Shitatiko 46
46
Yakobo na ba lupashi lwendi bakuya ku Engepita
1Ishalela walongele nimwabyo ebye ekalile nabyo pe wayile ku Mbelishemba, oku akakombelelele zinkombela kuli Nyambi wa tatiyendi Ishaki. 2Pe Nyambi wambile kuli Ishalela na shimono ku wushiku, niho amwihanine ngayi, “Yakobo, Yakobo.” Wakumbwile ngayi, “Ami wuno Hekulu.”
3Nyambi wambile ngayi, “Ami nenga Nyambi wa tatiyobe. Hinga wutina kuya ku Engepita, ndaba nikanenehesha bazukulyobe kwinga mushobo wawunene. 4Nikaya hamo na nobe ku Engepita, pe kami nikabwesha bazukulyobe ku litunga lino. Pe Yoshefwa ukekala na nobe oho ukafwa.”
5Ishalela wafumine ku Mbelishemba, kami bana bendi bayakile tatiyabo Yakobo na bana babo babashe na bakazabo mu makoloyi, awa atumine Fwalo ngayi akabashimbe. 6#Mil 7:15. Bashimbile matanga a bimuna byabo na ntutu eye bahetele mu Kenaani, pe bayile ku Engepita. Yakobo wayile na ba lupashi lwendi nimwalwo, 7bana bendi babalume na bazukulyendi babalume na bana bendi babambuyama na bazukulyendi babambuyama, nimwabo wayile nabo ku Engepita.
8Awa niwo mazina a bazukulya Ishalela ayile nabo ku Engepita. 9Bengile Lubena, mweli wa Yakobo wa mulume na bana bendi babalume, Hanoki na Palu na Heziloni na Kalimi. 10Shimiyoni na bana bendi babalume, bengile Yemuwele na Yamini na Ohandi na Yakini na Zohali na Shaule mwanendi wakuli mbuyama waku Kenaani. 11Levi na bana bendi babalume, bengile Ngeshona na Kohati na Melali. 12Yunda na bana bendi babalume, bengile Shila na Pelizi na Zela. Ngoboni bana bendi babalume bamina Ela na Onani bafwililile mu Kenaani. Bana ba Pelizi bengile Heziloni na Hamula. 13Ishaka na bana bendi babalume, bengile Tola na Puwa na Lombu na Shimiloni. 14Zembuloni na bana bendi babalume, bengile Shelendi na Eloni na Yalelu. 15Aba nibo bana ba Leya babalume aba abelekelele kuli Yakobo mu Meshopotamiya, hamo na mwanendi wa mbuyama Ndayina. Bazukulyendi nimwabo balabiwile bengile 33.
16Ngandi na bana bendi babalume bengile Zefwiyoni na Hangi na Shuni na Ezimboni na Eli na Alondi na Aleli. 17Asha na bana bendi babalume bengile Imina na Ishiva na Ishivi na Mbeliya na mpanzabo Shela. Bana ba Mbeliya babalume bengile Hemba na Malikela. 18Aba 16 bengile bazukulya Yakobo kuli Zilipa, ou Lambani apanikile kuli Leya mwanendi wa mbuyama.
19Mukazendi Yakobo, Lakele wamubelekelele bana babili babalume, Yoshefwa na Mbenjamani. 20#Shit 41:50-52. Manashe na Efulemu bahemuwile kuli Yoshefwa mu Engepita kuli Ashinati mwana Potifwela wa mbuyama, mukankombela wamu Oni. 21Bana ba Mbenjamani babalume bengile Mbela na Mbeka na Ashembela na Ngela na Naamani, Ehi na Loshi, Mupimi na Hupimi na Andi. 22Aba likumi na banaa bengile bazukulya Yakobo kuli Lakele.
23Ndani na mwanendi wa mulume Hushimu. 24Nafwitali na bana bendi babalume, bengile Yazilu na Nguni na Yeza na Shilema. 25Aba mutanu na babili bengile bazukulya Yakobo kuli Mbiliha ou apanikile Lambani kuli mwanendi wa mbuyama Lakele kwinga ndungo yendi.
26Wingi wabo aba ba kutoyiwa ngayi bazukulya Yakobo, aba bayile ku Engepita bengile 66, kubula kulabako bakowendi ba bambuyama. 27#Mil 7:14. Kuyakaho bana babili babalume bahemuwilile kuli Yoshefwa mu Engepita, wingi wa ba lupashi lwa Yakobo bakumine ku 70, aba nibo bayile ku Engepita.
Yakobo na ba lupashi lwendi mu Engepita
28Yakobo watumine Yunda kuli Yoshefwa mu kumutongweza ngayi akabashimbawile ku Ngosheni. Oho Yakobo na ba lupashi lwendi bakumine ku litunga lya Ngosheni, 29Yoshefwa wakandamine mu koloyi yendi, pe wayile ku Ngosheni mu ku shimbawila tatiyendi Ishalela. Oho baliwanine, Yoshefwa wabumbatilile tatiyendi, pe walilile shikati shashitali, 30pe Ishalela wambile kuli Yoshefwa ngayi, “Haya shinawaha, aha naku monakale na kulimuka ngayi ushili kuyoya hinge nifwu howa ndaba.”
31Niho Yoshefwa ambile kuli bayayizendi na kuli ba lupashi lwa tatiyendi ngayi, “Niku fwanina kuya na kutongweza Fwalo ngayi bayayizami na ba lupashi lwa batate, aba bekalilenga ku Kenaani, banezi kukwami. 32Nikamutongweza bantu aba benga balishani babimuna, banalete matanga wabo a bambelele na matanga wabo a zingombe na byuma nimwabyo biya bekala nabyo. 33Oho Fwalo akamihana na kumipula ngayi mulimo wenu mulimo ngani, 34mu ku fwanina kumutongweza kupwisha ngayi, ‘Etu, hekulu, tuli balishani babimuna kubalika ku shikati sha wanuke wetu, ngonehe batendelenga batatizetu.’ Mu nzila eye ukutwesha kumitabila kuzika mu Ngosheni mu litunga lya Engepita.” Yoshefwa wambile eshe ndaba Baengepita bakendelenga bya kubuyisha.
Currently Selected:
Shitatiko 46: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
