ya Ngula wenga Nyambi mukakushushula wubi,
mwa shikuma Nyambi ukabashushula.
57Nikapendesha bana ba bamyene na bantu bendi bangana,
na batulela na babilolo hamo na bakanzita,
bakalanganinina kukapinduka bafwako.”
Eshe nisho anakwamba Mwene,
Nyambi wa Makunge nilyo lizina lyendi.
58Nyambi wa Makunge ukwamba ngayi, “Kembi ka Mbambiloni baka ka nyemwina hanci,
na mapangati wendi akahokeshiwa,
bantu bakalipokwesha kutenda milimo nahiya
kami matunga akalipokwesha
kutenda byuma biya bikabanga ku mundilo.”
Mazu a Yelemiya akutumiwa ku Mbambiloni
59Elye nilyo lizu atumine muluwe Yelemiya na shilolo Shelaya mwana Neliya muzukulya Mahesheya, oho ayile ku Mbambiloni na Zendekiya mwene wa Yunda mu mwaka wa wunaa wakulela kwendi. 60Yelemiya watikitile mu libuka lya kuvungavunga byuma nimwabyo byatikitiwile ha litunga lya Mbambiloni. 61Yelemiya watongwezele Shelaya ngayi, “Oho ukakuma ku Mbambiloni, ukamone ngayi unalabili bantu mazu awa nimwawo na lizu lya kukangoka. 62Niho ukambe ngayi, ‘Obe Nyambi ya Ngula, nka unamba ngayi ukalobesha mwanya uno ngayi ukenga libelelengwa omo eze kukabule muntu hinge kayamana wakwikalamo mwaya myaka.’ 63#Kuh 18:21. Oho ukamanisha kulaba libuka elye, kamangileko limanya kunelye libuka, ukaliyumbile mu mushinzi wa Yufuleti. 64Pe ukambe ngayi, ‘Eshe nisho akandokama Mbambiloni, ngayi kuka tumpuka wufwako ndaba ya makando nikaleta hahendi, bantu bendi bakaloba.’”
Aha niho anamanini mazu a Yelemiya.
Currently Selected:
Yelemiya 51: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
