Shitatiko 42
42
Bayayizendi Yoshefwa bakuya ku Engepita na kulanda byakulya
1Oho Yakobo ayuvwile ngayi mu Engepita muli byakulya, wambile kuli bana bendi ngayi, “Hinga mulipenza tuhu ku meho? 2#Mil 7:12. Ami nayuvwu ngayi ku Engepita kuli byakulya. Yenuko mukalandeko byakulya ngayi twize tuyoye kutina tufwa ku nzala.” 3Nohobene bayayizendi Yoshefwa likumi bayile ku Engepita mu kulandako byakulya. 4Yakobo kaliha watumine Mbenjamani, mukonzo wa Yoshefwa wakumukonka mu likoshi, ndaba watinine ngayi kampe kukekala shuma shashikalu shikamwizilila.
5Bana ba Ishalela bayile mu kulanda byakulya, hamo na bantu bamina, ndaba kwekalile kapande mu litunga lya Kenaani. 6Yoshefwa wengile kalela mu litunga lya Engepita, walandishilenga byakulya ku bantu nimwabo ba hano hanci. Nohobene bayayizendi Yoshefwa bezile na ku shintama hanci na kulamba ku meho wendi. 7Oho Yoshefwa amonene bayayizendi wabalimukile, ngoboni wengile ngo ku balimuka wufwako. Pe wabepwilenga na kukaliha ngayi, “Mukufuminina kuti?”
Bamukumbwile ngayi, “Tukufuma ku litunga lya Kenaani, tunezi mu kulanda byakulya.”
8Yoshefwa walimukile bayayizendi ngoboni nibo kaliha bamulimukile. 9#Shit 37:5-10. Pe Yoshefwa wanukile milo yiya abalotelelele, niho ambile ngayi, “Enu muli bakakuhokela, munezi mu ku mona wuboto wa litunga.”
10Bamukumbwile ngayi, “Byo hekulu, etu bakamilimo bobe tunezi mu kulanda byakulya tuhu. 11Etu nimwetu twenga mulwetu, kaliha tuli bakakuhokela hekulu, etu tuli bantu bakulunga.”
12Yoshefwa wambile kukwabo ngayi, “Byo, munezi mu ku mona oku kuli wuboto wa litunga lyetu.”
13Bambile ngayi, “Etu, twekalile likumi na babili mulwetu hekulu, bana ba muntu umo mu litunga lya Kenaani. Wamukala wetu unashala na tatiyetu, kami wamina mukonzowetu wafwa.”
14Yoshefwa wakumbwile ngayi, “Eshe nisho nambili ngayi enu muli bakakuhokela.”
15Eshe nisho mukezekiwa, nikubeza mu lizina lya Fwalo ngayi kukafuma kuno mufwako, hantu mukonzowenu wa mukaala unezi. 16Tumenuho umo kukwenu akamulete. Aba ba kushalaho kukwenu ba kulamiwa hantu kupwisha kwanebye munamba kunezekiwi. Nikubeza mu lizina lya Fwalo, enu mwa shikuma muli bakakuhokela. 17Pe wabayakile mu tolongo matena ahatu.
18Ha mutena wawuhatu Yoshefwa wambile kukwabo ngayi, “Ami nili muntu wakutina Nyambi. Nohobene mukayoya ndi mukutenda eshe, 19ku monesha ngayi muli bantu bakulunga, lehenu umo kukwenu ashale kuno mu tolongo, muyo munekalanga na kulamiwa. Enu nimwenu munashalaho mukaya mu kutwala byakulya ebye munalanda ku ba lupashi lwenu bali na kapande. 20Mu ku fwanina kukeza na mukonzowenu wa mukaala kukwami, shimoneke ngayi munamba bya kupwisha, pe kukamiziha nifwako.”
Betabilile kuneshe. 21Niho balyambishile ngayi, “Ee, etu tuli na mulandu kunebye twatendele hali mukonzowetu. Twamonene makando amanene awa ekalile nawo oho alambilile ngayi tumuyavwe, ngoboni kaliha twamuyuvwililile. Nisho shuma shiya tuli mu makando awa.” 22#Shit 37:21, 22. Lubena wambile ngayi, “Nka namitongwezele ngayi hinga mutenda shibi kuli kanuke, ngoboni enu kaliha mwanyuvwile. Pe haya tuli na kuyumba mulandu wa lufu lwendi.” 23Yoshefwa wayuvwile ebye bambilenga, ngoboni nibo kaliha balimukile ndaba bambilenga kukwendi kupitila mu mukakutontolola. 24Yoshefwa wafumine kukwabo pe walilile. Oho atweshele kwamba kukwabo kami, wabokele pe washimbile Shimiyoni na kumumangila ha meho wabo.
Bayayizendi Yoshefwa ba kuboka ku Kenaani
25Yoshefwa walayile ngayi benzalishe zimpamba zabo na byakulya na kubwesha mali ku mpamba ya muntu na muntu na kubapana byakulya bya ha mukala. Eshe shatendiwile kukwabo. 26Bayayizendi balongele ha bambongolo byakulya ebye balandile, pe bayile. 27Ku matulilo okubalalile wushiku, umo kukwabo washobwele ku mpamba yendi ngayi alishe mbongolo yendi, pe wawanine mali ku kanwa ka mpamba yendi. 28Watongwezele bawushinda wendi ngayi, “Ami mali wami anaboko, amibene ali mumpamba yami.” Mitima yabo yapopele. Bekalile na bowa wawunene na kulipula umo na wamina ngayi, “Shumangani eshe anatende Nyambi kukwetu?”
29Oho bakumine kuli tatiyabo Yakobo mu Kenaani, bamutongwezele nimwabyo biya byamonekele kukwabo ngayi, 30“Kalela wambile kukwetu na wukali, pe watwambilile ngayi, ‘Munengi bakakuhokela litunga lyetu.’ 31Etu twamutongweza ngayi, ‘Tuli bantu ba kupwisha kaliha tuli bakakuhokela. 32Twengile likumi na babili mulwetu, tatiyetu umo. Wamina wafwa pe wa mukaala uli kuli tatiyetu mu Kenaani.’ 33Niho ou Kalela wa Engepita atukumbwile ngayi, ‘Eshe nisho shikandimukisha ngayi muli bantu ba kupwisha, ndi umo hakati kenu ukashala hamo na nami, pe wingi wabo bakatwale byakulya ku ba lupashi lwabo bali na nzala. 34Kaletenu mukonzowenu wa mukaala kukwami. Niho nikalimuke ngayi kati kaliha muli bakakuhokela. Niho nikabwesha mukonzowenu kukwenu. Mukatwesha kwikala na kulandishila mu litunga lino.’”
35Oho bashukumwinenga zimpamba zabo, shifundwa sha mali sha muntu na muntu shawaniwile mu mpamba yendi, pe oho bamonene bifundwa bya mali, nibo na tatiyabo batinine. 36Tatiyabo Yakobo wambile kukwabo ngayi, “Enu mu kunciya ninkayami wakubula bana. Yoshefwa waya na Shimiyoni unayi, pe haya kami mukushinga kunyangula na Mbenjamani. Ami haya nikenga muntu wakuyanda.”
37Lubena wambile kuli tatiyendi ngayi, “Enu tate mu kutwesha kuziha bana bami babalume babili, ndi kubwesha Mbenjamani kukwenu nifwako. Mupanenu ku maboko wami, pe nikamubwesha.”
38Ngoboni Yakobo wambile ngayi, “Mwanami kuya nendi mufwako, ndaba yayiyendi wafwa, pe unashalaho ninkayendi tuhu. Ami na kulumpala kale shikuma, ndi shuma shimo shashikalu shikamwizilila ha nzila, nikafwa mu wunginga pe nimwenu mukanyanciwa.”
Currently Selected:
Shitatiko 42: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
