Shitatiko 44
44
Nkomoki ya kuyongala
1Yoshefwa watongwezele shamanga wamu litala lyendi ngayi, “Yinzalishenu zimpamba za bantu aba na byakulya ngo omu ba kutweshela kushimba na kuyaka mali a muntu na muntu ku kanwa ka mpamba yendi. 2Pe, yaka nkomoki yami ya shiliva ku kanwa ka mpamba ya mukonzowabo wa mukaala, hamo na mali a byakulya byendi.” Shamanga watendele ngonehi amutongwezele Yoshefwa. 3Oho kwashile lumenemene, babalehele ngayi baye ha mukala wabo hamo na bambongolo babo. 4Oho bendele tuhu mukala wawipi kufuma ku lukena, Yoshefwa wambile kuli Shamanga wamu litala ngayi, “Nyankupila baya bantu, ukabepule ngayi, ‘Shumangani munabweshele byabibi ku byabiwahe? 5Shumangani munayibili nkomoki ya hekulyami ya shiliva? Eye nkomoki ya hekulyami niyo anwinanga, kami niyo abukishanga ku mona bya kumbili. Munatende mulandu wawunene shikuma.’”
6Oho shamanga abawanine, wabokelele kwamba mazu awa. 7Nibo bamukumbwile ngayi, “Shumangani ukwambila awa mazu obe hekulyetu? Hinga twatanga kuhanganika kutenda shuma shanehe. 8Nka obe wamonene haya twafuma ku litunga lya Kenaani ngayi twabwesha mali kukwobe, awa twawanine ku tunwa twa zimpamba zetu. Shumangani boni tuku fwanina kuyibila shiliva hinge ngolinde ku litala lya hekulyobe? 9Hekulu ndi umo hakatiketu ukuwaniwa uli nayo, pe azihiwe tuhu, baya ba kushalaho bakenga bandungo bobe.”
10Shamanga wambile ngayi, “Ami netabili. Ngoboni ndi umo hakati kenu ukuwaniwa uli na nkomoki ukenga ndungo yami, aba banashalaho bakatwesha ku shoboloka.” 11Niho banyankupishile kutula zimpamba zabo hanci, pe muntu na muntu washobwele mpamba yendi. 12Shamanga wa Yoshefwa washinga shingile, kutatika nawa mukulwane na kumanishilila na wakanuke, pe nkomoki yawaniwile mu mpamba ya Mbenjamani. 13Niho bayayizendi Yoshefwa batabwele bivwalo byabo mu wunginga, balongele bambongolo babo pe babokele ku lukena.
14Oho Yunda na bayayizendi bakumine ku litala lya Yoshefwa, oho ushili kwendela hahataliko nanibo, balambilile kumbili yendi. 15Pe Yoshefwa wambile ngayi, “Bishini ebye munatende? Kati enu kulimuka mufwako ngayi muntu wakwinga ngo ami nikutwesha kubuka bya kumbili ndi?”
16Yunda wambile ngayi, “Tukutwesha kwamba nahiti kukwobe obe hekulu? Tukutwesha kulikanangana nahiti? Tukutwesha kuliyawila nahiti etu bamwine? Nyambi unawana milandu yetu, hekulu. Nimwetu mwetu hekulu, haya tuli bandungo zobe kaliha umo tuhu ou unawaniwi na nkomoki yobe.”
17Ngoboni Yoshefwa wambile ngayi, “Haa! Byo. Ami kutwesha kutenda noho nifwako. Ndele tuhu umo ou unawaniwi na nkomoki yami ukenga ndungo yami. Baya banashalaho kukwenu mukaboka banzimba kuli tatiyenu.”
Yunda ukulambilila Mbenjamani
18Yunda wahenyenene kuli Yoshefwa na kwamba ngayi, “Nikukunyepa hekulu, unyintabile nambe nobe shiwahe. Hinga ukaliha na nami, obe unengi ngonehe Fwalo niyemwine. 19Hekulu, obe watwipwile ngayi, ‘Muli na tatiyenu hinge mukonzowenu ndi?’ 20Twakumbwile kuli hekulyetu ngayi, ‘Tuli na tatiyetu wakakulukazi na mukonzowetu wakubelekela mu wukulwane. Yayiyendi kami wafwa, pe washala ninkayendi kulivumo lya bamandiyendi, niye tuhu ushili kuyoya ku bana babo. Tatiyendi wamuhaka shikuma.’ 21Hekulu, obe watutongwezele ngayi, ‘Mukeze nendi mukonzowenu, ngayi nitweshe kumumona.’ 22Pe hekulu twakukumbwile ngayi, ‘Kanuke kutwesha ku shiya tatiyendi wufwako. Ndi ukushiya tatiyendi pe tatiyendi ukafwa.’ 23Niho obe hekulu wambile ngayi, ‘Enu mufwako kuketabilishiwa ku meho wami, hantu mukeze na mukonzowenu wa mukaala hamo.’
24“Oho twabokele kuli mukamulimo wobe tatiyetu, twamutongwezele biya wambile hekulu. 25Niho atutongwezele ngayi tuboke tuye na kulandilaho byakulya byamina. 26Twakumbwile ngayi, ‘Kutwesha kuya tufwako, ndaba owo muntu wufwako kukatwitabilisha ku meho wendi, ndele mukonzowetu wa mukaala tuye nendi. Tukutwesha kuya ndi na mukonzowetu ukuya.’
27“Tatiyetu wambile kukwetu ngayi, ‘Mukulimuka ngayi mukazami Lakele wambelekelele bana babili babalume. 28Umo kukwabo wanciya. Nikuhanganika ngayi uku fwanina kuliwa ku tunzama twa mu lishaka ndaba hinga ayila kumumona nifwako. 29Haya ndi mu kushimba kami ou mukonzo wendi, ndi shuma shimo shashikalu shikamuwana, mu kuncingishila wunginga ukandetelela kufwa hashikati sha wukulukazi wakukuma hano nakumu.’”
30Yunda wawezeleleko kwamba ngayi, “Pe haya hekulu, ndi nikaboka kuli batate kwakubula ou kanuke, pe bakamona ngayi kanuke nifwaye, bakafwa ndaba niye bakinka mutima. 31Wunginga ou tukamushingishila, hekulu, ukamutwala kukufwa ndaba na kulumpala shikuma, pe etu tukanyanciwa haneshe. 32Shinene na ya kamo wumi wami kuli batate hali ou kanuke. Namutongwezele ngayi ndi kuleta ou kanuke ku kwobe nifwako pe nikanyanciwe ku meho wabo matena nimwawo akuyoya kwami. 33Nohobene haya hekulu, nikekala kuno kwinga ndungo yobe kuhinga muli ou kanuke, mulehe aboke na bayayizendi. 34Ami nikaboka nahiti kuli batate ndi ou kanuke nifwaye? Kutwesha kukamona makando awa akezilila batate nifwako.”
Currently Selected:
Shitatiko 44: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
