Shitatiko 45
45
Yoshefwa ukulilubulula kuli bayayizendi
1 #
Mil 7:13. Yoshefwa kaliha watweshele kulishumisha kumbili ya bakamilimo bendi, niho ambile ngayi batutwishe bantu nimwabo ha munkanda. Kowa muntu washenge ekalile nendi oho Yoshefwa atongwezelenga bayayizendi ngayi niye nengi yani. 2Walilile shikuma na kuhwizumuka ngayi Baengepita bayuvwileko na mbuzi yatwaliwile mu musheke wa Fwalo. 3Yoshefwa wambile ku bayayizendi ngayi, “Ami Yoshefwa. Kati tate ushili kuyoya ndi?” Ngoboni bayayizendi bekalile na bowa shikuma kami kaliha batweshele ku mu kumbula. 4Niho Yoshefwa ambile kukwabo ngayi, “Nikuminyepa ngayi muhenyene kwakwipi.” Bezile kwakwipi, pe wambile ngayi, “Ami mukonzowenu Yoshefwa, ou mwalandishile ku Baengepita. 5Haya hinga mulikekula, hinge kulihepa enu bamwine ndaba ngayi mwandandishile kuno. Mwa shikuma wengile Nyambi, ou wantumine kumbili yenu mu kuyoyesha wumi wa bantu. 6Ou niwo mwaka wawubili tuhu wa kapande mu litunga. Kukekala myaka mutanu kami eye ya kubula kulima hinge kuteza. 7Nyambi wantumine kumbili yenu mu kulamwina mu nzila eye ya kukomokesha na ku mona ngayi enu na bazukulyenu mukayoye. 8Nohobene, mwa shikuma kaliha enu mwantumine kuno, ngoboni Nyambi. Niye unanyingishi kwinga shilolo wa mukulwane kuli Fwalo. Nili na kulama litunga lyendi nimwalyo na kalela wa nimwabo bamu Engepita.
9 #
Mil 7:14. “Haya nyankupenu muboke kuli tate na kumutongweza ngayi, ‘Eshe nisho akwamba mwanobe Yoshefwa ngayi Nyambi unanyingishi kalela wa Engepita nimwayo, yekenu kukwami hinga mwihala boha. 10Mukutwesha kuzika mu litunga lya Ngosheni mu Engepita, oku mu kutwesha kwikala hamo na nami, enu na bana benu na bazukulyenu na matanga a bambelele na bampongo na zingombe zenu na nimwabyo biya muli nabyo. 11Shinga muli mu Ngoshena nikutwesha kumifulankana. Kukekala myaka mutanu ya kapande, pe kushinga nifwako ngayi enu na ba lupashi lwenu na matanga enu mulanduke ku nzala na kwinga bancepwe.’”
12Yoshefwa wawezeleleko kwamba ngayi, “Nimwenu na nobe kami Mbenjamani, mu kutwesha ku mona ngayi mwa shikuma amibene Yoshefwa. 13Tongwezenu tate ngayi ami nili na maleema amanene shikuma muno mu Engepita, kami mukamutongweze ha byuma munamono. Niho, mukanyankupishe mukalete batate kuno.”
14Niho akilukilile mu ncingo ya mukonzo wendi Mbenjamani pe watatikile kulila, Mbenjamani kami walilile oho amubumbatilile. 15Yoshefwa wabumbatalile bayayizendi kami nimwabo, oku hapwezuma kulila. Wabazupezele umo na wamina. Kufuma haya bayayizendi batatikile kwamba nendi.
16Oho mbuzi ya kumine ku musheke wa mwene ngayi bayayizendi Yoshefwa banezi, Fwalo na babilolo bendi bawahililile shikuma. 17Fwalo wambile kuli Yoshefwa ngayi, “Tongweza bayayizobe balonge byuma ha bimuna byabo, pe baboke ku litunga lya Kenaani. 18Baye, bakashimbe tatiyobe na ba lupashi lwabo, pe baboke kuno kukwami. Nikabapanika litunga lyaliwahe mu Engepita, nohobene bakekala na byabingi bya kubayoyesha. 19Kami ubatongweze ngayi bashimbe makoloyi aku Engepita, awa amanene ali na bilembalemba hayilu, bakendemo bakazabo na batwanuke babashe na kwiza hamo na tatiyabo. 20Hinga alifulankana bya ku shiya wuheti wabo, byabiwahe nimwabyo bya mu litunga lya Engepita bikenga byabo.”
21Bana ba Ishalela babalume batendele nehe abatongwezele. Yoshefwa wabapanikile makoloyi amanene ali na bilembalemba hayilu, ngonehe ambile Fwalo, kami wabapanikile byakulya byaha mukala. 22Ku muntu na muntu kami wabapanikile bivwalo byabipya, ngoboni Mbenjamani wamupanikile myanda yihatu ya shiliva na bivwalo mutanu byabipya. 23Watuminine tatiyendi bambongolo likumi bashimbile ntutu yayiwahe shikuma ya mu Engepita na bambishi kami likumi bashimbile byakulya na mankende na byakulya byamina bya ha mukala. 24Wafunzwile bayayizendi ha mukala wabo, pe oho bakatukilenga, wambile kukwabo ngayi, “Hinga mulyamba mu nzila.”
25Bafumine ku Engepita, bakumine ku Kenaani kuli tatiyabo Yakobo. 26Bambile ngayi, “Yoshefwa ushili kuyoya, unengi kalela wa litunga lya Engepita.” Yakobo walikomokele ndaba kaliha watweshele kuba kulupila.
27Ngoboni oho Yakobo bamutongwezele nimwabyo biya ambile Yoshefwa kukwabo, kami oho amonene makoloyi awa atumine Yoshefwa akumutwala ku Engepita, washumankanine. 28Niho Ishalela ambile ngayi, “Haya kunamana. Mwanami Yoshefwa ushili kuyoya. Niku fwanina kuyako ngayi nikamumone hano nishili kuyoya.”
Currently Selected:
Shitatiko 45: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
