Yelemiya 49
49
Kulubulula bya ha Amoni
1 #
Ezek 21:28-32; 25:1-7; Amos 1:13-15; Zefw 2:8-11. Nyambi ya Ngula ukwamba ha baka Amoni ngayi, “Kati Ishalela wufwabo bana babalume ndi? Kati kowa ncwana yendi ndi? Shumangani nyambi Milikomu#49:1 Milikomu: Lizina lyamina niye Moleki. na bantu bendi ba kukonena litunga lya Ngandi na kuzikamo? 2Nohobene monenu matena ali na kwiza oho nikengisha bantu ngayi bayuvwe lukuwa lwa nzita ya kulwisha munzi wa Lamba wa mu litunga lya Amoni. Munzi ukashala lipembe na mushiinzi wa limvu, kami minzi yalwo yikahokeshiwa na mundilo, niho Ishalela akafumisha litunga lyendi ku nobo balishimbile kukwendi.” Eshe nisho anamba Nyambi ya Ngula.
3“Enu bantu ba ku Heshimboni, lilenu mbingo ndaba munzi wa Ayi unalobeshiwi, enu bambuyama ba ku Lamba lilenu, vwalenu bicancolo, pe mutuwe mbingo, yitukenu noku noku mukati ka lushitilo. Milikomu nyambi yenu ukatwaliwa mu wuntapwa na bakankombela bendi na babilolo bendi. 4Kati shumangani ukulilundumikila ha mukulo wobe wa wilo, obe mwana wa mbuyama wakubula kukulupila ukuliyemeza mu wuheti wobe na kwamba ngayi, ‘Kati yani ukeza na kundwisha?’ ” 5Mwene Nyambi wa Makunge ukwamba ngayi, “Mona, nikaleta mutentu hahobe kufuminina kukwabo nimwabo banakuzinguluku, kami nimwenu mukatandiwa, bantu nimwabo baketuka, pe kowa ukabweshamo bakakutina. 6Ngoboni ha mamaninino nikabwesha bitandalisho bya baka Amoni.” Eshe nisho anamba Nyambi ya Ngula.
Kulubulula bya ha Endoma
7 #
Isha 34; 63:1-6; Ezek 25:12-14; 35; Amos 1:11-12; Mala 1:2-5. Nyambi wa Makunge unakwamba ha baka Endoma ngayi, “Kati mu munzi wa Temani mwabulakale ngana ndi? Kati bakakubela babo kami kutwesha kubatongweza sha kutenda bafwako ndi? Kati ngana zabo nimwazo zinamana ndi? 8Enu mwazika mu Ndendani, tengulukenu mwituke, holamenu mu manzolongoma. Ndaba nikaleta malwa hali Ishau, shikati sha kumushushula oho shika kuma. 9Bakakubuya mikabo ya shinyanca bakwiza mu kubuya, bakashiyako yimo hamo ha kupupulula. Bezi bakwiza ha shikati sha wushiku bakashimba tuhu byuma bakushinga. 10Ngoboni nikafwikulula litunga Ishau#49:10 Ishau: Mu mabuka amina ngayi Endoma lizina lya nkakayabo. na kuholola myanya yabo baholamanga na ku bashiya hatoo, ngayi mwanga babule kutwesha kuholama. Bana babo na bawushinda wabo na bandambo zabo bakalobeshiwa nimwabo kowa ukashalaho. 11Lehenu batwanuke ba banginga, ndaba nikalama wumi wabo, kami lehenu bamfwile benu bankulupile.”
12 #
Yel 25:15-26; Mat 20:22. Nyambi ya Ngula ngayi, “Ndi obo babulile ku fwanina kunwina mu nkomoki ba ku fwanina ku nwamo, mu kuhanganika ngayi mukaya kwakubula ku shushuliwa ndi? Kukaya kwakubula ku shushuliwa mufwako, ngoboni mukafwanina kunwa mu nkomoki.” 13Nyambi ya Ngula ngayi, “Ndaba nalibeze amimwine ngayi munzi wa Mbozila ukenga wakukomokesha na kwinga wakukendiwa na kwinga mapembe na shikuto. Minzi ya hahepi nimwayo yikenga mapembe mwaya myaka na myaka.” 14Nayuvwile lizu lyafumine kuli Nyambi ya Ngula. Muluwe watumiwile ku matunga na kwamba ngayi, “Likungulenu mwanga muliwahishile kulwisha Endoma. 15Haya nikakwinga wamushe mukati ka bantu bakubula kukulupila, kami kowa ou ukakupana maleema. 16Unatinishi bantu bamina, kuliyemeza kwobe kunakwongeze. Obe wazika mu manzolongoma amu mapili, kami wekala hayilu ya binkanda. Hinge ndi wulili wobe wawuyaka hayilu ngonehe ngonga, nika kunyemunaho na kukupashwila hanci.” Eshe nisho anamba Nyambi ya Ngula.
17“Malwa akeza ha Endoma akenga amanene, ou nimwendi ukapitilako ukalikomokela, na kuyuvwa bowa. 18Shikatendiwa ku Endoma ngonehe shatendiwile ku Shondoma na Ngomola, oho balobele hamo na minzi yiya ya bazingulukile. Kowa muntu ukekalamo, hinge kukazikamo.” Eshe nisho anamba Nyambi ya Ngula. 19Ngonehe shimbwi afumanga shawangu mu lishaka lya kuzika lya Yondana na kuya ku mwila wawuwahe wa mabuyishilo na nami nikafumisha Baendoma mu litunga lyabo. Pe mukakutwaminina ou eze nikahate, niye ukalela litunga. Yani ukutwesha kulifwanikiza na nami? Yani ukutwesha kunkanangana? Yani mukakutwaminina ukutwesha kwimana ku meho wami? 20Haya yuvwenu ebye anafungu Nyambi ya Ngula bya kulwisha Endoma na bihanganiko byendi bya kulwisha baya bekala mu munzi wa Temani. Bana babo bakakwatiwa, kami litunga lyabo likanonga. 21Oho Endoma akawa kukekala miyoyo na kaye kakakanka na lukuwa lwa kulila kwabo, lukayuvwanika naku liwate lya kufubila. 22Kamalamo ukafwika Mbozila ngonehe ngonga atandubulanga mbando zendi ha kutuka. Ha mutena uyo bakanzita ba Endoma bakekala na mutentu ngonehe mbuyama uli na kubeleka.
Kulubulula bya ha Ndamashika
23 #
Isha 17:1-3; Amos 1:3-5; Zaka 9:1. Nyambi ya Ngula ukwamba ha baka Ndamashika ngayi, “Bantu ba ku minzi ya Hamati na Alipandi, bali na mutentu ndaba banayuvwu mbuzi yayibi. Bali na bowa, kami bali mu makalikiza, ngonehe liwate lya kubula kutulumana. 24Bantu ba mu Ndamashika banapopo, bali na kutina. Ngoboni bali mu malwa, kami bali na kuyuvwa kukola, ngonehe mbuyama ha kubeleka. 25Munzi wakutumbalala uya wekalilenga waku wahilila unakendiwi. 26Ha mutena uyo, bandumbana ba mu munzi bakafwila mu mikwakwa, kami bakanzita babo bakalobeshiwa.” Nisho anamba Nyambi wa Makunge. 27“Kami nikabangiza mundilo mu twimbi twa Ndamashika pe ukalobesha zinkena za Mbeni Handandi.”
Kulubulula bya ha Kenda na Hazola
28Nyambi ya Ngula ukwamba ngayi, “Katukenu mukalwishe mushobo wa Kenda na minzi ya Hazola yili mu maboko a Nembukandineza mwene wa Mbambiloni. Yuvwililenu, enu bantu ba ku Kenda na bantu ba ku mushamuko. Natongweze Nembukandineza kumi lwisha na kumilobesha. 29Zintanda na matanga wabo akashimbiwa, bibaamba na byuma byabo nimwabyo bikashimbiwa, hamo na bakamela babo. Balume bakalila ngayi, ‘Bya kutinisha binatuzinguluku kumbalila nimwazo.’ 30Tinenu yenu na kuyambangila, enu mwazika mu Hazola. Nembukandineza mwene wa Mbambiloni nahanganiki kumi lwisha, nayongolo kumilobesha.” Eshe nisho anamba Nyambi ya Ngula. 31Nyambi ya Ngula unakwamba ngayi, “Liwahishilenu muye na kulwisha bantu ba kuliyuvwa ngayi bali mu ku mwena. Munzi wabo wowa, wakubula mapangati hinge tupatisho, wekala ninkayawo wakubula kulamiwa. 32Bakamela babo bakapukuliwa na zingombe babo bakabipishiwa, nikapanzanishila ku zimbalila nimwazo bantu baya baketwilanga huki zabo. Nikabaletela makando akafuminina ku zimbalila nimwazo. 33Hazola likenga libelelengwa lya kwikala bamimbwe mwaya myaka, kowa muntu ukazikamo.” Eshe nisho anamba Nyambi ya Ngula.
Kulubulula bya ha Elamu
34Oho Zendekiya engile mwene wa Yunda, lizu lya Nyambi ya Ngula lyezile kuli muluwe Yelemiya ha bya litunga lya Elamu. 35Nyambi wa Makunge ukwamba ngayi, “Monenu, nikamungula bipando bya mikunzi bya Elamu aha hanemana ngovu zabo. 36Nikaleta hali Elamu bamalamo ngonehe mpepo yikafuminina ku zimbalila zinaa za muyilu. Nikapanzanishila bantu ba Elamu nimwabo kuzimbalila za mpepo oyo, pe bantapwa ba Elamu bakapanzanina ku matunga nimwawo. 37Nikatinisha bantu ba Elamu ku bamalamo babo nanobo bakushinga ku baziha. Nikaleta byuma byabibi hahabo, mu kupilama nikabatumina mukwale, kutwala ha kubalobesha nimwabo.” Eshe nisho anamba Nyambi ya Ngula. 38“Nikayaka litanda lyami mu litunga lya Elamu, kami nikaziha mwene hamo na babilolo bamo.” Eshe nisho anamba Nyambi ya Ngula. 39“Ngoboni mu matena amamaninino nikabwesha bitandalisho bya Elamu.” Eshe nisho anamba Nyambi ya Ngula.
Currently Selected:
Yelemiya 49: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
