Shitatiko 49
49
Yakobo ukulaya bana bendi babalume
1Yakobo wehanine bana bendi babalume,
niho ambile ngayi,
“Kungulukenu hamo,
mwanga nimitongweze,
ebye bikamizilila ku matena a kumbili.”
2“Kungulukenu hamo,
muyuvwe,
enu bana ba Yakobo.
Yuvwililenu kuli tatiyenu Ishalela.”
3“Lubena, obe mweli wami,
obe ngovu zami,
na mwanami wakutatika waha wundumbana wami,
obe muka kulitemba shikuma,
nawa ngovu shikuma ku
bana bami nimwabo babalume.
4Obe ukwinga ngonehe libazi lya kunkwancana,
ngoboni kukenga wamunene wufwako,
ndaba waloyanine na mukazami wa kwinginina,
obe wazilulwile wulili wa tatiyobe.”
5“Shimiyoni na Levi benga muntu na yayiyendi,
bakakuliyavwisha bilwisho byabo na nguma.
6Moyo wami kukaliwana nabo mu nyambilo yabo,
ya tuyebetelo nifwako,
kukekala ku bikungulukilo byabo nifwako,
ndaba bazihile bantu na kupilama,
kami bapokwezele mawulu a zingombe ngayi babahepeshenga.
7Wukali wabo ukutiwe,
ndaba wakutinisha shikuma,
kami mpilamino yabo,
yenga ya nguma shikuma.
Nikabapanzanishila mu litunga
nimwalyo lya Ishalela.
Nikabashandwela mukati ka bantu babo.”
8“Yunda, bawushinda wobe bakakuyemeza.
Ukakoneneka bamalamo bobe ha mukoshi,
pe bana batatiyobe bakakushungumanina.
9 #
Kul 24:9; Kuh 5:5. Yunda ukufweka ngonehe mwana Shimbwi,
wazihanga mbuyo yendi na kuboka mu limfwenke lyendi,
ukalitandubula na kulangana hanci,
pe kowa muntu wakukanca wakumupindula.
10Yunda ukakwata muwana,
na bazukulyendi bakenga bakakubela shikati nimwasho.
Mikoka yika mu tupwila ntupu,
kami bakashungumana kukwendi mu kumwombatala.
11Ukamangila mbongolo wendi ku mukolobozi wa shinyanca,
na mwana mbongolo wendi ku mukolobozi wawuwahe wa shinyanca,
ukayowesha bivwalo byendi mu waine,
na myayi yendi mu waine a kufubila ngo mukeza.
12Meho wendi akufubila ngengu kupitakana waine,
mayewe wendi a kutuba too kupitakana mahwe.”
13“Zembuloni ukekala ha shibumbo sha liwate,
shibumbo shendi shikenga livwe lya mato,
na nginza yendi yika kuma naku shindoni.”
14“Ishaka unengi mbongolo wa kushuma,
ngoboni ukubulumana mukati ka mulaka wa matanga a bambelele.
15Oho aku mona ngayi mwanya wakukatalila wawuwahe,
kami ngayi litunga lilishiwahe,
pe ukunyekeka mongo wendi mu kushimbilaho shiyeko,
na kwitabila kutenda ngonehi ndungo.”
16“Ndani ukenga kalela wa bantu bendi,
nibo bakafweka ngonehi mishobo yamina ya Ishalela.
17Ndani ukenga liyoka waku mbali ya nzila,
na mpili wa wuhungu uli kunkumo ya nzila,
uya wahumanga ku zincinzino za mbishi,
ngayi ou mukakukandamaho mwanga awe nkanta.”
18“Nikutatilila kupulwisha kwobe,
obe Nyambi ya Ngula.”
19“Ngandi bakamupukula na litunga lya bamakombe,
ngoboni ukabalwisha na kubatanda.”
20“Litunga lya Asha likekala na byakulya byabiwahe,
pe ukaholola byakulya byabitobe bya ku fwanina mwene.”
21“Nafwitali wenga shineke wetukanga na kulipokola,
ou wahemanga bana babawahe.”
22“Yoshefwa unengi ngo mukolobozi wayimanga mikabo ya shinyanca,
mukolobozi wayimanga mikabo washangiwa ku kaheloke,
myahi yawo yikuhalabila ha limota.#49:22 Yoshefwa…limota, hinge Yoshefwa unengi ngo mbongolo wa lishaka ha nkumo, mbongolo wa lishaka ku kaheloke, kana ka mbongolo wa lishaka ha nkumo ya shinkanda.
23Bamalamo bendi bamulwishile shibi,
bamukonkele na bipando byabo,
bya mukunzi na mivwi munyima yendi.
24Ngoboni shipando shendi sha mukunzi shabulile kutentebela,
na mikoko yendi yashumine,
na ngovu za Nyambi Mpandashilanga,
Nyambi wa Yakobo,
na ngovu za lizina lya Mulishani,
Limanya lya Ishalela.
25Unengi Nyambi wa tatiyobe,
ou wakuyavwanga,
niye Nyambi Mpandashilanga,
ou wakufwuywelanga,
na mfuywezi za kufuma kuyilu za mvula
na mema a kunonka ku nceto ya limvu,
na mfuywezi za kwikala na bimuna byabingi na bana babengi.
26Mfuywezi za batatiyobe zinengi zazinene,
zinengi zazinene kupitakana mfuywezi za mapili akushikale,
na byuma byabiwahe bya ku binkanda bya mwaya myaka.
Mfuywezi eze mwanga zikale ha mutwe wa Yoshefwa,
ou wahatiwile mukati ka bayayizendi.”
27“Mbenjamani unengi mbinzi wa mutongo,
ku lumenemene ukuziha naku mazolo,
na kulya ebye anakwata.”
28Nimwabo aba banengi mishobo likumi na yibili ya Ishalela, kami eshe nisho ambile tatiyabo kukwabo, aha abatandalishilenga na kulishalisha nabo na mazu amawahe aku fwanina ku mwana na mwana.
Lufu na Kufundiwa kwa Yakobo
29Niho Yakobo alayile bana bendi babalume ngayi, “Hayaboni ami na kuya na kuliwana na bantu bami mu kalunga. Mfundenu hamo na batatizami mu linzolongoma liya lyamu mfuba ya Efweloni wa kahita, 30#Shit 23:3-20.ku makapela ku mushamuko wa Mamele, mu litunga lya Kenaani. Abulahama walandile linzolongoma elye na mfuba kuli Efweloni wa Kahita ngayi yinge binzimbi. 31#Shit 25:9-10; 35:29.Kuyo niko bafundile Abulahama na mukazendi Shala. Niko kami bafundile Ishaki na mukazendi Lambeka. Niko kami na fundile Leya. 32Mfuba na linzolongoma lilimo lyalandiwile ku bahita. Kamfundenu kuyo.” 33#Mil 7:15. Oho Yakobo amanishile kulaya bana bendi, wabokeshele mawulu wendi ha wulili, wafwile pe waliwanine na bantu bendi mu kalunga.
Currently Selected:
Shitatiko 49: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
