Shitatiko 48
48
Yakobo ukutandalisha Efulemu na Manashe
1Oho kwapitile shikati, Yoshefwa wayuvwile ngayi, “Tatiyobe uli na kukola.” Wayile na bana bendi babili babalume, Manashe na Efulemu, kuya mu ku mona tatiyendi Yakobo. 2Oho Ishalela ayuvwile ngayi, “Mwanobe Yoshefwa unezi na kuku mona,” walishumishile pe wakonkomanine ha wulili. 3#Shit 28:13, 14. Yakobo wambile kuli Yoshefwa ngayi, “Nyambi Mpandashilanga waliholwele kukwami ku Luzi mu litunga lya Kenaani na kumfuywela.” 4Wambile kukwami ngayi, “Nikakupanika bana babengi, ngayi bazukulyobe bakavule na kwinga mikoka yayingi. Nikapana litunga elye ku bazukulyobe kwinga likona lyabo mwaya myaka.”
5Yakobo wawezeleleko na kutongweza Yoshefwa ngayi, “Bana bobe babalume babili, aba wabelekelele mu Engepita oho shilolo nikume kuno kukwobe, banengi bami kami. Efulemu na Manashe bakenga bami ngonehe Lubena na Shimiyoni. 6Ndi ukekala na bana bashenge bakenga bobe kaliha bami. Bakatambula likona ha myongo ya Efulemu na Manashe bayayizabo. 7#Shit 35:16-19. Nikutenda nehe ndaba ya mandiyobe Lakele, ou wandetelele wunginga wawunene oho afwililile mu litunga lya Kenaani, oho tuli hahepi na Efulata, oho nafuminenga ku Meshopotamiya. Pe namufundile kunkumo ya nzila yikuya ku Efulata.” Efulata ukutumbiwa lelo ngayi Mbetelehema.
8Oho Ishalela amonene bana ba Yoshefwa wabepwile ngayi, “Aba batwanuke bayani?”
9Yoshefwa wakumbwile ngayi, “Aba banengi bana bami anampana Nyambi kuno ku Engepita.” Yakobo wambile ngayi, “Balete kuno kukwami mwanga nibafwuywele.”
10Kami meho a Ishalela azininikile ndaba ya myaka yendi, pe kaliha watweshele ku mona. Yoshefwa waletele bandumbana kukwendi, niho wababumbatilile na ku bazupeza. 11Pe Ishalela wambile kuli Yoshefwa ngayi, “Kaliha nahanganikile ngayi nika ku mona kami, ngoboni Nyambi unetabili ngayi nimone na banabobe.” 12Pe Yoshefwa wabafumishile ha bilama bya Yakobo, wafunkamine ku manungo na ku nyongamina lupala hanci kumbili yendi.
13Yoshefwa wayakile Efulemu ku liboko lya Ishalela lya shimoho na Manashe ku liboko lya shilyo. 14Ngoboni Ishalela washempakanine maboko wendi na kukambika liboko lyendi lya shilyo ha mutwe wa Efulemu ou wengile wa kanuke na liboko lyendi lya shimoho ha mutwe wa Manashe ou wengile wa mukulwane.
15Niho afwuywelele Yoshefwa#48:15 Yoshefwa: Ha kufwuywela Efulemu na Manashe, mwa shikuma Yakobo wafwuywelele Yoshefwa.
“Mwanga Nyambi.
Ou balemeshelenga batate,
ba Abulahama na Ishaki
afwuywele aba bandumbana.
Mwanga Nyambi,
ou wandamine kuleta
na ku mutena walelo,
abatandalishe.
16Mwanga lingeloyi,
ou wandamwinine ku malamo nimwawo,
abatandalishe,
lizina lyami na lizina lya batate,
ba Abulahama na Ishaki
mwanga akayoyenga mumwabo aba bandumbana.
“Mwanga bakekale na bana babengi na bazukulu babengi.” 17Yoshefwa wapilamine oho amonene ngayi tatiyendi wakambikile liboko lyendi lya shilyo ha mutwe wa Efulemu nohobene wakwatile ku liboko lya tatiyendi na kulihenyesha kufumisha ha mutwe wa Efulemu na kuliyaka ha mutwe wa Manashe. 18Wambile kuli tatiyendi ngayi, “Kaliha nehe tate. Ou niye mukulwane, kambika liboko lyobe lya shilyo ha mutwe wendi.”
19Ngoboni tatiyendi wakanine, pe wambile ngayi, “Mwanami hinilimuka, nikulimuka ngayi bazukulya Manashe kami bakenga babengi. Ngoboni mukonzo wendi ukenga wamunene kumupitakana, kami bazukulyendi bakenga mushobo wawunene.”
20 #
Bah 11:21. Nohobene wabafwuywelele ha mutena uyo na kwamba ngayi, “Baishalela bakaliyavwisha mazina wenu oho bakamba habya mfuywezi. Nibo bakamba ngayi, ‘Mwanga Nyambi aminge ngo Efulemu na Manashe.’” Mu ntendelo eye Yakobo wayakile Efulemu kumbili ya Manashe.
21Niho Ishalela ambile kuli Yoshefwa ngayi, “Mona, nili hahepi na kufwa, ngoboni Nyambi ukekala hamo na nobe, kami ukakubwesha ku litunga lya batatizobe. 22Napana litunga lya Shekemu kukwobe tuhu, kaliha ku bayayizobe. Inengi mbalila ya wilo iya nayangile Baamoli na mukwale wami na shipando shami sha mukunzi.”
Currently Selected:
Shitatiko 48: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
