Shitatiko 41
41
Yoshefwa ukutontolola milo ya Mwene
1Oho kwapitile myaka yibili, Fwalo walotele ngayi wemanine ku mushinzi wa Nayilo, 2oho zingombe mutanu na zibili zaziwahe za kushuwa zatumpukile ha mushinzi wa Nayilo pe zatatikile kubuya mwila wa matete. 3Niho zingombe zamina mutanu na zibili zatumpukile ha mushinzi wa Nayilo, zengile za kuyonda kami zabifupafupa. Zezile na kwimana na zingombe zamina ku shibumbo sha mushinzi. 4Niho zingombe za kuyonda zalile zingombe za ku shuwa, pe Fwalo watampukile. 5Wabokelele mutulo niho alotele mulo wamina kami, mu mulo wamonene mapumpwa mutanu na abili akuyima shiwahe, hinga emana ha lutende lumo, engile akuhoka. 6Niho kami mapumpwa mutanu na abili amanene niwo engile akunyata aminine mapumpwa mutanu na abili akuyima shiwahe. Mwene watampukile pe wawanine ngayi nalotonga. 7Pe mapumpwa akunyata aminine mapumpwa mutanu na abili akuyima shiwahe. Fwalo watampukile pe wawanine ngayi nalotonga. 8#Nday 2:2. Kulumenemene walikekwile, niho ehanine bakamalele nimwabo na bakangana bamu Engepita. Pe wabatongwezele milo yendi, ngoboni kowa muntu watweshele kuyitontolola kukwendi.
9Niho Kawaba ambile kuli Fwalo ngayi, “Lelo niku fwanina kulitabila ngayi natendele shibi. 10Obe wakalihilile bakamilimo bobe na kuyaka kawaba na kankemba waku musheke mu tolongo mu litala lya shilolo wa mukulwane wa bakakulama. 11Wushiku umo twalotele muntu na muntu na mulo wendi, pe mulo na mulo wekalile na kutontoloka kwawo. 12Twekalile na ndumbana wa Kahebelu muyo, ndungo wa mukulwane wa bakakulama ku tolongo. Pe oho twamutongwezele milo yetu, wayitontwelele kukwetu, muntu na muntu wamutongwezele kutontoloka kwa mulo wendi. 13Nohobene byuma byatendiwile ngonehe atontwelelebyo. Ami nabokeshiwile mu mwanya wami, ngoboni kankemba wayatiwilile kufwa.”
14Niho Fwalo ehanine Yoshefwa, pe bamufumishile mu tolongo wanguwangu na kumuleta. Oho amanishile kulitewula, wavwalile bivwalo byendi byashenge, wezile ku meho a mwene. 15Fwalo wambile kuli Yoshefwa ngayi, “Ami naloto mulo, pe kowa muntu unatweshe kuwu tontolola. Niho banantongweze ngayi obe ukutwesha kuwu tontolola.”
16Yoshefwa wakumbwile Fwalo ngayi, “Obe mwene wa ngoma, ami kutwesha nifwako. Ngoboni Nyambi ukukupana kutontolola kwakuwahe.”
17Fwalo wambile kuli Yoshefwa ngayi, “Ami nalotele hinga nemana ku shibumbo sha Nayilo, 18niho namonene zingombe za bitole mutanu na zibili za kushuwa zaziwahe zatumpukile ha mushinzi wa Nayilo pe zatatikile kubuya mwila wa matete. 19Namonene kami zingombe za bitole za mutanu na zibili za tumpukile kunyima yazo, nizo zenga za kuyonda kami za bifupafupa, zenga zingombe za ku kwanzuluka shikuma hinga natanga kuzimona mu litunga nimwalyo lya Engepita. 20Zingombe eze za kuyonda zalile zingombe za kushuwa. 21Ngoboni oho zingombe za kuyonda zalile zingombe za ku shuwa, zamonekele hinga zenga za ku kwanzuluka ngo ha kutatika. Niho natampukile mutulo. 22Kami mu mulo wami namonene mapumpwa mutanu na abili akuyima shiwahe, anemana ha lutende lumo hinga enga akuhoka. 23Niho kami namonene mapumpwa mutanu na abili, niwo enga akunyata akulebuka na mpepo ya ku mushamuko. 24Mapumpwa akunyata aminine mapumpwa mutanu na abili akuyima shiwahe natongweza mulo ku bakamalele, ngoboni kowa muntu watwesha kuyitontolola kukwami.”
25Yoshefwa wambile kuli Fwalo ngayi, “Milo yibili yikutontolola shuma shimo ngayi Nyambi unakuholwele eshe akatenda. 26Zingombe mutanu na zibili za ku shuwa zikwinga myaka mutanu na yibili na mapumpwa mutanu na abili akuyima shiwahe, kami yinengi myaka mutanu na yibili, kunengi kutontoloka kumo. 27Zingombe mutanu na zibili zatumpuka kunyima yazo zinengi myaka mutanu na yibili na mapumpwa mutanu na abili a mbuto ya kulebuka na mpepo yaku mushamuko kami yinengi myaka mutanu na yibili ya kapande. 28Shinengi ngonehe nakutongweze, Nyambi unakumoneshe ebye akatenda. 29Kukeza myaka mutanu na yibili ya byakulya byabingi, mu litunga nimwalyo lya Engepita. 30Ngoboni kwakapita myaka mutanu na yibili ya kapande, myaka nimwayo yayiwahe yika vulamiwa mu Engepita, kapande kakalobesha litunga. 31Shikati sha byakulya byabingi shikavulamiwa, ndaba kapande kakeza kakaneneha shikuma. 32Ndaba ngayi ku bokela kwa milo yobe yibili, ku kutontolola ngayi Nyambi unashumishi eshe shambo nohobene, shikamoneka ku matena ali hahepi kumbili.
33“Haya, obe hekulu, uku fwanina kuhata muntu wa kukeya wa ngana pe umuyake mu wukulwane wakulama Engepita. 34Uku fwanina kami kwimika babilolo ha litunga lya Engepita, kami shimba shitika shimo sha mutanu sha mbuto ya myaka mutanu na yibili ya byakulya byabingi. 35Baku fwanina kukungwisha mbuto ya byakulya nimwabyo mukati ka myaka eye yayiwahe yikwiza, ba ku fwanina kutenda mu ngovu zobe kukungwisha mbuto ya byakulya mu minzi na kubikoweza. 36Byakulya biku fwanina kukongiwa ngayi bikapanikiwe ku litunga ha shikati sha myaka mutanu na yibili ya kapande, akakakeza mu Engepita, ngayi bantu bamu litunga bakabule kufwa kukapande.”
Yoshefwa Bakumwingisha Kalela mu Engepita
37Fwalo na babilolo bendi betabilile shambo eshe, 38pe fwalo wambile kukwabo ngayi, “Kuti oku tukutwesha kuwana muntu wamuwahe wakupitakana Yoshefwa, ou uli na Moyo wa Nyambi mumwendi?” 39Nohobene Fwalo wambile kuli Yoshefwa ngayi, “Aha Nyambi anakumoneshe ebye nimwabyo, kowa muntu wakukeya ou uli na ngana shikuma hinge wakukeya shikuma kukupitakana obe. 40#Mil 7:10. Nikakuyaka ha litanda kwinga mukakulama litunga lyami, pe bantu bami nimwabo bakwombatala ndayano zobe. Ngovu zobe zikenga za wubili kukwami.” 41Niho Fwalo ambile kuli Yoshefwa ngayi, “Mona, ami nakwimiki kwinga kalela mu Engepita nimwamo.” 42#Nday 5:29. Fwalo niho avulile kambalamunwe ka limango lya wene ku munwe wendi niho akayakile ku munwe wa Yoshefwa, wamuvwalikile bivwalo bya kulelema byabiwahe na kuyaka nketwana za ngolinde mu ncingo yendi. 43Wamukandamishile ha Koloyi yendi ya wubili, pe bakakulama mwene bayile kumbili yendi na kubilika ngayi, “Shanukenu mu nzila, Shanukenu mu nzila.” Hano Yoshefwa wemikiwakale kwinga kalela mu Engepita nimwamo. 44Niho mwene Fwalo ambile kuli Yoshefwa ngayi, “Ami nili mwene, kwakubula ngovu zobe kowa muntu ukatenda shuma shamina mu litunga lya Engepita nimwamo kwakubula obe kumwitabilisha.” 45Fwalo watumbile lizina Yoshefwa ngayi Zafwinati Paneya, pe wamupanikile mbuyama lizina lyendi Ashinati, mwana Potifwela mukankombela wamu lukena lwa Oni. Pe Yoshefwa wapitilenga mu litunga nimwamo lya Engepita.
46Yoshefwa wekalile na myaka makumi ahatu oho abalikile kutendela milimo mwene wa Engepita. Wakatukile ku musheke wa mwene na kupita mu litunga nimwalyo. 47Ha myaka mutanu na yibili ya byakulya byabingi, litunga lyalimine byakulya byabingi. 48Yoshefwa wakungwishile byakulya nimwabyo ku myaka mutanu na yibili oho kwekalile byakulya byabingi mu litunga lya Engepita, pe watentekele byakulya mu munzi. Mu munzi na munzi mwakongiwilenga byakulya binafumu mu mafuba anazingulukuko. 49Watentekelenga byakulya byabingi biya byengile ngo lihekelela lya liwate. Kwekalile byakulya byabingi ngayi shamukwangile sha kubifwanikiza, ndaba kaliha shatweshekele kutendiwa.
50Oho shilolo myaka ya kapande yikume, Yoshefwa wekalile na bana babili babalume kuli Ashinati, mwana Potifwela mukankombela waku Oni. 51Niho Yoshefwa watumbile lizina mwanendi wa mweli ngayi Manashe ndaba wambile ngayi, “Nyambi unamvulamishi makando wami nimwawo na ba lupashi lwa batate nimwabo.” 52Nohobene watumbile mwanendi wa mulume wawubili ngayi Efulemu, ndaba wambile ngayi, “Nyambi unampaniki bana mu litunga lya makando.”
53Myaka mutanu na yibili ya byakulya byabingi shikuma yiya yekalile mu litunga lya Engepita ya ku wahilila yamanine, 54#Mil 7:11. kami myaka mutanu na yibili ya kapande yatatikile kwiza ngonehe ayitoyele Yoshefwa. Kwekalile kapande mu matunga amina nimwawo, ngoboni mu litunga lya Engepita mwekalile byakulya. 55#Yowa 2:5. Oho litunga nimwalyo lyatatikile kwikala na nzala bantu bakalokelele kuli Fwalo ha byakulya. Watongwezelenga Baengepita nimwabo ngayi, “Yenunga kuli Yoshefwa mukatende nimwabyo ebye akamba.” 56Oho kapande kakonkanine mu litunga nimwalyo, Yoshefwa washinkwilile bishete nimwabyo byakulya na kulandisha byakulya ku Baengepita, ndaba kapande kanenehele shikuma mu litunga lya Engepita. 57Bantu bezilenga ku Engepita kufuma ku matunga nimwawo mu kulanda byakulya kuli Yoshefwa, ndaba kapande kengile kakanene shikuma hano hanci nimwaho.
Currently Selected:
Shitatiko 41: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
