Yelemiya 48
48
Kulubulula bya litunga lya Mowambi
1 #
Isha 15:1—16:14; 25:10-12; Ezek 25:8-11; Amos 2:1-3; Zefw 2:8-11. Ha bya litunga lya Mowambi,
Nyambi wa Makunge, Nyambi wa Ishalela ukwamba ngayi,
“Malwa akeza ha bantu ba Nembo,
ndaba munzi wabo walobakale.
Kiliyatayimu ukayuvwa lisheni ndaba ukakwatiwa.
Bipata byabo bya ku shuma bikanyemukila hanci,
pe bakayuvwa lisheni.
2Mpupo ya litunga lya Mowambi yikamana.
Bantu ba ku Heshimboni,
bakekala na bifungo bya kulwisha Mowambi.
Bakamba ngayi, ‘Tuyenunga tulobeshe liya litunga.’
Munzi wa Mandimeni ukamweneshiwa.
Mukwale ukamilwisha.”
3Bantu ba ku Holonayimu bali na kulila
ndaba ya makando amanene na malwa.
4Mowambi walobeshiwakale,
batwanuke bali na kulila.
5Bali na kuya na kupwezuma mu nzila
yikukankalala ku Luhiti.
Bali na kuya hinga baye na mu nzila yikuya ku Holonayimu.
6Yitukenu mupulwishe wumi wenu.
Yitukenu ngonehe mutinkwe uli mulibelelengwa.
7Ndaba mwakulupila mu bipata byenu,
na mu wuheti wenu nanenu kami mukakoniwa.
Nyambi yenu Kemoshi hamo na bakankombela bendi,
na babilolo bendi bakaya mu wuntapwa.
8Mukakulobesha ukeza ku minzi nimwayo,
pe kowa munzi ukapanza.
Mukulo na mbuwa, nimwabyo bikaloba,
ngonehe anamba Nyambi ya Ngula.
9Panenu mbando ku litunga lya Mowambi,
ndaba ukatuka.
Minzi ya Mowambi yikafutuka mapembe,
pe kowa ukekalamo.
10“Unakutiwi muntu ukubula kutenda milimo ya Nyambi ya Ngula na mutima wendi nimwawo. Unakutiwi muntu ukubula kuliyavwisha mukwale wendi mu nzita.”
Minzi ya Mowambi yikulobeshiwa
11Mowambi unekalanga shiwahe kufuma kuwanuke wendi, shilolo aye mu wuntapwa. Unekala ngo waine yili mu ntesho, yikubula kupingululiwa mu ntesho yamina. Pe ushili ngonehe ekalile mwaka, livumba lyendi shilolo lifutuke.
12Nyambi ya Ngula ukwamba ngayi, “Monenu, matena akeza oho nikatuma bantu kwiza na kuyita Mowambi ngonehe waine. Bakayita waine mu zintesho zendi na kuzipabozola. Eshe nisho anamba Nyambi ya Ngula. 13Nohobene, Mowambi ukayuvwa lisheni kuli nyambi yendi Kemoshi, ngonehe baka litala lya Ishalela bekalile na lisheni oho bakulupilile Mbetele.
14Kati shumangani mukwamba ngayi,
‘Tuli balume ba kukanca na ku shuma ku nzita?’
15Ami Mwene wa lizina lya Nyambi wa Makunge nikwamba ngayi,
Kamalamo ukalwisha Mowambi na kulobesha minzi yendi.
Bandumbana bendi babawahe bakazihiwa.
16Makalikiza a Mowambi ali hahepi,
malwa ali na kumwizilila wanguwangu.
17Mulilenu, enu nimwenu munamuzinguluku,
nanenu nimwenu mwalimuka lizina lyendi ambenu ngayi,
‘Monenu muwana wakushuma,
uya muwana wawuwahe eshe unapokoko.’
18Enu mwazika mu Ndimboni,
fumenu ku myanya yenu ya maleema,
pe mwikale mu lukungu,
ndaba mukakulobesha Mowambi wakumakale mu kumilwisha,
ukalobesha bipata byobe bya ku shuma.
19Enu mwazika mu Aloya,
yimanenu kunkumo ya nzila mupenzelele,
muyipulenu mulume ou ukushila,
na mbuyama ou ukupanza,
ngayi kunatendiwi bishini?
20Bakakumbula ngayi, Mowambi unayeneshiwi
ndaba unashandoliwi, tuwenu mbingo za kulila.
Tongwezenu bali ku mushinzi wa Anoni,
ngayi Mowambi unalobeshiwi.
21“Kuyata kunezi ha minzi ya ha mbuwa,
na Holoni na Yahaza na ha Mefwati,
22munzi wa Ndimboni na Nembo,
naha Mbeti Ndibulatayima,
23Kiliyatayimu na Mbeti Ngamuli naha Mbeti Meyoni,
24Keliyoti na Mbozila naha minzi nimwayo ya ku Mowambi ya kwakutali naya hahepi.
25Lushengo lwa Mowambi lunaketuku,
na liboko lyendi linapokoko.”
Eshe nisho anamba Nyambi ya Ngula.
Mowambi ukombatalishiwa
26“Kolweshenu Mowambi ndaba unaliyemeze na kulwisha Nyambi ya Ngula, niho Mowambi ukulivumbavumba mu nebye analuku, pe ukenga wakukendiwa. 27Obe Mowambi, kati Ishalela kaliha wengile wakukendiwa kukwobe ndi? Kati wawaniwile mukati ka bezi ndi? Kati wanengokelenga ku mutwe shikati nimwasho mwambilenga byendi ndi?”
28“Enu mwazika mu Mowambi, shiyenu minzi yenu, yenu mukazike mu mamanya, mufweke ngo litela ukutendela lihwa lyendi kunkumo ya liteke. 29Tunayuvwu kuliyemeza kwa Mowambi, wenga wakuliyemeza shikuma na kuliyemeza kwendi na kulilundumika kwendi na mukeyu wendi na kulitemba kwa mutima wendi. 30Nikulimuka lihandu lyendi, na kulilundumika kwendi kwa mahalo na ntendelo yendi ya mahalo. Eshe nisho anamba Nyambi ya Ngula. 31Haya nikatuwa mbingo hali Mowambi na kulila shikuma hali Mowambi naha bantu ba ku munzi waku Kilahaleshi. 32Nikukulila obe mukolobozi wa shinyanca waku Shimbima, kupitakana eshe nikulila ha bantu ba ku Yaza. Myahi yobe yina kakumu ku liwate na kuhalabila naku munzi wa Yaza. Ngoboni mikabo yenu ya mayinza na mahozozo wenu a shinyanca akalobeshiwa. 33Kutangala na ku wahilila binafumishiwi mu litunga lya wilo lya Mowambi. Nashepeshe waine mu bizongelo bya shinyanca, kowa muntu ukazonga waine na kutenda tunkelenkele twa kubula ku wahilila.
34“Miyoyo ya kulila kwabo yikuyuvwanika kufuma ku Heshimboni kuya ku Eliyale na ku Yahazi, kufuma ku Zowa kuya naku Holonayimu na Engilata Shelishiya, ndaba na mema a Nimolima anayumu. 35Mu litunga lya Mowambi nikamanisha obo batupulanga zintupu zabo ku myanya ya binkanda na kuhokesha incence ku banyambi babo.” Eshe nisho anamba Nyambi ya Ngula.
36“Nohobene mutima wami ukulila hali Mowambi na bantu ba ku Kilahaleshi, ngonehe lwimbo lwa malila ba kushiba ha kanamutolilo. Wuheti bekalile nawo unamana. 37Bantu nimwabo banashehiwi mitwe na milevu nimwayo yinatewuliwi, maboko nimwawo anaketuliwi na zinkanda nimwazo zinavwikiwi na bincancolo. 38Habihoke nimwabyo bya matala amu Mowambi na mu zimbanza muli tuhu mbingo, ndaba ninacancozolo Mowambi ngo ntesho yinanyikwiwi ku muntu nimwendi.” 39Monenu Mowambi eshe anacancoliwi! Yuvwenu eshe ba kukoloma bantu bendi. Monenu Mowambi eshe anabapenzeshe mongo na lisheni! Mowambi wafutukakale kwinga shuma sha kukendiwa, shuma sha kukenduliwa ku nobo nimwabo bamuzinguluka. Eshe nisho anamba Nyambi ya Ngula.
Mowambi kupanza wufwako
40Nyambi ya Ngula ukwamba ngayi, “Monenu, kamalamo ukafwika Mowambi ngonehe ngonga atandubulanga mbando zendi ha kutuka. 41Minzi ya Mowambi yikakoniwa na bipata byawo bikashimbiwa. Ha mutena uyo mitima ya bakanzita Bamowambi yikenga ngo mutima wa mbuyama uli na kubeleka. 42Mukoka wa Mowambi wukulobeshiwa ndaba ya kuhandula Nyambi ya Ngula. 43Bya kutinisha na mankwina na tuntamba bili na kutatilila bantu Bamowambi.” Eshe nisho anamba Nyambi ya Ngula.
44“Ou nimwendi aketuke na kutina, ukawila mu liteke. Ou nimwendi ukakandama na kufuma mu linkwina ukafwa mu kantamba, ndaba nikaleta ha Mowambi mwaka wakushushuliwa kwendi.” Eshe nisho anamba Nyambi ya Ngula.
45“Bantapwa bemanine kushinga kuyavwiwa ku Heshimboni, munzi oku mwene Shihoni alelele shikati shimo, ngoboni uli mu milangi ya mundilo. Mundilo unahokeshe minzi yili hayilu ya mapili oho hekala bakanzita. Bantu ba kuhakiwa ba ku Mowambi. 46Makando wenu enu bantu Bamowambi, mu kulemesha Kemoshi nyambi yenu, ngoboni wuluno munakushushuliwa, bana benu babalume na babambuyama bali mu wuntapwa mu litunga lya bashenge. 47Ngoboni mu matena amamaninino, nikabwesha bitandalisho bya Mowambi.” Eshe nisho anamba Nyambi ya Ngula.
Aha niho hanamanini kuyata Mowambi.
Currently Selected:
Yelemiya 48: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
